SIRAK.
25.
Bel bilong mi i amamas long tripela samting. Na dispela tripela samting i gutpela tu long ai bilong Bikpela na long ai bilong ol manmeri. Pasin bilong ol brata i stap wanbel, na pasin bilong ol pren i poroman tru, na pasin bilong ol marit i sindaun gut wantaim. 
Bel bilong mi i no laik tru tripela kain manmeri. Pasin bilong ol i save mekim mi i sem nogut tru. Em rabisman i ting em i gat biknem, na maniman i save giaman, na lapun man i no gat gutpela tingting na i save brukim marit nabaut. 
Sapos yu no bungim gutpela tingting long taim yu yangpela, bai yu painim olsem wanem long taim yu kamap lapun? 
I gutpela tumas sapos man i gat waitpela gras em i gat pasin bilong skelim gut ol tingting. Na sapos ol lapun i save givim gutpela skul, em i stret olgeta. 
Em i samting tru, sapos ol lapun i gat gutpela tingting, na ol bikman i skulim gut ol manmeri long ples. 
Ol kain kain gutpela save em i bilas tru bilong ol lapun. Na ol i kisim biknem sapos ol i pret long Bikpela na i stap aninit long em. 
10-pela samting i save mekim bel bilong mi i amamas, tasol wanpela bilong ol i mekim mi i amamas moa yet, na bai mi tokaut strong long en. Ol 10-pela i olsem. Ol manmeri i amamas long ol pikinini bilong ol, ol manmeri i laikim ol birua bilong ol i kisim bagarap, 
ol manmeri i amamas long meri bilong ol i gat save, ol manmeri i no autim wanpela tok kranki, ol manmeri i no bin i stap wokboi bilong ol man nogut, 
ol manmeri i amamas long ol yet i winim pinis tingting i stret, ol manmeri i autim toktok long ol manmeri i laik harim skul bilong ol, 
ol manmeri i winim pinis gutpela tingting na ol i amamas tru. Tasol ol manmeri i pret long Bikpela na i aninit em, ol i winim tru ol arapela manmeri. 
Tru tumas, pasin bilong pret long Bikpela em i win tru long olgeta samting. Na ol manmeri i bihainim dispela pasin, ol i nambawan tru. 
Mi no inap wari sapos mi gat ol kain kain hevi, tasol mi bai sori tumas sapos gutpela pren i givim baksait long mi. Maski long ol man i mekim planti pasin nogut, tasol mi bai sori tumas sapos meri bilong mi i mekim nogut long mi. 
Mi no inap wari sapos ol kain kain man i paitim mi, tasol mi bai sori tumas sapos ol birua tru i bagarapim mi. Maski ol bekim nogut i kamap long mi, tasol mi bai sori tumas sapos dispela i kam long han bilong ol birua. 
I no gat wanpela kain marasin i winim strong bilong marasin nogut bilong snek. Na i no gat kros i winim kros bilong ol birua. 
Mi inap stap wantaim laion o traipela snek, tasol mi no inap i stap wantaim meri nogut. 
Sapos meri i belhat, em i save kamap narakain, na pes bilong en i save tudak olsem weldok i kros. 
Man bilong em bai i painim kaikai long haus bilong ol wantok, na em i no inap long haitim bel nogut bilong em. 
Ol kain kain hevi ol i samting nating, tasol sori tumas sapos meri yet i kamapim wanpela hevi. Em i mas kisim stret pe bilong ol manmeri bilong mekim sin. 
I hat tumas long lapun man i wokabaut i go antap long maunten wesan. Olsem tasol, i hat tumas long man bilong bel isi i sindaun gut wantaim meri i save bikmaus. 
Lukaut, nogut naispela pes bilong meri i paulim yu. Na yu no ken ting long meri i gat planti mani samting na yu mangalim em. 
Sapos meri tasol i wok na man i stap nating, bai meri i kros na bikhet, na man bilong em bai i gat sem. 
Meri nogut i save mekim man bilong en i tingting narakain na em i givim wari na bel hevi long man bilong em. Dispela meri em i no mekim man bilong en i amamas. Olsem na man bilong em bai i no gat strong, na han bilong em bai i slek, na ol skru bilong em bai i guria. 
Pastaim tru wanpela meri i bin kamapim pasin bilong sin, na long dispela as yumi olgeta i mas i dai. 
Yu no ken larim wara bilong tang i ran nating. Olsem tasol yu no ken larim meri nogut i mauswara nabaut. 
Sapos em i no harim tok bilong yu, rausim em.