1 Nio aŋpakur Yooba. Pa ni ulaaŋa tio mbolŋana ta ipombolmbol yo mi imenderkalkaala yo.

Ni ipaute yo pa mbulu ki malmal, mi ikam ma nomoŋ alalalŋana. ✡ Mbo 18:34

2 Ni iurur leleene pio mi iporoukalkaala yo. Mi iwe kembei siiri mbolŋana pio be aŋke lela.

Mi iwidit yo mi iurur yo sala kor bekena aŋbot ambai.

Ni itatkewe yo pa koŋ koi bizin naman, mi iwe siŋgiao pio.

Mi ikototo zin karkari ma timbot la kopoŋ mbarmaana.

3 O Yooba, niam tomtom toono koyam na, koroŋ sorok.

Parei ta nu kamam ŋgar biibi piam, mi motom ŋgalŋgal yam? ✡ Mbo 8:4; Ibr 2:6

4 Pa niam ambot rimen mi amap, kembei miiri ta iwedet pa kwoyam na.

Mbotŋana tiam isu toono na, kembei koroŋ kunuunu ta sombe zoŋ imap na imap. ✡ Yems 4:14

5 Yooba, kaaga saamba mi su!

Teege su pizin abal, mi pei you raama ka koi ma ise.

6 Kam ma lolo niini iwenweene mi iyaŋgwiiri koŋ koi bizin ma tiko leŋaleŋa.

Ser peene ku lutuunu. Naso tiko papirik.

7 Pa iŋgi kembei wo mburaanaŋana ikamam be isur yo ma aŋla leŋ i. Tana nomom su mi maata yo ma aŋse.

Uulu yo, mi tatke yo pizin wal ta timar pa toono toro na naman.

8 Wal tana, kwon pakamkaamŋan.

Tiwit naman woono isala be tipombol sua kizin mbukŋana ma imbol kat. Tamen tito sua kizin som.

9 O Anutu, nio ko aŋbo mboe popoŋana pu,

mi aŋse kombom be aŋpakuru.

10 Pa nu ta uluulu zin king tiam Israel ma tiliplip pa kan koi bizin.

Nu kamkewe mbesooŋo ku Dabit ziŋan popoŋana kini.

11 Piŋgis zaaba pio, mi tatke yo pa zin wal ta timar pa toono toro na naman.

Wal tana, kwon pakamkaamŋan.

Tiwit naman woono isala be tipombol sua kizin mbukŋana ma imbol kat. Tamen tito sua kizin som.

12 Lutuyam bizin ko titum ma tiwe bibip, kembei ke popoŋan.

Mi lutuyam moori bizin ko ruŋgun ambaimbaiŋan kembei gungun ta tisap koroŋ kunun ila bekena tipeŋgeeze king ruumu kini.

13 Mi diditu tiam ko bokbok pa kini matakiŋa,

mi sipsip mi mekmek tiam timasak ma tiwe munŋaana ma munŋaana ka tieene.

14 Mi makau tiam ta kembena. Mete sa ko irao ikam zin na som.

Ko tumŋan, mi tipepeebe ambai men ma tiwe boozo kat.

Mi ko teleŋ tiŋiizi sa isu kar keteene som.

15 Zin wal ta so kampeŋana ta kembei imbotmbot se kizin, nako lelen ambai kat.

Mi ina zin wal ta timbesmbeeze pa Yooba. Tana zin ta ko lelen ambai. Pa kampeŋana kini ko imbotmbot se kizin. ✡ Mbo 33:12