1-3 Ei kʉn, enim uⱡ kit mbila, mana ping nimbun kel rondpʉn, pilip mint mormin uⱡ ei, imp muⱡmin mel kapⱡa natilinga, numan ei mel pilip mint moⱡmina, mundmong ei, mi elinga, ya Atins kona ila muⱡʉmbil etpʉⱡ, tʉl nga ʉngʉn Timoti, Got nga kongun endpa, Kraist nga ik puⱡ nimba ngumba etʉm ei, enim kʉn tʉp mundʉmbʉⱡ. Kang wu ei ndi, enim tʉpa rapundpa, enim nga mondpa pili orunga, etpa ronduⱡ mundʉmba. I em ei kʉn, enim uⱡ mbun mindil onum mbila ok, mana pi nʉpeing. Enim pilik mormin ei, uⱡ mbun mindil iti mbʉ, Got elim ndi, tʉn wamp pora kandʉp tʉmin nimba pʉtʉm mel, tʉtmʉn. 4 Tʉn enim kʉn, rʉp ropʉn murmʉn ei kʉn, tʉn mondpa pili wamp mbʉ pora, uⱡ mbun mindil iti mat, wote kandʉp timin nitmin ni mel ku, akup uⱡ mbun mindil iti mbʉ kandʉp tʉnmʉn. 5 Ei nga pilip kʉn, akup na ndi, Timoti tʉp mundʉr. Na enim nga mondpa pili orunga etʉk mormin mel nant nda nʉmp, Timoti tʉp mundʉr. Ei nambuⱡ emel, enim Seitan ndi, enim oⱡa tʉpa, kandpa em ndam, tʉn nga unt, enim kʉn kongun etʉp itmin uⱡ nimbʉ, wei nʉwʉ itmʉn mel pemba.

6 Wote, akup Timoti, tʉl kʉn yant omba, Rʉnang Ik Kai mat, enim nga mondpa pili orunga, wamp numan ngui uⱡ ei nga etmin ei mel, tʉl kundpa nʉm. Wote enim ndi, tʉl kʉn numan kai pendʉk, aldpa kʉnamin, ka nʉk etʉng mbʉ mel, tʉl enim kʉn i ku nʉmp pʉtʉmbʉⱡ. 7-8 Ei angmʉn, tʉl nga mindil nui uⱡ mbʉ tʉtʉmbʉⱡ ei kʉn, enim nga uⱡ kai etmin timan ei pilimbuⱡa, tʉl ronduⱡ minal ngorum. Enim nga mondpa pili uⱡ ei ndi, tʉl etpa ronduⱡ mundrum, ei mel, enim Nuim ei kʉn ronduⱡ puk moⱡung ndam, tʉl wamp kupa mel pep muⱡʉmbil. 9 Akup tʉn, Got nga kuimp keta ila, enim kʉn numan mam ti elinga, Got kʉn angge nʉnmʉn. 10 Rumbuldi rʉnggilmʉ mbila rʉk rʉk, Got kʉn atinga ronduⱡ mondʉp ropʉn, tʉn kopʉt wak rangga, enim kʉn ombun moⱡpʉn, ik rungʉndpʉn enim nga mondpa pili ei, ronduⱡ pi napʉm ndam, etʉp ronduⱡ mundamin nʉmp ninmin. 11 Tʉn numan pʉnmʉn ei, Got Tipam elim kʉn, Nuim Jisas kʉn nombuⱡa mam ti, enim kʉn uimin ei nga tʉpa tiyangga! 12 Tʉn nga wamp numan ngui uⱡ ei, enim kanmʉn ei mel, enim nga orunga, Nuim ei ndi, i ku etangga! Wote, enim kʉn tepa mba, wamp muⱡ kʉmp kona mormin mbila, mba tepa kapⱡa etangga. 13 Uⱡ ei etʉk itangina, Nuim ei ndi, enim nga mundmong orunga, etpa ronduⱡ mundangga, Nuim Jisas elim nga wamp wingti mbʉ kʉn, tʉnggʉt yant om ei kʉn, enim Got Tipam ei nga kuimp keta ila wamp wingti raⱡʉp muⱡmin.