1 Anutu, nio aŋso aŋbotmbot kolouŋana pu, to ambai. Mi iŋgi aŋbot molo pu.

Tabe ikam ma nio kembei buzur saŋsaŋŋana ta miri i, mi iwwa ma irru ka yok. ✡ Mbo 63:1, 119:131, 143:6

2 Nu Anutu motom yaryaaraŋom, mi leleŋ pu ilip kat.

Tana iŋgi nio kembei tomtom ta miri i ma isaana kat, mi iso iwin ka yok.

Ŋiizi na aŋma aŋpet su kerem uunu mini be aŋsuŋ pu?

3 Pataŋana tio ti ikam ma iŋgi aŋwinin motoŋ luluunu ikot mbeŋ ma aigule.

Mi koŋ koi bizin tinoknok wiŋana pio ta kembei: “Anutu ku imbot swoi?”

4 Sombe motoŋ imiili pa mbulu ta muŋgu aŋkamam na, leleŋ isaana kat.

Pa niamŋan zin iwal biibi, ta muŋgu amwwa ma amzalla pa urum ki Anutu.

Mi nio ta aŋmuŋmuuŋgu pizin mi amlala.

Mi leleyam ambai mi ambombo mboe ma kalŋoyam kat bekena ampakur Anutu. ✡ Mbo 100:2+

5 Mi parei ta iŋgi leleŋ isaana mini ma kembei?

Parei ta leleŋ ipata?

Nio aŋbotmbot ta kembei, na ambai som.

Tana ko aŋur motoŋ pa Anutu mi aŋpase pini,

mi aŋpakuri mini.

Pa ni Merere tio mi ulaaŋa tio.

6 Nio leleŋ ipata kat, mi aŋtwer ima pu.

Pa iŋgi aŋmet ma aŋbot molo kat pu.

Iŋgi aŋbot mar ta abal Hermon mi abal Mizar ta yok Yordan kunduunu i.

Tana ko motoŋ ila mini pa mbulu ku.

7 Pataŋana ta zem ma ise tio na,

ina ilol yo ma aŋsaana kat.

Iŋgi kembei mozo lukutuunu ka duubu boozomen timar mi tipolpol salakaala yo i.

Mi kembei ta wo biibi itoktoogo raama kalŋaana biibi, mi ka belut isabeleu yo i.

8 Tamen aigule ta boozomen, Yooba iurur leleene pio mi izzwe muŋaiŋana mi kampeŋana kini pio.

Mi mbeŋ ta boozomen na, aŋpakurkuri pa mboe.

Aŋkamam suŋŋana pa Anutu tio ta imborro mbotŋana tio na.

9 Anutu, ni tuŋ ŋonoono. Pa ipombolmbol yo mi iporoukalkaala yo.

Tana aŋzzo pini ta kembei: “Parei ta nu motom mbeleele yo?

Mi parei ta gedgeede koŋ koi bizin, mi tikototo yo ma tikamam pataŋana pio?

Re. Iŋgi aŋbotmbot raama leleŋ ipata kat.

10 Aigule ta boozomen, zoŋ ise mi ila zoŋ isula na,

koŋ koi bizin tikamam sua repiiliŋana pio.

Mi tinoknok wiŋana pio ta kembei: “Anutu ku imbot swoi?”

Tana sua kizin iwe kembei ta izi, mi iŋgalŋgal yo ma mburoŋ imap.

11 Mi parei ta iŋgi leleŋ isaana mini ma kembei?

Parei ta leleŋ ipata?

Nio aŋbotmbot ta kembei, na ambai som.

Tana ko aŋur motoŋ pa Anutu mi aŋpase pini,

mi aŋpakuri mini.

Pa ni Merere tio mi ulaaŋa tio.