BUK SONG.
61.
Devit i raitim dispela song. Man i bosim musik i mas tokim ol man long paitim ol gita samting. God, harim mi i singaut long yu. Putim yau gut long beten bilong mi. 
Mi stap longwe long ples bilong mi, na bel bilong mi i hevi tru. Olsem na mi singaut long yu bilong yu ken helpim mi. Bringim mi i go long wanpela ples hait, bai ol birua i no inap bagarapim mi. 
Long wanem, yu tasol yu save lukautim mi gut. Yu tasol i strongpela banis bilong mi, olsem na ol birua i no inap daunim mi. 
Mi laikim tumas bai mi stap long haus bilong yu inap long taim mi dai. Na mi laik i stap gut klostu long yu, olsem pikinini kakaruk i save stap gut aninit long wing bilong mama kakaruk. 
God, olgeta samting mi promis pinis long yu, em yu bin harim. Na yu givim mi pinis ol samting, olsem yu save givim long ol manmeri i save litimapim nem bilong yu. 
Larim king i stap laip planti yia. Larim em i stap longpela taim long graun. 
God, larim em i stap king oltaim long ai bilong yu. Yu save laikim em tumas, olsem na oltaim yu ken was gut long em. 
Yu mekim olsem, orait long olgeta de bai mi bihainim ol promis bipo mi tokim yu long en, na oltaim bai mi singim song bilong litimapim nem bilong yu.