BUK SONG.
36.
Devit, wokman bilong Bikpela, em i raitim dispela song. Em i song bilong man bilong bosim musik. Sin i stap long bel bilong man nogut, na i givim sampela tok long em. Dispela kain man i no save pret liklik long God. Nogat tru. Em i givim baksait long God. 
Em i save hambak long em yet na i ting olsem, “Mi namba wan tru. God i no inap painimaut long ol pasin nogut mi bin mekim, na em i no inap kotim mi.” 
Oltaim dispela man i save tok long mekim pasin nogut na long giamanim ol arapela man. Em i no gat gutpela tingting moa bilong mekim gutpela pasin. 
Taim em i slip long bet, na em i save tingting long ol rot bilong mekim ol pasin nogut. Em i save bihainim rot nogut tasol, na em i no save givim baksait long pasin nogut. 
Bikpela, sori bilong yu i no liklik. Mak bilong en i go inap long skai. Yu bihainim pasin tru tasol, na em tu i no liklik. Mak bilong en i go inap long ol klaut antap. 
Stretpela pasin bilong yu i moa yet. Em i antap tru olsem ol maunten bilong God. Mipela i no inap save long as bilong stretpela kot yu mekim. Em i daun tumas, olsem solwara i daun tru. Bikpela, yu save lukautim ol man na ol abus na ol i stap gut. 
God, sori bilong yu i gutpela tumas, na mipela i save laikim tru. Olsem na ol manmeri nabaut i save go long yu na hait, olsem ol pikinini kakaruk i save hait aninit long wing bilong mama kakaruk. 
Yu gat planti kaikai long haus bilong yu, olsem na ol manmeri i no sot long kaikai. Ol gutpela samting bilong yu i moa yet olsem bikpela wara, na yu givim ol bilong dring. 
Yu as tru bilong laip bilong olgeta samting. Na yu as bilong lait. Mipela i save kisim lait long yu tasol, na mipela i stap gut. 
Oltaim yu mas laikim tru ol manmeri i save long yu. Yu mas helpim ol stretpela man bai ol i stap gut. 
Yu no ken larim ol bikhetman i krungutim mi. Na yu no ken larim ol man nogut i rausim mi. 
Lukim. Ol man nogut i pundaun long graun na i slip i stap. Ol i no inap kirap gen.