1 Zonara sir dormeida able luglam a weku abra barki. 2 E eudi erkepasameida, “Ople, ka nole detauti nade ka mena gedge nawer? Ableglam ka dudumge badmirikda Tasisem. Ka umele nawer mama debe tonartonar a au omaromar Ad nali, wapum lidagebge a au degdeg mara lag ike leem a able Ad ma nali ma nole lagkak le detko. 3 “Pe irdi, Ople, kara eded adem ikao, karim dike ka sikak nawer eud a nole eded. 4 Oplelut abi tiditagri, “Nako marim sikak dike ma wekuge nawer?” 5 Zona eosmeda bakiamuda emrida naiger pekge Ninebelam. E mud tabara diuri a able mudge emrida, dikairi nalu ia wakaida Ninebeem. 6 Oplede arpomerarpomer luneg ikaida omeida a Zonai kebikebi mud kirmem ikwari waiakaida abra sagim ko adem wadami a Zonara eudi serer barki able lunegem. 7 Mabekmabek nerut gergerge, Adi mirge ukide able luneg irwi a ipiti. 8 Nade lim ga teupamada Adide urweriurweri naiger wag temarikda a able limira urweri Zonai kirimge emriri abi ikaida abra erkepinor barki. Zona laglag weumida ege eudi able mir detauti, “E au sikak ia wadike karim ka naumilu a nole idid nawer.” 9 Ege Adide Zonai detagri kega, “Nalu sasrim pe mara dike ko ma able luneg wekuge akai”? Zonade abi detagri, “Kara sasrim nagri wekuem able korepge ka umele naumilu.” 10 Oplede abi detagri, “Able luneg omeida netat kige a eumida nerut kige a mara pe abim omar barukli; ma nole netat lu abim ikaida ko abi waikaida waomeida! 11 “Epe Ninebera ebur a pako 120,000em le ko duridli, able le pe nole mamoser umele uridli debele adudlam. Ei kara nole ia nas obaruk Ninebeem able au utebem?”