BUK SONG.
105.
Yumi kolim nem bilong Bikpela na singaut long em na tok tenkyu long em. Na yumi mas tokaut long olgeta lain manmeri long ol bikpela wok em i bin mekim. 
Yumi singim ol song bilong amamas long em na bilong litimapim nem bilong em. Na yumi tokaut long ol gutpela gutpela samting em i bin mekim. 
Yumi amamas na givim biknem long em. Ol man i save go klostu long Bikpela, ol i ken amamas tru. 
Oltaim yumi mas i go klostu long Bikpela na askim em long helpim na strongim yumi. 
Yupela ol tumbuna pikinini bilong Abraham, em wokman bilong Bikpela, yupela lain bilong Jekop, yupela ol manmeri Bikpela i bin makim bilong em yet, yupela i mas tingim gen ol strongpela wok bilong Bikpela na ol mirakel em i bin wokim. Na yupela i mas tingim ol samting em i bin mekim bilong mekim save long ol man nogut. 
Bikpela em i God bilong yumi. Em i save bosim olgeta manmeri bilong dispela graun. 
Bikpela i bin mekim wanpela kontrak wantaim yumi na dispela kontrak bai i stap oltaim. Na oltaim em bai i tingim yet tok bilong dispela kontrak. 
Bikpela i bin mekim dispela kontrak wantaim Abraham. Na em i bin mekim strongpela promis long Aisak long bihainim tok bilong dispela kontrak. 
Em i bin tok gen long Jekop, em tumbuna bilong ol Israel, na em i bin strongim dispela kontrak bilong i stap oltaim. 
Bikpela i bin tok olsem, “Mi bai givim graun Kenan long yu, na dispela graun bai i stap graun bilong ol lain tumbuna pikinini bilong yu.” 
Bipo ol Israel i liklik lain tru na ol i olsem ol tripman. Tru, ol i bin i stap long graun Kenan, tasol ol i no gat graun bilong ol yet. 
Ol i save raun nabaut long graun bilong ol arapela lain pipel. 
Tasol Bikpela i no larim ol sampela lain i daunim ol. Nogat. Em i helpim ol na em i krosim ol king i laik mekim nogut long ol. 
Em i tokim ol dispela king olsem, “Mi makim ol dispela manmeri bilong mekim wok bilong mi na yupela i no ken mekim pasin nogut long ol. Yupela i no ken mekim nogut long ol profet bilong mi.” 
Bikpela i mekim bikpela hangre i kamap long graun bilong ol, na em i pinisim olgeta kaikai bilong ol. 
Tasol em i salim Josep i go paslain long ol na em i stap long kantri Isip. Ol i larim ol man i baim Josep na em i kamap wokboi nating bilong ol. 
Ol i pasim strong ol sen long lek bilong en na lek i pen. Na ol i pasim bikpela ring ain long nek bilong en. 
Em i stap olsem inap long taim ol samting i kamap olsem em i bin tokaut long en. Tok bilong Bikpela i soim ol olsem, tok bilong Josep i tru. 
Orait nau king bilong Isip i salim wanpela man i go lusim Josep long kalabus. Dispela king bilong ol arapela lain em i pinisim kalabus bilong Josep. 
Na king i putim Josep i stap hetman bilong gavman bilong en. Olsem na Josep i stap namba wan gavman bilong Isip. 
Em i gat wok bilong bosim ol ofisa bilong king, na em i gat pawa bilong skulim gut ol man i save givim tingting long king. 
Bihain Jekop i go i stap long Isip. 
Na bihain Bikpela i helpim ol lain manmeri bilong en na ol i gat planti pikinini. Na em i mekim strong bilong ol i winim strong bilong ol birua bilong ol. 
Em i mekim ol Isip i birua long ol manmeri bilong en, na ol Isip i painim rot bilong mekim nogut long ol wokman bilong en. 
Bihain Bikpela i makim Moses, wokman bilong en, na Aron, na i salim tupela i go long Isip. 
Tupela i mekim strongpela wok bilong God na i wokim ol mirakel long Isip. 
God i mekim tudak i karamapim graun bilong ol, tasol ol Isip i sakim tok bilong en. 
Em i tanim olgeta wara bilong ol i kamap blut na i kilim i dai olgeta pis. 
Ol rokrok i kamap planti moa na pulapim graun bilong ol, na bikpela haus bilong king tu. 
God i tok, na ol lang na natnat i kamap planti tumas na pulapim olgeta hap graun na ples. 
Em i no salim ren tru i kam daun long graun bilong ol. Em i mekim ren ais na paia bilong klaut i kam daun. 
Em i bagarapim ol diwai wain na ol diwai fik bilong ol, na em i brukim ol diwai nabaut. 
Em i tok tasol, na ol grasopa i kamap. Namba bilong ol i moa yet, na ol man i no inap kaunim. 
Ol grasopa i kaikai olgeta samting i gat lip, na olgeta lip bilong kaikai ol Isip i bin planim. 
Na God i kilim i dai ol nambawan pikinini man bilong olgeta famili bilong Isip. 
Bihain em i bringim ol Israel i go na ol i lusim Isip. Ol i karim silva na gol wantaim na ol i go. Olgeta Israel i stap gut. I no gat wanpela i bagarap. 
Ol Isip i pret long ol Israel. Olsem na ol Isip i lukim ol i go pinis na ol i amamas tru. 
God i putim wanpela klaut i stap antap na karamapim ol manmeri bilong en. Na long nait em i putim bikpela paia i stap na ol i gat lait. 
Ol i askim em long sampela kaikai, na em i salim ol pisin i kam na ol i kaikai. Em i givim bret bilong heven long ol, na ol i kaikai na pulap tru. 
Em i mekim wara i kamap long wanpela bikpela ston. Bikpela wara i kapsait na i ran i go long ples drai i gat wesan, olsem wanpela bikpela wara bilong bus. 
Em i tingting yet long dispela strongpela promis bipo em i mekim long Abraham, wokman bilong em. 
Olsem na em i bringim ol manmeri bilong en i go. Na ol i singsing na amamas i go. Dispela ol manmeri em i makim pinis bilong em yet, ol i singaut na amamas na wokabaut i go. 
Graun bilong ol arapela lain manmeri, em i givim long ol. Na em i larim ol i kisim ol gaden bilong ol dispela lain. 
Em i mekim olsem bai ol Israel i ken bihainim olgeta tok na olgeta lo bilong em. Litimapim nem bilong Bikpela!