1 Tʉnggʉt kʉn, wamp ama minal ok moⱡina, kona ti nimba moⱡnga, wamp mat ndi, mat kʉmp pol mbila kambilik anggʉtʉng. Kona nila Jisas ndi, elim nga kitip kʉni wu kʉⱡ, kuimp tepa kundpa nimba mel, “Enim ndi, Perisi wamp mbʉ nga yis mbʉ, pilik tʉk mendʉk muⱡʉi! Yis nʉnt ei, ik kol uⱡ ei, kundʉp nʉnt nitim. 2 Wamp mbʉ ndi, ik nʉk, mo rok uⱡ etʉk, kambilik pendʉk mormin mbʉ, wote pena ila mot nimba. 3 Wote enim ndi, ik mat rumbuⱡ ila molk nʉng ik mbʉ, wote omba ik mat nʉng ndam, pena ila piyangga wamp mbʉ ndi, pilik kapⱡa inding. Manga ila mukʉr, ol tek nʉng ik mbʉ, tʉk peni ila pendʉk, ui rok ning,” nitim.

4 Wote Jisas ndi, wamp mbʉ kundpa nimba mel, “Enim nga kʉng kʉⱡ, wamp mat ndi, rok kunding ei nga mundmong iti nʉtʉi mon! Enim nga min ei, kunda rok kundi nʉkʉnding ei ka,” nitim. 5 Jisas ndi, nimba mel, “Enim ndi, nam nga mundmong inding ei nga, na ndi, nʉmp piral ndamp. Got nga mint mundmong indʉi! Nambuⱡ emel, Got nga rondʉⱡ ei ndi, wamp ropa kundpa, wote ndip kona tʉpa mundpa etʉm. Na ndi, enim ik kupa kundʉp nʉnt. Enim ndi, Got nga mint mundmong indʉi! 6 Enim pʉtmʉn ni ka, wamp mat ndi, ku toea raⱡ rok mundʉk, kʉi waⱡ 5 kat rarʉp rok tʉtmʉn. Ni nga, Got ndi, kʉi waⱡ ti, wak rui narʉrʉm mon ni ka! 7 Got ndi, enim wamp mbʉ nga peng ndi mbʉ, kʉmp ropa pilpa pora ndurʉm. Ei nga, enim mundmong iti nʉtʉi! Enim wamp mbʉ, Got nga kuimp keta ila wamp ingk mbʉ mormʉn,” nitim.

8 Omba Jisas ndi, wamp kʉⱡ ik mat, kundpa nimba mel, “Wamp ti ndi, anggilpa wamp mbʉ kundpa, na nga rʉⱡaip ila mor nim ndam, wote Muⱡʉl Wu Kupa ei ndi, Got nga anggelo mbʉ kʉn, uⱡ tenda ei mel ku etmba. 9 Wote, wamp ti ndi anggilpa, wamp mbʉ kundpa, na nga rʉⱡaip ila rʉk muⱡi nambʉr nim ndam, wote Muⱡʉl Wu Kupa ei ndi, Got nga anggelo mbʉ kʉn, uⱡ tenda ei mel ku etmba. 10 Wamp nam ti, Muⱡʉl Wu Kupa ei, ik mura kit mat ngum ndam, Got ndi, wamp ei nga uⱡ kit mbʉ wak rondʉmba. Wote, wamp nam ti ndi, Muⱡnga Wingti ei ik mura kit mat ngum ndam, wote Got ndi, wamp ei nga uⱡ kit mbʉ, wak rundi nandʉmba mon!

11 Ui mat kʉn, enim wamp mat ndi, mek puk atinga manga kel na, gapman kot kona mbila, muna mi ik mbo wu na mbʉ nga kuimp keta mbil angʉndʉk, enim waldʉk, ik mat nʉng ndam, enim mundmong etʉk kʉn, na namba etʉp ik mat, punt rop nimp nda nʉk, pili nʉpʉlʉi mon! 12 Ant mong ila kʉn, Muⱡnga Wingti ei ndi, ik mong mbʉ, mbo rundangga punt rokʉn nin ei ka!” nitim.

13 Wamp ou nduk, mʉk rok morʉng rʉk ting nila wu ti ndi, Jisas kundpa nimba mel, “Ik Mbo Wu ye! Na nga tipam ei, kurʉm ei nga, na nga ʉngʉn wu ei, kundʉk nana kʉn, tʉl nga tipam ei nga moiya mel tepa, purʉm mbʉ nga mat, kʉmp tʉpa, na ngangga ni!” nitim.

