BUK SONG.
109.
Devit i raitim dispela song, em song bilong lotu. Em i song bilong man i bosim musik. God, mi save litimapim nem bilong yu. Plis, yu mas harim prea bilong mi. 
Long wanem, ol man nogut na ol man bilong giaman, ol i birua long mi na tok giaman long mi. 
Ol i tok nogut tru long mi, tasol ol i tok nating. I no gat as bilong tok. 
Mi save laikim ol na mi beten bilong helpim ol, tasol ol i no laikim mi. 
Mi mekim gutpela pasin long ol, tasol ol i bekim pasin nogut long mi. Mi save laikim ol tumas, tasol ol i no laikim mi. 
Makim wanpela man nogut bai em i ken skelim tok bilong birua bilong mi long kot. Wanpela birua bilong em yet i ken kotim em. 
Man i harim kot i ken painimaut dispela man i gat asua, na salim em i go long kalabus. Na em i mas tingim ol beten tu bilong dispela man, em i sin. 
Mi laik bai em i mas i dai kwiktaim, na narapela man i ken kisim wok bilong en. 
Na mi laik bai em i dai na ol pikinini bilong en bai i no gat papa, na meri bilong en i no gat man. 
Na mi laik bai ol pikinini bilong en ol i no gat haus na ol i stap rabis tru. Na ol man i ken rausim ol long haus nogut ol i stap long en. 
Sapos dispela birua i gat dinau long sampela man, mi laik bai ol dispela man i kam kisim graun samting bilong en, na bai ol man bilong narapela ples i ken kisim olgeta samting em i bin mekim wok bilong baim. 
Mi laik bai i no gat wanpela man i ken marimari long em, na bai i no gat wanpela i sori long ol pikinini bilong en i no gat papa. 
Mi laik bai ol pikinini bilong en i ken i dai na ol lain i kamap bihain i no ken tingting moa long nem bilong dispela man. 
Mi laik bai Bikpela i ken tingting long pasin nogut ol tumbuna bilong en i bin mekim. Na em i no ken lusim sin bilong mama bilong en. 
Bikpela i ken tingting oltaim long sin bilong ol, na ol manmeri i ken lusim tingting olgeta long lain bilong en. 
Dispela man i no bin tingting long marimari long ol arapela man. Em i birua long ol rabisman na long ol man i sot long ol samting na long ol man i bel hevi, na em i kilim ol i dai. 
Bipo em i laik mekim tok nogut long ol arapela man i ken bagarap, orait nau em yet i mas bagarap. Em i no laik askim God long mekim gut long ol arapela man, orait em tu i no ken kisim blesing bilong God. 
Oltaim em i save tok long ol arapela man i ken bagarap, na dispela tok i kamap olsem bilas bilong em yet. Mobeta dispela tok bilong en i go insait long bodi bilong en, olsem wara, na i go insait long ol bun bilong en olsem wel. 
Na dispela tok bilong en i ken karamapim em olsem klos, na raunim bel bilong en olsem let. 
Mi laik bai Bikpela i ken mekim save olsem long ol man i kotim mi, long wanem, ol i save mekim dispela tok nogut tru long mi. 
Tasol God, Bikpela bilong mi, mi laik bai yu helpim mi, olsem yu promis pinis. Yu gutpela na yu laikim mi oltaim, olsem na yu mas kisim bek mi. 
Mi stap rabisman tru na mi stap nating, na mi pilim nogut. 
Mi laik i go pinis olsem tewel san i mekim kamap em i go pinis long apinun, taim san i go daun. Mi olsem binatang win i tromoi i go. 
Mi bin tambu long kaikai na skru bilong mi i no gat strong. Mi kamap bun nating na olgeta bun bilong mi i slek tru. 
Ol manmeri i save lukim mi na tok bilas long mi. Ol i tantanim het na lap long mi. 
God, Bikpela bilong mi, yu save laikim mi tru oltaim. Yu ken helpim mi na kisim bek mi. 
Mekim ol birua i save olsem, yu tasol yu save helpim mi na kisim bek mi. 
Ol i ken tok bai God i bagarapim mi, tasol bai yu mekim gut tasol long mi. Mi laik bai yu daunim ol man i mekim nogut long mi, na bai mi, wokman bilong yu, mi ken belgut. 
Mi laik ol birua bilong mi ol i pilim bikpela sem, na ol manmeri i ken lukim ol i sem nogut. 
Tasol bai mi bikmaus na tok tenkyu long Bikpela. Long taim ol manmeri i bung bilong lotu bai mi litimapim nem bilong em. 
Long wanem, em i save helpim ol rabisman na lukautim ol, bai ol man i no inap kotim ol na tok ol i mas i dai.