BUK SONG.
119.
Ol man i wokabaut stret na i no gat asua, na i save bihainim lo bilong Bikpela, ol i ken amamas. 
Ol man i bihainim tru olgeta tok bilong God, ol i ken amamas. 
Tru tumas, ol dispela man i no save bihainim pasin nogut. Ol i save wokabaut long pasin bilong Bikpela. 
Yu bin givim mipela olgeta lo bilong yu, na yu tok olsem mipela i mas lukaut gut bai mipela i bihainim olgeta lo. 
Mi laikim tumas bai mi strong long bihainim tok bilong yu oltaim. 
Olsem na bai mi no gat sem liklik, long wanem, mi tingting long olgeta lo bilong yu tasol. 
Taim mi wok long lainim gut olgeta stretpela pasin bilong yu, bai bel bilong mi i stap stret, na bai mi ken litimapim nem bilong yu. 
Mi laik bihainim gut olgeta lo bilong yu. Olsem na yu no ken lusim mi. 
Olsem wanem na yangpela man i ken wokabaut long klinpela pasin? Em i mas bihainim tok bilong yu na bai em i stap klin. 
Mi gat wanpela tingting tasol. Mi laik mekim wok bilong yu. Yu helpim mi na mi no ken lusim ol lo bilong yu. 
Mi putim tok bilong yu i stap long bel na tingting bilong mi. Olsem na bai mi no ken mekim sin long yu. 
Bikpela, mi litimapim nem bilong yu. Yu mas lainim mi long ol stretpela lo bilong yu. 
Mi save tokim ol manmeri long olgeta lo yu bin autim long mipela. 
Mi save amamas tru long bihainim tok bilong yu. Na mi no save amamas olsem long planti mani na bilas samting. 
Mi save tingting gut long ol samting yu laik mi mekim, na mi save skelim ol tok yu bin givim mipela. 
Mi laikim tumas ol lo bilong yu. Mi no ken lusim tingting long dispela tok. 
Mi laik yu mekim gut tru long mi, wokman bilong yu. Olsem na bai mi ken i stap laip na bihainim tok bilong yu. 
Yu kliaim tingting bilong mi bai mi inap save gut long olgeta gutpela gutpela tok i stap long lo bilong yu. 
Mi no inap i stap longtaim long dispela graun. Olsem na yu no ken haitim lo bilong yu long mi. 
Bel bilong mi em i dai tru long bihainim stretpela pasin bilong yu long olgeta de. 
Yu save krosim ol bikhetman, na ol man i save givim baksait long lo bilong yu na i bihainim laik bilong ol yet, ol bai i lus. 
Ol i save tok bilas na tok nogut long mi, long wanem, mi save bihainim lo bilong yu. Olsem na mi laik bai yu no ken larim ol i mekim dispela kain tok long mi. 
Ol hetman i kibung na painim rot bilong kilim mi i dai. Tasol maski, mi wokman bilong yu, bai mi tingting oltaim long stretpela lo bilong yu. 
Mi laikim tumas tok yu givim mi bilong stiaim lek bilong mi. Tok bilong yu i save skulim mi oltaim. 
Ol i daunim mi na mi slip nogut long graun. Kirapim mi na strongim mi olsem yu bin promis. 
Mi bin tokim yu long olgeta pasin bilong mi, na yu bin bekim tok bilong mi. Yu mas skulim mi long olgeta lo bilong yu. 
Skulim mi long bihainim lo bilong yu, na bai mi tingting long olgeta gutpela gutpela tok bilong yu. 
Bel bilong mi em i hevi tru. Yu mas strongim mi olsem yu bin promis. 
Yu mas was long mi bai mi no lusim rot bilong yu. Mekim gutpela pasin long mi na skulim mi long lo bilong yu. 
Mi pasim tok long mi bai bihainim yu tru. Oltaim mi tingting long ol lo bilong yu. 
Bikpela, mi save bihainim tok yu bin givim mi. Nogut yu larim wanpela samting i kamap na i givim sem long mi. 
Mi bai hariap long bihainim tok bilong yu, long wanem, yu bai givim sampela save moa long mi. 
Bikpela, yu mas lainim mi gut long lo bilong yu, na bai mi bihainim long olgeta de. 
Mekim klia mining bilong lo bilong yu na bai mi bihainim. Bel bilong mi bai i kirapim mi long bihainim olgeta lo. 
