1 Tʉn mondpa pili ila ronduⱡ pum wamp mbʉ ndi, mondpa pili ronduⱡ pi napʉm wamp mbʉ nga mbun tʉng uⱡ mbʉ, tʉp rʉpʉndamin! Tʉn nga orunga mendpʉⱡ pili nʉpʉlmʉn mon! 2 Tʉn nga angmʉn mbʉ, etpʉn numan kai pindamina, en enim nga mondpa pili orunga etʉp, ronduⱡ mundmin. 3 Tʉn pʉtmin ni, Kraist ndi, el elim nga orunga mendpʉⱡ pili nʉpʉtʉm mon. Wote, Buk Wingti ei ndi, nimba mel,

4 Unt Buk Wingti ila rorung ik mbʉ ndi, tʉn wamp mbʉ, mbo inding pilik rorung. Buk Wingti ei ndi, tʉn etpa numan orunga ronduⱡ mundpa elinga, Got ndi, tʉn wote etpa rukʉr tʉmba ei nga, ronduⱡ mundpʉn nokundpʉn muⱡmin.

5 Tʉn nga ronduⱡ ei, Got tenda ei kʉn tʉtmin, wote elim ndi ku, tʉn nga numan orunga tʉpa tenda etpa ronduⱡ munduⱡnga mormun. Ei kʉn, Got ndi, akup enim tʉpa rʉpʉndangga kʉn, Kraist Jisas nga uⱡ itim mbʉ mel, pep rok etʉk, numan tenda ei mint pilik muⱡeing. 6 Ei mel, etʉk molk kʉn, enim numan tenda pilik, keta tenda pangga, Got nga mbi paka rundʉi! Ei elim Got, wote tʉn nga Nuim Jisas Kraist nga Tipam ei.

7 Kraist ndi, tʉn wamp mbʉ pora, numan ngumba etpa, elim kʉn rukʉr tʉpa, Got mbi ou ngurum. Ei mel ku, enim ndi, ʉngʉnʉl mat, numan nguk rukʉr tʉk numan tenda mundʉk muⱡʉi! 8 Ei kʉn, na ndi, enim kundʉp nʉnt! Kraist unt kont moⱡpa, kongun itim uⱡ mbʉ, Jura wamp kʉⱡ nga nindpa itim. Uⱡ ora ndurum ei, Got ndi, unt anda kouwʉmʉn kʉⱡ kʉn, mʉi ropa nitim ik mbʉ, wak rui narʉpa, ambuⱡpa oⱡnga, Kraist ndi, etpa kupa inditim. 9 Wote, wamp rʉⱡaip elpa mbʉ, Got wamp kont kurum ei nga, mbi paka rundeing nimba, etpa kapⱡa inditim ku. Uⱡ ei nga, Buk Wingti ei ndi, ei mel nʉtʉm,

10 Aldpa, Buk Wingti ila nimba mel,

11 Aldpa, Buk Wingti ruk ting tila, nimba mel,

12 Wote aldpa, painui wu Aisaiya ndi, nimba mel,

13 Got kʉn muⱡmin nimbun nokʉndʉrmin uⱡ ei nga puⱡ ei, Got elim morum. Wote elim mondʉk pʉtmin uⱡ ei ndi, enim etpa numan wang ndangga, ambulk palk muⱡeing. I etʉk kʉn, wote Muⱡnga Wingti nga ronduⱡ ila, enim muⱡ kona timin nʉk mondʉk pʉtmin numan ei, etpa ronduⱡ mundangga!

14 Na nga angmʉn! Na nga numan ei ndi, kupa pʉnt ei, enim uⱡ kai mbʉ etʉk mormin. Enim numan mbo kai tek mormin ei ndi, wamp mat mbo inding ei nga kapⱡa mormin. 15 Wote, ya mon runt ila, uⱡ mat ila na ik ronduⱡ mundʉp nint. Ei nambuⱡ emel, Got nga wamp pol ti uⱡ ei, na ngurum. Ei unt nit ik mbʉ nga, wote aldpa enim nʉmp ndoimp rondunt ku. 16 Na ik ronduⱡ mundʉp nint uⱡ ei, nambuⱡ emel, na Got ndi, etpa rukʉr tʉpa kʉn, Kraist Jisas nga kongun wu moⱡʉp, wamp rʉⱡaip elpa mbʉ kʉn, kongun iteimp nimba, Got ndi, na rukʉr titim. Ei nga, na ik ronduⱡ mundʉp nʉt. Got nga Rʉnang Ik Kai, na kʉn oⱡnga pilip tʉp, wote wu pris mel moⱡʉp, ik puⱡ mbʉ nʉndʉt. Uⱡ ei etʉp kʉn, wamp rʉⱡaip elpa mbʉ, Muⱡnga Wingti ei ndi, etpa kun kai mundangga, angge nʉk mel kai, Got mbʉ ndi, numan ngumba titim ni mel, wamp kʉⱡ kʉn ei mel ku itangga!

