4
Ma or mbele mbele misambi torok fehen lakwak hishombashiowewa ma orto wutari Avui Wasilakahik nakwa ria
1 Mberem ushiwak jihi ambek ji anangriyaha ji anajindua? Mbele mbele ol ji lakwak ji hishombashiowewa ondo sunguwavu jihik li tasawak os jimu anatarihi anajinduwa. Ro 7:23 2 Jir mbele mbele misambik fehe ondon ji lakwak hishombashiowenda jir. Hako mbeek ondon landa ambu jir. Karem uwosik os jimu mbele mbele mahi yejen misokomlaka heyehe mbele mbele lihin ji lakwak awun ji uhu man mandingormenda jir. Hako mbeek ji landa ambu lir. Mberem ushiwak? Jir mbeek Avui Wasilakan silinda ambu jir. 3 Uhu os mbele mbelen ji lakwak orin ji siliwa wolo mbeek ji landa ambu sir. Mberem ushiwak? Jir men ondon ji laha sungu masi jihi os si mbawa nombo hom ji ukwak hishinda oja. Uwosik mbeek ji landa ambu lir. 4 Jir angop Avui Wasilakan halawa jir, os nokove hula sihin si hala ihi hula anandi nga si yanda hom. Hako ji misi, os mbele mbele misambi torok fehe tondon ji lakwak ji hishombashiowe nahi, wutari Avui Wasilakahik nakwa jir. Oson am jimu hishindu mo wahau? Os mbele mbele misambik fehe tondo nga ji ananaimbletolo nahi, wutari orhik nakwa jira. Ro 8:7; 1 Jn 2:15 5 Jir mberem ji hishindu? Mashi orhi os mas li kayeri oso omendinga ambu, karem jimu hishindu? Wahau, mashi oso omendinga sira. Karem li kayeri sir, �Masikome nihi or Avui Wasilaka hahanda oto ortonom nga fri likmbaha nor mbari ri. Mbeek ma anandi nga fri likmbaha nor mbari ambu ri.� Karem li kayeri sir. 6 Hako Avui Wasilaka nirin or jelyashinak avak mbele mbele ol nirin uwak orin ni halahanda ondo nga ni anajihi ni tukrukwa lir, os jekamba orhik karem li kayehendari hom,
�Ma ol lihinjik shisharmblaha mba, �An aninjik a undahi nir,� karem mbawa ma ondo Avui Wasilaka mbeek or jelyakwa ambu lir. Hako ma ol lihinjik hafakaha Avui Wasilaka lirin or jelyakwak hishiwa ondo avak or jelyakwa lira.� Gutpela Sindaun 3:34 1 Pi 5:5
7 Uwosik jir jihinjik orhi siyok ji sihi os or mbawa hom ji uka. Unak Laulaka os jirin or oweioweiheye nahi, wahau, karem ji mbaha ji mblarnashinak or tulu ika. Ef 6:12 8 Jir avak Avui Wasilakahi kumbamuk ji sika. Unak or jir nga or sika. Jir kavakavan unda ma jirin ji misi, sunguwavu jihin os tavan ji yokonda hom ji yokoshinak jivik si naka. Jir wavu frijip frijip hishinda ma jirin ji misi, wavu os erem ji hishinda wavu oson ji laha ermbeka. Ais 1:16; Sek 1:3; Mal 3:7 9 Uhu os ji hayimbayihi rupkapshinda jihi oson ji halaka. Hako mbele mbele kavakava ol ji undan ji heyehe ji tlaholoka. 10 Os jihinjik ji hafakaha ji mba, �An mbeek anhinjik jivik a nandahi ambu nir,� karem ji mba nahi, Avui Wasilaka avak jirin jelyakwa ri. Jop 5:11; 1 Pi 5:6
Nir avak Avui Wasilakahi farniyik ni sihi hulaima nokopman ni kotim uwa hala
11-12 Jisasin hishindiyanda ma jirin, jir avak Avui Wasilaka ma mbele mbele ol li undan or heyembawa hom jihi ambek erem ji uwa hala. Mberem ushiwak? Avui Wasilaka orto nom hulaima nokopma mbele mbele ol li undan or heyembakwa ria. Kumak orto nom ma lar or heyehe mba, �Mir ermba ermbak linda oson lakwa mir.� Uhu ma anandin or heyehe or mba, �Mir yanga kava indingok ikwa mir.� Karem mbakwa ri. Hako jir mberem ji hishindu? Orhi farniyik ji sikwak jimu hishindu? Uhu or heyembanda hom ma anandin jimu heyembandu? Os erem ji u nahi, lo orhi os or mbari oson os jimu mblarna ermbenduwa. Uhu jir mbeek lo orhi siyok siwa ambu jir, wahau. Men orhi farniyik ji sikwak jimu mbanduwa. Hako os erem ji unda oso mbeek kas tolowa ambu sir. Karem uwosik oso nombon er ji halaka. Ro 2:1; 14:4
Mbele mbele ol ni ukwak ni hishiwa ondo Avui Wasilakahi tavarenjek ni haka
13 Ji misi, jir lal karem mbanda jir, �Avak kuyanga lasik a ihi asama namtar ya newen orok a lakwa nir. Uhu avak ya musha mendek a lakwa nir.� Lk 12:18-20 14 Hako jir mbeek mbele las os ushok talakwan heyenda ambu jir, wahau. Jir mberem nanda ma jir? Jir men misambik fehe ma jir. Uwosik mbeek nambek liyakwa ambu jir. Misambi torok ji liyawa wolo hikrisha hom nanda jir. Kandakar nom si rasawak ni heyewak lewas mendek nanda sir. Sng 39:5,11; Snd 27:1 15 Hako karem ji mbaka, �Wasilaka wavu orhi sir, os misambi torok ni lihi lerawun ni lakmbaha nor mbahanda nahi, nimu likuwa. Uhu mbele las ni ukmbaha ni hishiwan nimu ukuwa.� Karem ji mbaka. 16 Hako jir mbeek erem mbanda ambu jir, wahau. Jir men hi jihin ji hauowehe mbele mbele os ji ukwak ji hishiwa oso nom mbanda jir. Os erem ji uwa oso mbeek jivik nawa ambu sir, wahau.
17 Armek ji hishika. Mbele mbele jivi os Avui Wasilaka ji ukmbaha nor mbari angop ji misiri sir. Hako os ji ukmbaha nor mbahandan ji u nahi ambu, os jimu mashi orhin mblarnanduwa. Lk 12:47