Stiaim lek bilong mi bilong mi ken wokabaut long rot bilong lo bilong yu, long wanem, mi save laikim tumas dispela lo. 
Kirapim bel bilong mi bai mi gat laik long bihainim tok bilong yu. Nogut bel bilong mi i kirap long mangalim olgeta samting. 
Helpim mi long givim baksait long ol samting i no gutpela. Mekim gut long mi olsem yu bin promis long mi. 
Yu save givim promis long ol man i pret long yu. Orait mi laik bai yu bihainim tok bilong promis na mekim olsem long mi, wokman bilong yu. 
Mi pret long ol tok nogut, na yu ken helpim mi bai dispela tok i no ken daunim mi. 
Mi laik bihainim olgeta lo bilong yu. Pasin bilong yu i stret olgeta, olsem na yu mas givim laip long mi. 
Bikpela, yu mas soim mi olsem yu laikim mi tumas na yu ken kisim bek mi. Yu promis pinis long mekim olsem. 
Helpim mi na bai mi inap bekim tok long ol man i tok nogut long mi, long wanem, mi bilipim tok bilong yu. 
Strongim mi bai mi ken autim tok tru bilong yu long olgeta taim, long wanem, mi save bilip long stretpela tok bilong yu. 
Bai mi bihainim lo bilong yu oltaim oltaim. 
Mi traim long bihainim tok bilong yu, olsem na pasin nogut i no ken pasim mi. 
Bai mi tokim ol king long tok bilong yu. Mi no inap sem long mekim olsem. 
Mi belgut tru long bihainim ol lo bilong yu long wanem, mi laikim tumas ol dispela lo. 
Mi tingim ol lo bilong yu i gutpela na mi laikim tumas. Na bai mi tingting oltaim long stretpela tok bilong yu. 
Yu mas tingim gen dispela promis bipo yu givim long mi, wokman bilong yu. Dispela i mekim mi i bilip long yu. 
Taim mi gat hevi mi bin kisim bel isi, long wanem, promis bilong yu i givim laip long mi. 
Ol bikhetman i bin tok bilas nogut long mi, tasol mi no save givim baksait long lo bilong yu. 
Bikpela, mi save ting long tok bipo yu bin givim mi, na dispela tok i givim strong long mi. 
Mi lukim ol man nogut i brukim lo bilong yu, na mi save kros long ol. 
Mi stap longwe long as ples bilong mi na mi mekim ol song long ol lo bilong yu. 
Bikpela, long nait mi save tingting long yu, na mi bihainim lo bilong yu. 
Mi save bihainim olgeta lo bilong yu, na dispela i mekim mi i belgut. 
Bikpela, yu tasol yu inap long mi. Mi promis long yu olsem, bai mi bihainim olgeta lo bilong yu. 
Mi askim yu strong bai yu marimari long mi, long wanem, yu promis pinis long mekim olsem. 
Mi tingim pinis wokabaut bilong mi, na nau mi promis long yu bai mi bihainim tok bilong yu. 
Mi no ken wet. Mi hariap long bihainim lo bilong yu. 
Ol man nogut i traim long pasim mi bilong pulim mi i go long pasin bilong ol, tasol mi no lusim tingting long lo bilong yu. 
Long biknait tru mi save kirap na litimapim nem bilong yu long ol stretpela tok yu mekim long kot. 
Mi save wokabaut wantaim ol man i save mekim wok bilong yu na i save bihainim lo bilong yu. 
Bikpela, yu save laikim tumas olgeta manmeri bilong graun. Skulim mi long olgeta lo bilong yu. 
Bikpela, yu bin mekim gutpela pasin long mi, wokman bilong yu. Yu bihainim tru promis bilong yu. 
Mi bilip tru long olgeta lo bilong yu, olsem na yu ken givim gutpela tingting na gutpela save long mi. 
Yu no bin mekim save long mi yet na mi save lusim rot bilong yu. Tasol nau mi save bihainim tok bilong yu. 
Yu gutpela tumas na yu save marimari long mi. Yu mas skulim mi gut long lo bilong yu. 
Ol bikhetman i bin mekim planti tok giaman long mi. Tasol mi no gat narapela tingting. Mi bihainim olgeta lo bilong yu tasol. 
Ol dispela man i no gat gutpela tingting. Tasol mi laikim tumas lo bilong yu. 
I gutpela tru yu bin mekim save long mi. Dispela i skulim mi gut long ol lo bilong yu. 