17 Ei nga, na kongun et ei, Kraist Jisas kʉn kunda etʉmbʉⱡ. Got nga kongun ei, na endʉt ei nga, na kapⱡa numan kai pilimp mint. 18 Kraist elim ndi, na nga ik nit, wote kongun kai it mbʉ, tʉpa rapundʉⱡnga, na kʉn mendpʉⱡ uⱡ itim mbʉ nga ronduⱡ mundʉp nilmba, wamp rʉⱡaip elpa mbʉ ndi, Got nga ik ei, pilik teng ndurung. 19 Wote, Muⱡnga Wingti ndi, na kʉn ronduⱡ mundpa, kongun elinga, na ronduⱡ nguⱡnga uⱡ rʉpndi mat etʉp, Kraist nga Rʉnang Ik Kai ei, Jerusalem kona ila, puⱡ mondʉp nʉmp mbo, met Ilirikum kona ila rukʉr pur. 20 Wamp ti nga manga rakʉmba pilpa, koⱡ numba tetʉm ila manga rʉkimp ei, enimp rorum. Wote, Kraist nga mbi pili napʉtmʉn kona mbila, Rʉnang Ik ei, mbo nimp ei nga numan minal ngur. 21 Ei mel ku, Buk Wingti ei ndi, nimba mel,

22 Na enim kʉn, ui ou ndupa, uimp nʉmp pʉt. Ei wote, na kongun nʉnt mbʉ ndi, imp moⱡnga, na enim kʉn uimp mel kapⱡa iti nʉtʉtʉm. 23 Ei kʉn na ndi, enim omp kʉnimp ei nga, pilmba pana ou ndupa omba purum. Wote akup, ya kona mor mbila, na nga kongun mbʉ etʉp pora ndunt. 24 Wote akup, nondpa omp kʉnimp nʉmp pʉnt. Na Spein kona ila mbi ei nga, unt enim kʉn omp, ik rungʉndʉp, ambʉⱡʉp paⱡʉp moⱡʉp, wote na mbi nʉnt kona ila, tʉk rʉpʉndangina mbi. 25 Akup mendpʉⱡ, na Jerusalem kona ila mbi, Got nga wamp mbʉ tʉp rʉpʉndimp mbi. 26 Masaroniya kʉn, Akeiya kona raⱡ, Got nga wamp mbʉ, en enim nga numan ei ndi, Got nga wamp kurpa mat, Jerusalem mormin mbʉ, tʉp rapʉndʉk, en enim nga mel mat, kʉmp tʉpʉn nguimin nʉng. 27 Ik Kupa ei, wamp kʉⱡ en enim ndi, numan kai pendʉk, uⱡ ei iting mel eng. Wote, ik ti ndi pepa kʉn, tʉk rupʉndi uⱡ eng ei, elimina mel eng. Ei nambuⱡ emel, Jura wamp kʉⱡ, Muⱡnga orunga memp tʉtmin uⱡ kʉⱡ, wamp rʉⱡaip elpa kʉⱡ kʉn kunda tʉtmin. Wote, wamp rʉⱡaip elpa kʉⱡ, en enim nga mel mbila, memp tʉtmin kʉⱡ, mek puk, Jura wamp mbʉ tʉk rʉpʉnding. 28 Wote na kongun ou ei, etʉp pendʉp, wote ku moni tindint mbʉ, wamp nʉnt mbʉ ngump pendʉp kʉn, na Spein kona ila mbi omp kʉn, enim omp kandʉp mbi. 29 Na pʉnt ei, na enim kʉn unt ei kʉn, Kraist nga memp ei na kʉn, peka ropa muⱡangga, enim kʉn uimp.

30 Angmʉn, na enim kʉn ik nʉmp piral ndup kʉn, ei mel nʉnt. Tʉn nga Nuim Jisas Kraist kʉn, wote Muⱡnga nga wamp numan ngui uⱡ ila pilik molk, na nga numan orunga pilip, Got kʉn atinga rʉk rʉk ronduⱡ ropʉn, muⱡ ti nʉtmin. 31 Atinga rok kʉn, Juriya kona ila mondpa pili nʉpili wamp mormin kʉⱡ ndi, na rok uⱡ ti iting. Ei nga, Got ndi, na rʉp itangga nʉk atinga rʉi. Wote Jerusalem mbo kongun itimp uⱡ ei, Got nga wamp mormin mbʉ ndi, na nga kongun et mbʉ kandʉk numan ngeing. 32 Wote, ei mel tangina, Got ndi, kapⱡa nim ndam, na enim kʉn numan kai pilip omp, enim kʉn ronduⱡ tʉp, muⱡ tʉp moⱡʉp mbi. 33 Numan wang ndui nga Puⱡ Wu Got ei, enim kʉn pora muⱡangga! Ei Kupa.