BUK SONG.
81.
Asap i raitim dispela song. Man i bosim musik i mas tokim ol man long paitim kain gita bilong taun Get. Amamas na singaut long God, helpim bilong yumi. Singim song bilong litimapim nem bilong God bilong Jekop. 
Mekim gutpela musik long olkain gutpela gita kulele samting. 
Winim biugel long bikpela de bilong lotu long taim bilong nupela mun na long taim mun i bikpela pinis. 
Dispela em i lo bilong yumi ol Israel. God bilong Jekop i givim dispela lo long yumi. 
Taim bipo God i go pait long ol Isip, em i givim dispela lo long yumi Israel. 
Mi harim nek bilong wanpela man na mi no save em i nek bilong husat. Em i tok olsem, “Mi rausim pinis olgeta hevipela samting i stap long sol bilong yupela. Na mi larim yupela i putim ol basket bilong wok i go daun long graun. 
Taim yupela i gat bikpela hevi na yupela i singaut long mi, mi bin helpim yupela na yupela i stap gut. Mi stap long ples hait bilong mi namel long klaut i pairap na mi harim prea bilong yupela. Bipo yupela i stap long ol hul wara bilong Meriba na mi traim yupela. 
“Ol manmeri bilong mi, mi laik givim strongpela tok long yupela. Ol Israel, mi laikim tumas long yupela i harim tok bilong mi. 
Yupela i no ken bihainim ol giaman god bilong ol arapela lain. Na yupela i no ken lotu long narapela god. Yupela i mas lotu long mi wanpela tasol. 
Mi tasol mi Bikpela, mi God bilong yupela. Mi yet mi bin kisim yupela long Isip na bringim yupela i kam. Yupela opim maus na bai mi putim kaikai long maus bilong yupela. 
“Tasol ol manmeri bilong mi i no laik harim tok bilong mi. Tru tumas, ol Israel i no laik bihainim tok bilong mi. 
Olsem na mi larim ol i bihainim pasin bikhet bilong ol, na ol i mekim ol samting long laik bilong ol. 
Mi laikim tumas bai ol manmeri bilong mi ol i harim tok bilong mi. Na mi laik bai ol Israel i bihainim laik bilong mi oltaim. 
Sapos ol i mekim olsem, orait kwiktaim bai mi daunim ol birua bilong ol. Bai mi pait long ol birua na winim ol tru. 
Ol manmeri i no save laikim mi, bai ol i pret nogut na brukim skru long mi. Na oltaim bai mi mekim save long ol. 
Tasol mi laik givim gutpela kaikai tru long yupela, na givim yupela hani bilong bus, na bai bel bilong yupela i pulap.”