Mi no save laikim mani olsem mi laikim lo bilong yu. 
Yu yet yu bin wokim mi, na yu save was gut long mi. Yu givim tingting long mi bai mi inap lainim gut olgeta lo bilong yu. 
Ol manmeri i save pret long yu bai ol i lukim mi na amamas, long wanem, mi bilip long promis bilong yu. 
Bikpela, mi save olgeta lo bilong yu i stret tasol. Yu tingting long stretim pasin bilong mi tasol, na yu givim hevi long mi. 
Yu promis pinis bai yu laikim mi oltaim na bai yu strongim bel bilong mi, wokman bilong yu. Orait nau mi laik yu mekim olsem. 
Yu ken sori long mi nau, na bai mi kisim laip, long wanem, mi laikim tru lo bilong yu. 
Ol bikhetman i save tok giaman na kotim mi nating. Mekim ol i sem tru long dispela pasin bilong ol. Tasol mi, bai mi tingting oltaim long olgeta lo bilong yu. 
Wanem ol man i save pret long yu na ol man i save long lo bilong yu, ol i ken kam long mi. 
Helpim mi long bihainim tru olgeta lo bilong yu, na bai mi no ken sem long pasin bilong mi. 
Mi wet long yu i kisim bek mi na mi bel hevi tru, na strong bilong mi i pinis olgeta. Tasol mi save bilip tru long tok bilong yu. 
Mi was yet long lukim yu inapim promis bilong yu, na ai bilong mi i les tru. Na mi tok, “Wanem taim bai yu mekim bel bilong mi i kamap isi?” 
Mi bagarap olsem olpela skin meme bilong pulimapim wain em ol i tromoi pinis. Tasol mi no lusim tingting long ol lo bilong yu. 
Hamas taim yet bai mi wet i stap? Wanem taim bai yu mekim save long ol man i mekim nogut long mi? 
Ol bikhetman i no save bihainim lo bilong yu. Ol i mekim sampela pasin hait bilong holimpas mi. 
Mipela manmeri inap bilipim olgeta lo bilong yu. Ol man i mekim nogut long mi long tok giaman bilong ol. Olsem na mi laik yu helpim mi. 
Klostu ol i bin kilim mi i dai. Tasol mi no lusim lo bilong yu. 
Yu lukautim mi gut, long wanem, yu save laikim mi oltaim. Olsem na mi ken bihainim olgeta lo bilong yu. 
Bikpela, tok bilong yu bai i stap oltaim oltaim. Em i stap strong long heven. 
Yu save bihainim tok bilong yu oltaim oltaim. Yu putim graun i stap long ples bilong en, na i stap olsem na i no save surik. 
Yu yet yu bin tok na olgeta samting i stap olsem inap long nau. Long wanem, olgeta samting i save mekim wok bilong yu. 
Sapos mi no laikim tumas lo bilong yu, orait inap long yu mekim save long mi na mi dai. 
Mi no ken lusim ol lo bilong yu, long wanem, mi bihainim ol na yu mekim mi i stap laip. 
Mi bilong yu tasol, olsem na yu kisim bek mi. Oltaim mi bihainim tok bilong yu. 
Ol man nogut i hait i stap bilong kilim mi i dai. Tasol mi save tingting long olgeta lo bilong yu na mi no wari long ol. 
Mi save nau, i no gat wanpela samting i gutpela tru. Tasol tok bilong yu i nambawan tru na em inap long olgeta samting long olgeta de. 
Mi laikim tru lo bilong yu. Mi save tingting long en long san na long nait. 
Lo bilong yu i stap wantaim mi oltaim na i givim planti save long mi. Na dispela i mekim mi i saveman tru na mi winim save bilong ol birua bilong mi. 
Oltaim mi save tingting long tok tru bilong yu, olsem na mi kisim gutpela tingting tru, na mi winim ol tisa bilong mi. 
Na save bilong mi i winim save bilong ol lapun, long wanem, mi save bihainim stretpela lo bilong yu. 
Mi surik long bihainim pasin nogut, long wanem, mi laik bihainim tok bilong yu tasol. 
Yu yet yu bin lainim mi long ol tok bilong yu. Olsem na mi no lusim dispela tok. 
Hani i save swit long maus bilong mi, tasol tok bilong yu i swit moa yet. 
Lo bilong yu i save givim gutpela tingting long mi, olsem na mi no laik tru long olgeta pasin nogut. 
