JUDIT.
16.
Olgeta Israel i stap wantaim Judit, na Judit i kirapim dispela singsing bilong tenkyu, na olgeta manmeri i bihainim maus bilong em. 
“Yumi singsing long God bilong mi, na paitim garamut. Yumi singsing long Bikpela wantaim ol kundu. Litimapim nem bilong em long nupela song. Givim biknem long em na kolim nem bilong em. 
Long wanem, Bikpela em i God bilong pinisim pait. Em i kisim bek mi long han bilong ol birua, na em i putim mi bek long kem bilong ol manmeri bilong em. 
Ol Asiria i lusim ol maunten long Not na ol i kam daun. Lain soldia bilong ol i moa yet, na i pasim ol ples daun. Na ol soldia i sindaun long ol hos i karamapim ol maunten. 
Ol i laik pretim mipela na ol i tok olsem ol bai i kukim graun bilong mipela. Na ol bai i kilim ol yangpela man long bainat. Na ol bai i tromoim ol bebi i go long graun. Na ol bai i pulim ol pikinini i go kalabus. Na ol bai i spoilim ol yangpela meri bilong mipela. 
Tasol Bikpela I Gat Olgeta Strong em i daunim ol long han bilong wanpela meri. 
I no ol yangpela man i bin bagarapim bikman bilong ol. Nogat. Na i no wanpela strongpela man i kilim em i dai. Nogat. Judit wanpela tasol, em pikinini bilong Merari, em i trikim em long naispela pes bilong em. 
Em i rausim klos bilong sori bilong em, na em i litimapim ol tarangu manmeri bilong Israel. Em i welim pes bilong em yet long sanda, na em i pasim gras bilong em long wanpela naispela laplap, na i putim naispela klos bilong grisim em. 
Bikpela lida i aigris long lek bilong Judit, na i lukim em i naispela meri moa. Orait na bainat i katim nek bilong em. 
Ol man bilong Persia i guria long strong bilong dispela meri. Ol man bilong Midia i lukim em i no pret long wanpela man, na ol i seksek tru. 
Ol lain bilong mipela i bagarap bipo, nau ol i amamas na ol i singaut strong, na ol birua i guria. Ol i bikmaus tru, na ol birua i ranawe. 
Mipela ol pikinini bilong ol wokmeri nating i kilim ol i dai. Mipela i sutim ol olsem ol kalabusman i laik ranawe. Ol i pinis olgeta long han bilong ol ami bilong Bikpela. 
Bai mi singim wanpela nupela song long God bilong mi. Bikpela, yu moa moa yet. Namba bilong yu i win tru. Yu strong olgeta, na i no gat wanpela samting inap long winim yu. Nogat tru. 
Olgeta samting yu wokim pinis i mas i stap aninit long yu. Yu bin tok tasol na ol i kamap. Yu winim win bilong yu na wantu ol samting i kamap gutpela tru. I no gat wanpela man i ken sakim tok bilong yu. 
Ol maunten na ol biksolwara i save seksek. Taim yu kamap klostu, ol traipela ston i save kamap wara nating. Tasol yu save marimari long ol man i bihainim tok bilong yu. 
Switpela smel bilong ofa em i samting nating. Na gris bilong bulmakau ol i kukim long alta, em i pipia nating. Tasol man i bihainim tok bilong Bikpela, em i samting tru. 
Wanem ol kantri i laik pait long ol manmeri bilong mi, ol i mas lukaut. Bikpela I Gat Olgeta Strong bai i bekim long ol long de bilong bikpela kot. Em bai i salim paia i go long ol, na ol liklik snek bai i kaikaim skin bilong ol. Na bai ol i karim pen na krai oltaim.” 
Orait taim ol manmeri i kamap long Jerusalem, ol i lotu long God. Ol manmeri i kamap klin pinis long ai bilong God, orait ol i mekim ol ofa bilong paia i kukim olgeta na ol ofa ol manmeri i promis long givim long Bikpela na ol ofa ol i bringim long laik bilong ol yet. 
Olgeta samting bilong Holofernes, em ol manmeri i bin givim long Judit, Judit i givim long God. Na dispela taunam Judit yet i bin kisim long rum slip bilong Holofernes, em tu em i givim long God. 
Inap long tripela mun, ol manmeri i amamas i stap long Jerusalem klostu long tempel, na Judit tu i stap wantaim ol. 
Ol dispela de bilong amamas i pinis, orait olgeta manmeri i go bek long ples bilong ol. Na Judit i go bek long Betulia na i sindaun i stap long graun bilong em yet. Na stat long dispela taim i go inap em i dai, em i gat biknem long olgeta hap bilong Israel. 
Planti man i laik maritim em, long wanem, Manase man bilong en i dai pinis, na ol i bin planim em wantaim ol tumbuna bilong em. Tasol Judit i no marit moa inap em i dai. 
Nem bilong en i kamap bikpela moa. Na em i sindaun long haus bilong man bilong em inap em i gat 105 yia. Em i larim wokmeri nating bilong en i go fri. Na em i dai long Betulia na ol i planim em long matmat bilong man bilong em, Manase. 
Ol manmeri bilong Israel i krai sori long Judit inap long 7-pela de. Taim em i no dai yet, em i tilim ol samting bilong em i go long ol lain bilong man bilong em, Manase, na tu long ol wanlain bilong em yet. 
Long taim Judit i stap, na planti yia bihain long taim em i dai, i no gat wanpela man inap long pretim ol manmeri bilong Israel.