5
Mondpa Pili Wamp Tʉkʉn Rupʉndʉn Ei Mel
1-2 Wu ronduⱡ mbʉ, ik mura ngui ngʉngi, wote wu mbʉ tʉkʉn, nim nga tipanʉm mel rundi. Kang wu mbʉ tʉkʉn, nim nga ʉngʉnʉl mel randkʉn. Wote, amp manʉmʉl tʉkʉn, nim nga manʉmʉl mel rundi. Amp wendʉp kʉⱡ, numan kun kai ila, nim nga amp kimʉnʉl mel rundi. 3 Amp wiya mendpʉⱡ kʉⱡ, kandkʉn tʉkʉn ou ndui. 4 Amp wiya ti, elim nga kangambuⱡa na mat kep, wote elim nga kangambuⱡa apʉmʉl na mat, tepa moⱡum ndam, kangambuⱡa kʉⱡ ou etʉk, wote elim nokundʉk kai iteing, wote punt mat morum nda ngok. Uⱡ i etmin ni, wu Got kandpa kai pʉtʉm. 5 Amp wiya munduⱡina ti, elim mendpʉⱡ morum ei, elim nga numan ei, Got kʉn tepa omba, rumbuldi rʉnggilmʉ raⱡ rʉk rʉk, Got kʉn atinga ropa, elim tʉpa rʉpʉndangga nʉtʉm. 6 Wote, amp wiya ti, elim mʉi kona uⱡ mbʉ nga ambuⱡpa paⱡpa andrʉm ni, min orunga korum. 7 Amp kʉⱡ, ya man ik kʉⱡ nʉk ngana, wote wamp mbʉ ndi kandʉk, ⱡawa mundi nʉmʉndeing. 8 Wamp ti, elim nga wamp mema kan ti, rʉp etpa kai iti natʉm ndam, wamp ei nga mondpa pili ti mon. Ei wamp ekit orunga iti natʉtmʉn ei mel etʉm. 9-10 Amp wiya nga mbi rok, mana nduin rʉⱡaip ila, amp ya i etpa, mat nga mint rok mana ndui. Amp ei, pana 60 ndi oⱡa ndupa, wu tenda ti mint purum. Uⱡ kai mat mint etpa, elim nga kangambuⱡa mbʉ, rʉp etpa kai mondrum. Omba wamp tʉma ong mbʉ, rawe etpa tʉpa, kongun etpa wamp mbʉ, tʉpa rapundupa, Got nga kongun wu mbʉ, kʉmp ⱡumʉi rondpa, wote wamp mong tʉk mormin mbʉ, tʉpa rapundpa etʉm amp ei nga mbi rui!
11-12 Wote, kang amp ti, wiya moⱡum ndam, mbi rok mana ndui nʉndi! Amp ei, elim wu kont nga puⱡmba nimba pilim ei ndi, Kraist tʉpa mbuⱡ ngumba, Nuim pep ruimp nimba, nimba mʉi rormʉn ik ni, wak romba uⱡ ei ndi, ⱡawa mba. 13 Uⱡ ti, wamp kʉⱡ enimp mondʉk, wote wamp manga mbila ʉlinga rok, enimp mendpʉⱡ mondʉk, uⱡ ti, ik kunt rok, ik na mat nandilina mbʉ, nʉk etmin. 14 Wote, ei nga na pʉnt ei, kang amp wiya kʉⱡ wu puk, kangambuⱡa mek, wote enim nga mang kona kongun mbʉ etʉk, i eng uⱡ ei ndi, wu kit ei ndi, ropa mana ti natʉmba. 15 Kang amp wiya mat, Jisas wak rok, Seitan pep rormin. 16 Na ndi, enim kundʉp namp, mondpa pili amp ti nga rʉⱡaip ila, amp wiya mat moⱡʉng ndam, mondpa pili amp ei ndi, rʉp etangga. Got nga rapa tenda ila wamp kʉⱡ ndi, iteing nimba, wak rui nʉrangga! Wote, Got nga rapa tenda ila wamp mbʉ ndi, i ku etʉk, ku moni wak rok, amp wiya mat, en enim kou moⱡʉng mbʉ tʉk rʉpʉndeing.
17 Rup wu kʉⱡ kandʉk, tʉk ou nduk, rʉp minal iting ei, wu kat ronduⱡ mundʉk, Got nga rʉnang ik nʉk nguk, wote wamp ik mbo endʉk etmin wu kʉⱡ ngʉi! 18 Wote, Got nga Buk Wingti ei ndi, nimba mel,
“Nim ndi, kng kau ti, wit mong kambilpa nim nim ndum ei kʉn, keta komnga ngui ngʉngi!”
Wote ei nga,
“Rup wu ei, elim nga kongun etʉm uⱡ ila, mel kai mat tʉmba mint.” nʉtʉm.
19 Wamp nam ti ndi, rup wu ei, uⱡ ⱡawa ti, em nʉm ndam, kum ti nʉti mon! Wamp raⱡ kep, raldika kep, nʉng ndam, mint kum ti! 20 Uⱡ ⱡawa em rʉp wamp ei, wamp moⱡʉng kona mbila ik mura ngana, wamp mbʉ ndi kandʉk, mundmong iteing.
21 Got kʉn, Kraist Jisas kʉn, wote anggelo eng nui kʉⱡ nga kuimp ila moⱡʉp nim kʉn kun kondʉp nʉnt, ya ik kʉⱡ, kum tekʉn pep rui! Wote, nim nga uⱡ en mbila, wamp ti numan ngukʉn, wamp ti numan ngui nganggʉkʉn uⱡ ti, iti nʉti!
22 Got nga kongun ila wamp ti, tʉkʉrkʉn mbi rokʉn, tʉkʉn mundi nʉmʉndi! Wamp ti nga ⱡawa em ei, nim kʉn kunda, mbi kit moⱡmba ei mon! Nim nga orunga eng nomba, kai itangga muⱡi!
23 Mbo nu mendpʉⱡ nui nʉni! Nu wain kot pendkʉn nana, nim nga oⱡ ila kui petʉm mbʉ pora nangga! 24-25 Wamp mat nga uⱡ kit etmin mbʉ, wei wei etʉk kandurmin! Wote, wamp mat nga uⱡ kit etmin mbʉ, kʉni nakʉndʉrmʉn mbʉ, Got nga wamp kʉmp tʉmba uⱡ ila, unt kuimp tepa purum. Wote, wamp mat nga uⱡ kit etmin mbʉ, akil tepʉn kandurmʉn. Ni mel ku, uⱡ kai mbʉ, wei wei etʉp kandurmʉn. Wote uⱡ kai mat mo ropa petʉm mbʉ, wei wei etʉp, kʉni nakʉndʉrmʉn. Uⱡ kai mbʉ, mo rui narʉmba.