Tok bilong yu i olsem lam bilong helpim mi long wokabaut stret, na i olsem lait bilong soim rot long mi. 
Mi promis pinis bai mi bihainim olgeta stretpela tok bilong yu. Orait bai mi mekim olsem. Mi no ken giaman. 
Bikpela, harim. Bikpela pen tru i karamapim mi. Yu mas mekim mi i stap laip olsem yu bin promis. 
Bikpela, mi prea na givim tenkyu long yu. Yu ken kisim tenkyu bilong mi, na skulim mi gut long tok bilong yu. 
Oltaim mi redi long lusim laip bilong mi. Tasol mi no lusim tingting long lo bilong yu. 
Ol man nogut i taitim umben bilong holimpas mi. Tasol mi no lusim tok bilong yu. 
Mi save holim tok bilong yu oltaim oltaim. Na dispela tok i save mekim bel bilong mi i amamas tru. 
Mi tok pinis bai mi bihainim olgeta lo bilong yu inap long taim mi dai. 
Mi no save laikim ol man i giaman long bihainim yu. Tasol mi laikim tumas lo bilong yu. 
Yu tasol yu wasman bilong mi na strongpela banis bilong mi. Mi save bilip long promis bilong yu. 
Yupela manmeri bilong sin, lusim mi. Mi laik bihainim lo bilong God bilong mi. 
Yu promis pinis bai yu strongim mi na mi stap laip, na mi bilipim promis bilong yu. Givim dispela strong long mi, nogut bilip bilong mi i lus nating. 
Holim han bilong mi na bai mi stap gut. Na oltaim bai mi putim gut yau bilong mi long tok bilong yu na bai mi bihainim. 
Yu save givim baksait long olgeta manmeri i lusim lo bilong yu. Giaman bilong ol bai i lus nating. 
Yu save ting ol manmeri nogut i olsem pipia tasol, olsem na mi laikim tumas tok bilong yu. 
Mi pret tumas long yu na skin bilong mi i guria. Mi tingim kot bilong yu na mi pret. 
Mi bin mekim gutpela stretpela pasin. Mi no laik yu lusim mi na bai ol birua i mekim nogut long mi. 
Mi laik yu promis bai yu helpim mi, wokman bilong yu. Yu no ken larim ol bikhetman i givim hevi long mi. 
Mi wet wet long yu i kisim bek mi long han bilong ol man nogut, olsem bipo yu bin promis long mekim. Tasol mi wet yet na mi pilim nogut tru. 
Yu ken sori long mi, na lainim mi gut long tok tru bilong yu. 
Mi wokman bilong yu, olsem na yu ken givim tingting long mi bai mi ken save long tok bilong yu. 
Ol manmeri i save kalapim lo bilong yu. Olsem na yu mekim save long ol. 
Mi laikim tumas lo bilong yu. Mi no laikim tumas nambawan gol, tasol mi laikim tumas tok bilong yu. 
Olsem na mi save bihainim olgeta tok bilong yu. Mi no laik tru long ol rot i abrusim rot bilong yu. 
Tok bilong yu i gutpela tumas. Olsem na mi save bihainim olgeta. 
Sapos wanpela man i helpim narapela man long save long as bilong tok bilong yu, orait em i kisim lait long bel bilong en. Na dispela tok i givim tingting long man i no gat planti save. 
Mi laikim tru lo bilong yu, na bel bilong mi i kirap moa yet long bihainim. 
Yu mas kam na marimari long mi. Yu save mekim olsem long olgeta manmeri i laikim yu. 
Yu mas was long mi bai mi no ken pundaun long sin, olsem bipo yu promis long mekim. Yu no ken larim pasin nogut i winim mi. 
Kisim bek mi, na ol man i wok long daunim mi, ol i no ken bagarapim mi. Olsem na mi ken bihainim tok bilong yu. 
Yu ken i stap klostu long mi, na skulim mi long olgeta lo bilong yu, na mekim gut long mi. 
Mi krai planti na aiwara bilong mi i ran moa yet, long wanem, ol man i no bihainim lo bilong yu. 
Bikpela, yu stret olgeta, na olgeta lo bilong yu i stretpela tasol. 
Olgeta lo yu givim mipela i stretpela na gutpela tasol. 
Ol birua bilong mi i no save tingting long tok bilong yu. Olsem na bel bilong mi i hat olsem paia. 
Promis bilong yu i tru, na mi traim pinis. Olsem na mi, wokman bilong yu, mi save laikim tumas dispela promis. 