14 Wote Jisas ndi, wu ni punt ropa, waldpa nimba mel, “Nam ndi, na mak ropa kʉn, enmbil nga mel mbʉ, molkʉn kʉmp tindi,” nitim. 15 Jisas ndi, wamp nimbʉ, kundpa nimba mel, “Enim pilik kandʉk, kun etʉk muⱡʉi! Tʉpa kawa ndangga, enim ndi, mel elpa elpa mbʉ kandʉk, kum pindi uⱡ ila muⱡing. Nambʉⱡ emel, enim mel ou nduk, tek moⱡʉng ndam, mel mbʉ ndi, enim nga kont muⱡing uⱡ ei, kapⱡa mon,” nitim.

16-17 Jisas ndi, ik ek ti ropa, wamp mbʉ, kundpa nimba mel, “Wu ti, ku moni ambrʉm ei nga, kongʉn kona ila rʉng puⱡi, kakʉna tangga kʉn, wote wu ei, elim numan ei ndi pilpa, ‘Akup na namba uⱡ ti itimp nda nimba kʉn, na nga rʉng mbʉ, tʉp timp manga mat, mon pʉnt ei ka!

18 Akup na pʉnt uⱡ ei mel, itimp nimba kʉn, rʉng tet manga mbʉ, rokʉtʉp kʉn, manga mam mat rakʉp mondʉp mbila, wit na rʉng kai mbʉ, manga ila timp.’ 19 Wote elim ndi, nimba mel, “Na akup mel mbʉ, kapⱡa enim. Na mel kai mbʉ, tʉp tep moⱡʉp pamba mba, pana ou ndupa omba mba. Akup na rʉk rʉk rʉng nomp, nu kai kandʉp, muⱡ tʉp ambuⱡʉp paⱡʉp, wei muⱡimp ei ka!’ ” nitim.

20 Wote Got ndi, wu ni, kundpa nimba mel, ‘Nim wu wʉlʉ purʉm ti kant. Akup rumbʉⱡ ila mint nim kun ndam. ‘Wote, nim nga mel tekʉn morʉn mbʉ, wamp nam ti tʉmba nda?’

21 Wote Jisas ndi, nimba mel, “Wu mat ndi, mel ou ndupa mbʉ, tʉk mʉk rok molk, wote Got nga kuimp keta ila, wamp kurpa ralk muⱡing,” nitim.

22 Wote Jisas ndi, elim nga kitip kʉni wu ni kʉⱡ, kundpa nimba mel, “Na ndi, ik kʉⱡ nʉnt. Enim nga kʉng orunga, namba rʉng mat nombʉn, muⱡ mat raⱡpʉn itmin nda nʉk, kel rondʉk numan ou ndupa, pili nʉpʉlʉi mon! 23 Kont mba mul uⱡ ei uⱡ rondʉⱡ, wote rʉng mbʉ kʉn kapⱡa mon! Wote, kʉng kʉⱡ nga ronduⱡ ei kʉn, muⱡ mbaⱡ mbʉ nga rondʉⱡ ei, kapⱡa mon! 24 Enim kʉi mbʉ kʉnʉiya! Kongʉn etʉk rʉng mat rʉⱡi nakʉrmin ku. Wote, rʉng manga mat rʉki nakʉrmin ku. Wote kʉi mbʉ, Got ndi, rʉng ngurʉm ila nok andʉrmin. Enim wamp mbʉ, kʉi mbʉ mel kapⱡa mon ei ka! 25 Wote, enim kʉⱡ nga ti ndi, numan rondʉⱡ kat pilpa kʉn, na pana ralt moⱡʉp mint, mbi nimba pʉtʉm uⱡ ei, kapⱡa mon! 26 Uⱡ kel ei, nim kapⱡa iti nʉtʉn. Ei nga wote, enim mel elpa mat nga nambuⱡ emel, numan ou nduk pʉtmʉn?

27 Enim ndi, plawa kuk kʉⱡ kandʉrmin ei, etpa oⱡa orʉm mel nant? Wote, plawa kuk mbʉ ndi, kongun iti natʉk muⱡ mbal namba iti natʉtmʉn ni ka! Ei nga, na enim kundʉp nʉnt. Unt king Solomon ndi moⱡpa, elim nga kʉng orunga, muⱡ minal tepa, moke kai mat itim. Wote, plawa kuk ei nga eng norum uⱡ ei ndi, king Solomon nga moke itim uⱡ ei, mana ndurʉm. 28 Akup nga plawa kʉⱡ, mʉi ila kuk ropa, eng nomba morʉm. Utʉma oⱡa ila, tepa mana pangga, tʉk ndip kʉⱡing. Plawa mel roldʉnga kʉⱡ, Got ndi, ou ndurʉm ndam, wote enim wamp mbʉ, mundpa kel mba nda ei! Enim wamp mbʉ nga mondpa pili mel wei etpa petʉm. 29 Uⱡ ei nga, enim ndi, kʉⱡ keⱡ numan pilik kʉn, namba rʉng na, nu na mat nuimin ndam, nʉk pili nʉpʉlʉi, mon! 30 Mbo wamp mbʉ, mel mbʉ nga mint pilik keⱡ rondʉrmin. Wote, enim nga Tipam Got ei ndi, enim nga ting mel mbʉ, pilpa pora ndurʉm. 31 Wote enim ndi, Got nga wamp tʉpa mumʉk rui uⱡ ei tʉk, kuimbal mundʉng ndam, Got ndi, mel mbʉ pora, enim ngumba mint,” nitim.

