1 Idim kakarge able Sabad idimge, keubu ya lim wateupumada, Maria Magdalalam bakiamuda able bakir kurge ege terdari bakir adem ikadarda able bakir kurlam. 2 Ege eudige korider emrida Simona Peteruim a nerut memegle ge Iesude abim lag ikerer. E Bakiamuda yabi daratagri, “Wi Ople adem ikadarda bakir kurlam a mi nole umerkak wi abi nade ikedidarda!” 3-4 Ege Peteru a nerut memegle Mariai dikairtiei a wige korider emridariei bakir kurem. Able nerut memegle korider emrida baka kikem bakir kurge ableglam e au korider korider dawer Peteruim. 5 E bakiamuda aparsirer a deketrer able bakir kurge. Ege eudige erdari piripiri wali ipereder ege nole bakiamuda muiem badari. 6-7 Simona Peteru keubu baka ge teosmeda a keko bakiamuda bakir kurge muiem badari. E ko terdari able piripiri wali ge tipereder, a able wali pa ikeredi ge Iesui kirimge erpeder. Able wali ge tabara ipereder wader walilam ege no tababu able utebge batrata. 8 Ega able nerut memegle, ge korider emrida bakiamuda kikem bakir kurge, bakiamuda bakir kurge badari. E bakiamuda able lu erdari a ege umele baida. 9 Wi mena umerkak daralei yabi idonige nole zogoziawalira mir ikereder, ge ke detauter Iesui yako eudlam wekiam. 10 Wige able memegle ko akomedariei gedim.

19 Able Sabad kige, memegle okakise etami. Te ge eimireimir nagriweretlare ableglam wi geumge bakerer Iudaia kerimlelam. Ege Iesu tabakiamuda yabidoge eipuge ekweidari. Eudige yabi able miru daratagerda, “Mapodan wabim.” 20 E akaida yabi tabara tag a bir natomereta. Ege memegle au sererge baprekerda nade ge wi Oplei erdarda. 21 Ege Iesu ga ko akaidari yabi daratagerda, “Mapodan wabim. Ka wabi damarkare mokakalam ge Babide kari taramarikda.” 22 A ga akaidari yabi daratagridare, “Wa Lamar Zogo erpeirare.” Eudige yabidoge wag emariklu. 23 Nalu wit wa lelam ya natkilare ei obatkilare; nalu wit wa ya lera daraudaglare yabidoge wi mena ya wanagri.

24 Netat le 12 memeglelam, abra nei dikereder Tomas (abra nerut nei wadikeredi Okak Aosmele) nole ge yabidoge dawer nadege Iesu tabakiamuda yabim. 25 Nade ge wader memeglegize abi detagerda, “Ki Oplei erdarda!”, Tomaside eudige yabi nakerda, “Kara nole oka emari able mirge. Ese ka able nilar dub dasmere abi tage a ka kara tagpim amariklu abi dubge, a kara tag datware abi birge, ka yaka kara oka amariklu able mirge.” 26 8 gerger barukdarda able memegle ge ko metage etami, able kerkerge Tomasge yabidoge dawer. Te ge aumiraumir nagriweretlare ege Iesu ga tabakiamuda yabidoge ekweidari, a able miru ga yabi daratagerda “Mapodan wabim.” 27 A keubu ga akaida Tomasi ikaidari, “Ma mara tagpim ge darazirik: ma darasmer kara tag pe nakeredi. A mara tag titrimurik a ikai kari birge dazirik. Ma nole owaturkak nawa, ma no mara oka karidoge emari.” 28 Tomaside eudige abi ikaidari, “Kara Ople a kara Agud!” 29 Ege Iesu eudige akaida abi ikaidari, “Ma mara oka ikaida karidoge emarikda ableglam mama kari nardari. Na legize ya tabara oka waimarilare karidoge wi nole kari nasmerda ya au sererge waurder.” 30 Taba memegle opem Iesude ga gair wader lu ikerer ge nole bautarda muige able ziawalige. 31 Agekar, able lu ge bautarda ya waiakai waba idid wanagri muige Iesui doge nade waba oka waimari Iesui doge e dali Keriso, Agudira Werem.