Mi man nating na ol man i tok bilas long mi, tasol mi no save lusim tingting long lo bilong yu. 
Stretpela pasin bilong yu i stap oltaim oltaim, na lo bilong yu i tru olgeta. 
Planti hevi i kamap long mi, tasol mi amamas long lo bilong yu. 
Tok bilong yu i stretpela oltaim oltaim. Yu helpim mi bai mi kisim save long dispela tok na mi ken i stap laip. 
Bikpela, mi prea strong tru long yu. Harim beten bilong mi, na bai mi bihainim olgeta tok bilong yu. 
Nau mi singaut long yu. Kisim bek mi, na bai mi ken bihainim ol lo bilong yu. 
Tulait i no bruk yet na mi beten long yu long helpim mi. Mi save bilip strong long promis bilong yu. 
Long nait mi no save slip. Mi tingting oltaim long tok bilong yu tasol. 
Bikpela, yu save laikim mi oltaim na yu harim prea bilong mi. Yu gutpela tumas, olsem na yu mas lukautim mi bai mi stap laip. 
Ol man i gat tingting nogut na i laik bagarapim mi, ol i kam klostu. Ol i no save bihainim lo bilong yu. 
Tasol Bikpela, yu stap klostu long mi, na olgeta lo bilong yu i tru tasol. 
Bipo tru mi save long tok bilong yu. Yu mekim dispela tok i stap oltaim oltaim. 
Yu lukim mi i gat bikpela hevi, olsem na yu mas pinisim dispela hevi. Mi no save lusim tingting long lo bilong yu. 
Helpim mi na kisim bek mi na givim mi laip, olsem yu bin promis long mekim. 
Ol man nogut i no save bihainim stretpela lo bilong yu, olsem na bai yu no kisim bek ol. 
Bikpela, marimari bilong yu i bikpela moa. Yu pasim tok pinis long kisim bek mi, orait nau mi laik yu mekim olsem. 
Planti man i wok long mekim nogut long mi na birua long mi, tasol mi no lusim tok tru bilong yu. 
Taim mi lukim ol man i sakim bilip, mi save kros long ol, long wanem, ol i no bihainim tok bilong yu. 
Yu lukim mi, mi laikim tumas tok bilong yu. Yu save laikim mi tumas, olsem na yu mas kisim bek mi. 
As bilong lo bilong yu em i tok tru tasol. Na olgeta stretpela lo bilong yu i save stap oltaim oltaim. 
Ol hetman i save mekim nogut long mi, na i no gat as bilong dispela pasin bilong ol. Tasol mi save tingting long tok bilong yu. 
Mi amamas moa yet long ol promis bilong yu, olsem wanpela man i kisim planti gol samting. 
Mi no laik tru long pasin giaman na bel bilong mi i nogut long en. 
7-pela taim long olgeta de mi save tenkyu long yu long ol stretpela tok yu mekim long kot. 
Ol manmeri i laikim tumas lo bilong yu, ol i stap gut tru, na i no gat wanpela samting inap mekim ol i pundaun. 
Bikpela, mi wetim yu i kisim bek mi, na mi mekim pasin olsem yu bin tok. 
Mi save bihainim ol lo bilong yu. Mi laikim tumas ol dispela lo. 
Mi save bihainim olgeta lo na olgeta tok bilong yu, na yu save lukim olgeta pasin bilong mi. 
Bikpela, harim mi i singaut long yu long helpim mi. Givim gutpela save long mi, olsem bipo yu promis pinis long mi. 
Putim yau long prea bilong mi, na kisim bek mi olsem bipo yu tok. 
Yu save skulim mi gut long olgeta lo bilong yu, olsem na bai mi litimapim nem bilong yu oltaim. 
Mi bai singim song long lo bilong yu, long wanem, olgeta lo bilong yu i stretpela tasol. 
Mi save bihainim lo bilong yu, olsem na yu mas redi long helpim mi oltaim. 
Bikpela, bel bilong mi i krai long yu long kisim bek mi, na lo bilong yu i save mekim mi i amamas. 
Yu mas givim mi laip, na bai mi litimapim nem bilong yu. Mi laik bai tok bilong yu i ken helpim mi. 
Mi lusim gutpela rot pinis olsem sipsip i lus. Olsem na yu mas kam painim mi, wokman bilong yu. Mi no save lusim tingting long lo bilong yu.