32 Jisas ndi, wamp mbʉ kundpa nimba mel, “Enim wamp rʉⱡaip kel kʉⱡ, mundmong iti nʉtʉi! Nambuⱡ emel, enim nga Tipam ei ndi, nimba pora ndupa kʉn, Got nga wamp tʉpa mumʉk rui uⱡ ei, enim nguimp nitim. 33 Enim nga mel tek moⱡʉng mbʉ, rarʉp rok, ku tʉk, wote ku moni mbʉ tʉk, wamp kurpa moⱡʉng mbʉ, tʉk rapʉndʉk ngʉi! Ku moni wal rondʉⱡ kat kit muⱡi nambʉrʉm kʉⱡ ila mel kai mbʉ, tʉk wal rok, wi muⱡ kona ila tiyʉi! Kona ila wu raⱡ rui narʉmba, kindʉp nok ti nʉting, tʉtʉp ropa uⱡ ti, iti natʉmba. 34 Enim nga mel kai mbʉ, teng kona ila wote, enim nga mundmong ei kunda temba,” nitim.

35 Jisas ndi, wamp mbʉ kundpa, nimba mel, “Enim nga muⱡ mbal mbʉ tʉk, gi nduk ralk, lam kiya mbʉ, anmbil nangga. Tʉk kun etʉk muⱡʉi! 36 Enim nokʉndʉk muⱡing uⱡ ei, wu nuim na ti, kang amp tʉk etmin ila mba, rʉng nomba moⱡpa, wote yant omba, manga kumba roⱡnga kʉn, kongun wu kʉⱡ ndi molk, tʉkrʉk ok, manga kumba tʉtmʉn uⱡ ei mel. 37 Wote, wu nuim ei, omba kandrʉm mel, kongʉn wu kʉⱡ ur pi napʉk mormin kʉⱡ, ambulk palk muⱡeing. Na ndi, enim ik kupa kat kundʉp nʉnt. Wu nuim ei, elim nga muⱡ mbal ei, tʉpa gi ndupa raⱡpa, wamp mbʉ, rat puⱡ ila, muⱡʉi nimba. Wote elim ndi, wamp mbʉ, rʉng ngumba ei nga nu kundpa moⱡmba. 38 Wote, wu nuim ei, rumbʉl rangga omba, muna ou rumbuldi omba, muna wote rang mba tangga omba, kʉnangga kongʉn wamp kat ur pi napʉk, tʉk kun etʉk moⱡʉng wamp kʉⱡ, kapⱡa ambulk palk muⱡeing. 39 Wote, enim uⱡ ti pilʉi! Manga puⱡ wamp ei ndi, kundʉp wamp ti omba, ei nga pilim ndam, elim nokundpa moⱡpa, elim nga mel mbʉ poⱡ tʉmba. 40 Uⱡ ei mel ku, enim akup tʉk kun etʉk muⱡʉi! Enim ndi, Muⱡʉl Wu Kupa ei, ui nawʉmba, rʉk pilik moⱡʉng ui tila omba,” nitim.

41 Pita ndi, Jisas ni, waldpa nimba mel, “Wu Nuim ye! Nim ik ek rokʉn nʉn ik kʉⱡ, tʉn mint kundkʉn nʉn, muna wamp mbʉ, kunda kundkʉn?” nitim.

42 Wote Jisas ndi, nimba mel, “Kongʉn wamp nam ti, elim numan kai pilpa, elim nga kongʉn ei etpa kai mondrʉm. Elim nga wu nuim ei ndi, elim to ropa mondpa kʉn, elim nga kongʉn wamp mbʉ rʉp endpa, rʉng nuing wi ei, pilpa mint, kongʉn wamp mbʉ rʉng ngumba. 43 Wote, wu nuim ei, yant omba kʉnangga kʉn, elim nga kongʉn rʉp endpa, moⱡʉm ndam, kongʉn wu ei, ambuⱡpa paⱡpa moⱡmba. 44 Na ndi, enim ik kupa kat kundʉp nʉnt. Wu nuim ei ndi, elim nga mel mbʉ pora, kongʉn wu ei ndi, rʉp itangga,” nimba. 45-46 “Wote kongʉn wu ei, elim nga numan ila keⱡ rondpa kʉn, elim nimba mel, ‘Wu nuim ei, tʉkrʉpa ui nawʉmba ei ka!’ nimba. Wote, kongʉn wamp mat, tʉmbʉⱡ ndi ropa, rʉng tem mbʉ nomba, nu nomba kupʉr ropa muⱡangga kʉn, wote wu nuim ei omba, kʉnangga kongʉn wu ei, tʉpa kun iti natʉpa moⱡʉm ndam, wu nuim ei ndi, kongʉn wu ei etpa kit mondpa, kongʉn etʉk kit mondʉrmin wamp mbʉ kʉn, tʉpa rʉp rondʉmba.

