1 Yooba, nu Anutu tio mi ulaaŋa tio.

Aigule ma mbeŋ na, tiŋiizi tio imama ku men.

2 Leŋ suŋŋana tio.

Ŋgun talŋom pa tiŋiizi tio ti.

3 Pa pataŋana boozomen ilol yo lup kek,

ma iŋgi be aŋsula leŋ Andewa i.

4 Tomtom tire yo kembei aŋbot la naala kezeene kek.

Pa mburoŋ imap kat.

5 Iŋgi tizem yo ma aŋbombooreŋ sorok kembei ta zin wal meeteŋan.

Nio kembei zin wal ta tikas zin ma timetmeete, mi tipiri zin sula naala,

mi nu motom iŋgalŋgal zin mini som, mi kampe zin mini som.

6 Nu ur yo sula kat naala ta usomŋana i,

mi zugut biibi ilol yo.

7 Ketem malmalŋana ku, ta ikoto yo,

mi ilol yo kembei ta duubu biibi ipol ma isalakaala yo.

8 Nu kam ma waeŋ bizin timbotmbot molo pio.

Mbulu ta kam pio i, ina ikam ma wal tio timototo mi lelen be tire yo risa som.

Iŋgi kembei aŋbotmbot lela ruumu sanaana, mi leŋ zaala sa tabe aŋyooto pa na som.

9 Tana pataŋana tiŋgi ikam yo ma mburoŋ imap kat.

O Yooba, aigule ta boozomen nio aŋwidit nomoŋ isala kor,

mi aŋtaŋroro u be uulu yo.

10 Lak, nu tooro mos sa pizin wal meeteŋan ma tire?

Mi parei? Zin wal zanŋan ta timetmeete kek na, kizin tasa irao imaŋga ma ipakur zom? Som.

11 Zin wal ta timbotmbot sula naala na, tizzo sua pa mbulu ku ta urur lelem pa wal ku mi muŋaiŋai zin?

Zin Andewa kan tizzo pa mbulu ku ta toto sua ku mbukŋana? Som.

12 Zin wal ta timbotmbot la zugut leleene na, tiute mos ku bibip?

Mi zin wal ta timbotmbot la meeteŋan murin mi tomtom matan mbeleele kat zin na, zin matan iŋgalŋgal mbulu ku ndeeŋeŋana? Som kat!

13 Mi nio na, tiŋiizi tio imama ku be uulu yo.

O Yooba, aigule ta boozomen, zoŋ ise na, aŋmaŋgaŋga pa muriŋ mi suŋŋana tio imama ku.

14 Yooba, parei ta nu pizil ndemem pio, mi turke motom pio?

15 Indeeŋe ta nio naŋgaŋŋoŋ mi imar na, aŋbadbaada pataŋana mi aŋbotmbot la naala kezeene.

Pa nu seseeze kat motoŋ mi pamototo yo ma kembei ta kom koi ta nio i. Tana leŋ zaala sa mini som.

16 Pa ketem malmalŋana ku ta ilol yo kek.

Koroŋ sananŋan ta nu ur be tipasaana yo na, tikam yo ma aŋmoto ma aŋsaana kat.

17 Iŋgi pataŋana matakiŋa tiliu yo,

mi tikamam be tilol yo kembei ta nonor ikot mbeŋ ma aigule.

Irao aŋko na som.

18 Mi nu kam ma wal tio ma toŋmatiziŋ tio timbotmbot molo pio.

Mi toroŋ bizin ŋonoono tomini tigarau yo som.

Iŋgi aŋbotmbot lela zugut biibi leleene.