SIRAK.
10.
Hetman i gat gutpela tingting, em bai i stiaim gut ol manmeri bilong em, na ol manmeri i gat save bai i mekim gut wok lida bilong ol. 
Sapos hetman bilong ol manmeri i gutpela, orait ol manmeri bilong em tu bai i stap gut. Na sapos lida bilong ples em i gutpela, orait olgeta manmeri tu bai i stap gutpela. 
King i no gat gutpela tingting, em i save bagarapim ol manmeri bilong em. Tasol bikman i gat save, em bai i mekim ples i go het. 
Pawa bilong bosim graun i stap long han bilong Bikpela, na em bai i kirapim ol gutpela manmeri long taim em yet i makim. 
Bikpela yet i mekim wok bilong ol manmeri i kamap gut, na em i givim biknem long ol kuskus bilong king. 
Yu no ken krosim poroman bilong yu long liklik rong em i bin mekim. Na taim wanpela man o meri i bikhet tru long yu, larim em pastaim. Yu no ken mekim wanpela samting. 
Pasin bilong hambak na pasin bilong mekim nogut long ol arapela manmeri, em i sin long ai bilong Bikpela na long ai bilong ol manmeri. 
Ol kain kain gavman i save bihainim ol pasin i no stret na pasin bilong hambak na pasin bilong stil. Olsem na wanpela lain i save holim gavman nau, na tumora narapela lain i kisim ples bilong ol. 
Ol manmeri i kamap long graun tasol. Ol i samting nating. Olsem na ol i no ken apim nem bilong ol yet. Taim ol i stap laip yet, mak bilong dai i stap pinis long ol. 
Bikpela sik inap winim dokta wantaim marasin bilong em. 
Maski yu stap king nau, tumora yu inap i dai. Taim ol manmeri i dai pinis, ol snek na lang na binatang bai i lukautim ol. 
Ol manmeri bilong mekim pasin hambak, ol i save lusim Bikpela. Long bel bilong ol, ol i no save tingting moa long God. 
Sin yet i kamapim pasin hambak. Na ol manmeri i pas long sin, ol i save wokim tasol olkain pasin i nogut tru. Olsem na Bikpela bai i mekim save long olkain manmeri olsem na pinisim ol. 
Bikpela i daunim pinis ol king, na em i putim ol manmeri nating long ples bilong ol. 
Bikpela i rausim ol manmeri long as ples bilong ol, na em i putim lain i no gat nem bilong senisim ol. 
Bikpela i bagarapim graun bilong ol, na em i pinisim tru ol ples bilong ol. 
Sampela lain em i rausim olgeta, na i no gat manmeri i tingim moa nem bilong ol. 
Bikpela i no bin wokim ol manmeri bilong raun, bai ol i ken hambak na ol i ken pairap long kros. 
Husat inap long kisim biknem? Ol manmeri tasol. Husat tru inap long kisim biknem? Ol manmeri i save harim tok bilong Bikpela. Husat i no inap long kisim biknem? Ol manmeri tasol. Husat i no inap long kisim biknem? Ol manmeri i save kalapim ol lo bilong God. 
Ol lain manmeri i save givim biknem long lida bilong ol. Olsem tasol Bikpela i save givim biknem long ol manmeri i bihainim tok bilong em. 
Maski ol manmeri i gat planti mani samting, na maski ol manmeri i gat biknem o i stap rabis, olgeta bai i kisim biknem, sapos ol i pret long Bikpela na i stap aninit long em. 
Em i no stret long daunim wanpela rabisman i gat gutpela save. Na em i rong long givim biknem long ol manmeri bilong mekim sin. 
Tru, ol manmeri i save givim biknem long ol bikman na hetman na jas. Tasol i no gat man o meri namel long ol bai i winim man o meri i save harim tok bilong Bikpela. 
Papa bilong haus bai i bihainim wokman i gat gutpela save. Na ol manmeri i gat gutpela tingting, bai ol i no ken sem long dispela. 
Taim yu mekim wok, maski long mauswara nabaut. Na taim yu stap rabis, maski long giaman na litimapim nem bilong yu yet. 
Ol manmeri i mekim wok na i no sot long wanpela samting, ol i winim tru ol manmeri i save mauswara na i stap hangre. 
Pikinini, sapos yu daunim yu yet, bai yu kisim gutpela nem. Na i orait long litimapim nem bilong yu yet, sapos tok bilong yu i tru. 
Husat bai i helpim ol manmeri i no save lukautim ol yet? Na husat bai i givim biknem long ol manmeri i save semim ol yet? 
Rabisman i save kisim biknem long gutpela tingting em i autim. Tasol maniman i save kisim biknem long ol samting em i holim. 
Sapos rabisman i gat biknem, orait taim em i kamap maniman, nem bilong em bai i go bikpela moa. Sapos maniman i no gat nem, orait taim em i kamap rabisman, nem bilong em bai i go lus olgeta.