BUK SONG.
64.
Devit i raitim dispela song. Em i song bilong man i bosim musik. God, mi gat bikpela hevi, na yu ken harim beten bilong mi. Mi pret long ol birua. Yu mas helpim mi bai ol i no inap kilim mi. 
Ol man nogut i painim rot bilong bagarapim mi, na ol i bung bilong paitim mi. Olsem na yu mas lukautim mi bai ol i no inap mekim nogut long mi. 
Tok bilong ol man i sap tumas na i katim mi olsem bainat. Tok nogut bilong ol em i makim mi, olsem man i taitim banara na makim man long spia. 
Ol i hait i stap na sutim ol spia long ol gutpela man. Ol i no save pret, olsem na ol i sut kwiktaim. 
Ol i strongim ol yet long mekim dispela pasin nogut. Ol i toktok long ol hap ples ol i laik putim umben bilong holimpas ol arapela man. Na ol i tingting olsem, “I no gat wanpela man bai i lukim mipela.” 
Ol i pasim tok long mekim sampela pasin nogut, na ol i tok, “Mipela i tingting pinis long rot bilong mekim wanpela pasin nogut. Na i no gat wanpela man inap painimaut dispela samting mipela i laik mekim.” Yumi no inap save long tingting na bel bilong ol man. Em i hait olgeta. 
Tasol God bai i sutim ol long spia bilong en, na wantu bikpela sua bai i kamap. 
Ol i bin tok long bagarapim narapela man, olsem na bai God i bagarapim ol. Ol man i lukim ol bai ol i lap nogut long ol na tromoi het. 
Bai olgeta manmeri i pret long God. Na ol bai i toktok long dispela samting God i mekim, na tingting oltaim long dispela. 
Olgeta stretpela manmeri bai ol i amamas long Bikpela, na bai ol i go long em na hait long samting nogut. Na bai olgeta stretpela manmeri ol i litimapim nem bilong Bikpela.