47 Kongun wu nam ti, elim nga wu nuim ei nga kongʉn endʉmba kʉⱡ, pilpa pora ndupa, wote elim tʉpa kon iti natʉpa moⱡʉm ndam, tʉmbʉⱡ ndi romba. 48 Wote, kongʉn wu nam ti ndi, elim nga wu nuim ei nga endʉmba uⱡ kʉⱡ, pili napilpa, uⱡ kit mat em ndam, elim nga wu nuim ei om ei kʉn, kongʉn wu ei, tʉmbʉⱡ wei wei etpa romba. Mel ou ndupa tʉm wamp ei ndi, mel ou ndupa, punt ropa ngumba. Wote, mel ou ndupa, minal tʉm wamp ei ndi, to ei mel ku, punt ropa ngomba,” nitim.

49 Wote Jisas ndi, wamp mbʉ, kundpa nimba mel, “Na omp kʉn, ndip ti, mʉi kona ila rop mundʉr ei, tʉkrʉpa ndip nangga nʉmp pʉnt. 50 Na nu ti, mel ku timp ei, ti natʉp mor ei nga numan ei mbun enim. 51 Enim ndi, pilik kʉn, na ya mʉi kona ila mana ur ei, wamp nga moⱡpa kundi uⱡ ei, mep ui nʉwʉr! Na ndi, enim kundʉp nʉnt. Na omp wamp rʉⱡaip mbʉ, tʉp elpa elpa mundimp ei nga ur. 52 Akup ei kʉn, wote kunda ku, wamp mbʉ, paip kat manga tenda ila petmin ndam, raⱡ int tanggila, raldika yant tangina, el puⱡa wamp ralk muⱡing. 53 Wamp oi rok muⱡing ei mel, tipam kangʉm raⱡ, el puⱡa wamp mel muⱡʉnggil. Mam mbuⱡam raⱡ, el puⱡa wamp mel muⱡʉnggil. Apʉm apʉm raⱡ, el puⱡa wamp mel muⱡʉnggil,” nitim.

54 Wote ni kʉn, Jisas ndi, wamp rʉⱡaip mam ti morʉng ila, kundpa nimba mel, “Enim ndi, wʉl ant ei, mana purʉm orunga, kona kopa kʉⱡ kandʉk kʉn, kona ndamʉng romba nʉtmin ei, kopa kona rorʉm. 55 Wote enim ndi, molk kandʉk pilik kʉn, kona ant ei, al orʉnga rondʉⱡ mundpa oⱡa onʉm ei, ant mba nʉtmin ei, kopa kona ant purʉm. 56 Enim ndi, uⱡ kandʉk nʉtmin kʉⱡ, enim wamp ik kol rormin ei ka! Enim ndi, muⱡ mʉi raⱡ ila oⱡa orʉm uⱡ kʉⱡ, kandʉk pilik kʉmp tʉtmʉn. Enim nambuⱡ emel, akup ui ila nga uⱡ, enim kʉⱡ pilik kandʉk, kʉmp ti natʉtmʉn,” nitim.

57 Wote Jisas ndi, wamp mbʉ, kundpa nimba mel, “Nambuⱡ emel, en enim ndi, uⱡ kun mbʉ kʉmp tʉk, pilik kai etʉk, kʉni nakʉndʉrmin. 58-59 Wamp nam ti ndi, nim kot indimp nim wamp ei kʉn, rʉp rokʉⱡ, nombuⱡa mam ila pukʉⱡ kʉn, mana nʉkʉⱡ kun mundi! Tʉpa kawa ndangga wamp ei ndi, nim mepa mba, kʉmp tʉmba pʉtmʉn wu kʉⱡ ngangga! Wu kʉⱡ ndi, nim mek puk, el wu kʉⱡ ngangina, wote el wu kʉⱡ ndi, nim mek puk, kan ngangina ila pekʉn molkʉn kʉn, nim ku moni mak rong kʉⱡ, ngʉkʉn mint, kan manga ila wak rokʉn uin,” nitim.