BUK SONG.
26.
Devit i raitim dispela song. Bikpela, yu kolim mi stretpela man. Long wanem, mi save mekim stretpela pasin, na mi bilip olgeta long yu. 
God, traim olgeta pasin bilong mi. Na skelim bel na tingting bilong mi. 
Yu save marimari long mi na yu stiaim mi oltaim. Yu save go paslain long mi oltaim na yu no save lusim mi. 
Mi no save raun wantaim ol man nogut. Mi no save wokabaut wantaim ol man bilong giaman. 
Mi no save laik tru long raun wantaim ol man nogut. Mi save abrusim ol. 
Bikpela, mi wasim han bilong mi bilong soim yu mi no gat rong. Na mi wokabaut raunim alta bilong yu, na mi lotu long yu. 
Mi mekim olsem, na mi singim wanpela song bilong tenkyu long yu, na mi tokim ol manmeri long ol gutpela wok yu bin mekim. 
Bikpela, mi laikim tru haus bilong yu, em dispela ples biknem bilong yu i stap long en. 
Taim yu mekim save long ol man bilong mekim sin, yu no ken pinisim laip bilong mi. Yu no ken kilim mi i dai wantaim ol man i save kilim ol arapela man. 
Ol dispela man i save mekim pasin nogut oltaim. Ol i save givim mani long ol man bilong grisim ol long mekim nogut long ol arapela manmeri. 
Tasol mi yet mi save mekim stretpela pasin. Yu ken marimari long mi na kisim bek mi. 
Mi save sanap strong. I no gat wanpela samting i ken bagarapim mi. Bai mi litimapim nem bilong yu, God, namel long ol manmeri i bung bilong lotu.