1 Abele kerker kotor baselaia abkoreb ten gaire neur, uiaba ais uiaba lamepa, a uiaba bakeuare obapit abele le kerkar kosker ispid.

2 A uiaba faif neur pardali nagri, a faif neur paim paim nagri.

3 Uader neur paim paim, no lamepa ais, a nole ide kak;

4 Epe uader neur pardali, uiaba tarpor ide ais kemem lamepa.

5 Ege au uapum tabarki abele le kerkar kosker ispili, epe uiaba uridili uteid uaepiti a ko uteid.

6 Eipu ki ge tabarki abele le ereretikri tabarki, Dasmer, abele le kerkar kosker ispili tabakeam, uaba bakeuare abi obapit.

7 Ege neur uridili bako, a derser uiaba lamepa.

8 Ege paim paim neur uiaba uiabi daratagerare pardali neur, Uaba keribi ikuar ide; abelelam keriba lamepa maike asameida.

9 Epe pardali neur uiabi etkalu, kega, Nole abkoreb keribim pako uabim; debele uaba bakeuare uader le lu terapei, ua ko bodomalam uiabim.

10 Uiaba bakeuare ko bodomalam, epe abele le kerkar kosker ispili tabakeam; uiaba le emetu derser uiaba barota kemem okakis abim abele leuer sererege; ege abele te dimilu.

11 Keubu uader neur ko tabakeuare, a uiaba kega, Opole ae, Opole ae, ma diski abele te keribim.

12 E uiabi etkalu, kega, Ageakar kaka uabi detager, kaka nole asmer kak uabim.

13 Peike, uaba nole ute kak, abelelam uaba umer kak abele gerger pako abele haua ge Le la Uerem tabarki.

14 Mokakalam nerute le muriz ge bakeam, E darabgerare tabara memeg le giz, E uabi ikuar abara gaire lu.

15 E ikuar nerute le faif talen, a nerute le neis, a nerute le netat, abkoreb abele gaire lu le umele; epe E bakeamulu.

16 Abele le faif talen E bakeam ko terapei, E ko nagri uader faif talen.

17 Mokakalam abele le nagri neis talen, E ko nagri uader neis talen.

18 Epe abele le nagri netat talen E bakeam a daiui abele seb, a ko ispilu abara opole ra mani.

19 Gaire ki ge eseamulu abele memeg le ra opole tabarki, a uiaba mer atager abi luglam.

20 Abele le nagri faif talen E tabakeam a ko tais uader faif talen, a abi kega, Opole ae, ma kari ikuar faif talen; dasmer, kaka ko nagri uader faif talen.

21 Abara opole abi detager, Au debele abele debe megmeg le ae, pako ageakar; ma ageakar abele uader kebi lu, kaka mari ikosi ko sirdam gaire au lu; ma tabakeam balu abele mara opole ra sererege.

22 Abele le nagri neis talen E tabakeam a abi detager, kega, Opole ae, ma kari ikuar neis talen; dasmer, kaka nagri uader neis talen.

23 Ege abara opole abi detager, Au debele abele debe memeg le ae, pako ageakar; ma ageakar uader kebi lu, kaka mari ikosi ko sirdam gaire au lu; ma tabakeam balu abele mara opole ra sererege.

24 Abele le nagri netat talen E tabakeam a abi detager, kega, Opole ae, kaka erdali mama au peper tonar le, ma ismi abele uteb ma nolea saito tigri, ma ko etami lu abele uteb ma nole depegelu:

25 Epe kaka au geum, a kaka bakeam ko ispilu mara talen abele seb ge; dasmer, mara lu ike.

26 Abara opole abi etkalu, kega, Adud memeg le ae, pako au gebgeb, ma umele kaka ismi abele uteb kaka nole saito tigri, a kaka ko etami lu abele uteb kaka nole depegelu:

27 Peike abkoreb, ese ma ikuar kara mani uader le mani terapei, iaueakai kaka tabakeam ko nagri kara lu pako abara bodomalam.

28 Dasmer, uaba tais abele talen abielam, a ko ikuar abele le nagri ten gaire talen.

29 Abelelam, ese le nagri lu, a ko ikuar abim lu, iaueakai au gaire lu abi dog: epe ese le nolea lu kak, debele ais adem abielam abele lu E nagri.

30 Uaba imud abele memeg le nole abkoreb, abele kupikupi adige, nagri au ebazuer pako tereg ikupamaretlare.

31 Ese Le la Uerem tabarki tabara zorom, pako zogo angela giz uridili kemem abi dog, epe E egimuru tabara bao zorom ge:

32 Etami abara opem gaire ged narida uridili; E nakesmulu uiabim, mokakalam le asesered mamoe, E nakesmulu nani, pako mamoe;

33 Ege ikedi mamoe abara tuter tag, a nani abara ber tag.

34 Abele Opole uiabi detager uader le abara tuter tag, Uaba tabakeuare uaba emetu kara Aba uabi ikuar debe mer, uaba uteb abele baselaia, emetu derser uabim a nole detagem abele geseb ge:

35 Abelelam kaka uererge, a uaba kari ikuar leuer kaka eroli; a kaka niap, a uaba kari ikuar ni kaka aree; a kaka supe le, a uaba kari egared:

36 Kaka nole nesur kak, a uaba kari ikuar am uali; a kaka gimgim, a uaba kari dasmer; kaka emeri abele audubare meta, a uaba tabakeuare kari dasmer.

37 Barkak tonar le giz uiaba etkalu, kega, Opole ae, na gerger keriba erdali ma uererege, a keriba mari asisiem? pako niap, a keriba mari ikuar ni ma ereri?

38 Na gerger keriba mari erdali ma supe le, a keriba mari egared? pako nole nesur kak, a keriba mari ikuar am uali?

39 Na gerger keriba mari erdali ma gimgim, pako ma emeri abele audubare meta ge, a keriba bakeuare mari dasmerare?

40 Ege Opole uiabi etkalu, kega, Ageakar kaka uabi detager, Abelelam uaba ikerare nerute le kebi kale kara keimer ike, kakanali uaba ikerare.

41 E uiabi detager uader le abara ber tag, Uaba le adud tonar, bakeuare adem karielam, abele ur niai karem, emetu derser abkoreb abele diabolo pako tabara angela giz:

42 Abelelam kaka uererege, a uaba nole kari ikuar leuer; a kaka niap, a uaba nole kari ikuar ni kaka aree:

43 Kaka sup le, a uaba nole kari egared; kaka nole nesur kak, a uaba nole kari ikuar am uali; kaka gimgim, kaka emeri abele audubare meta, uaba nole kari dasmer.

44 Ege uiaba etkalu abim, kega, Opole ae, na gerger keriba mari erdali ma uererege, pako niap, pako supe le, pako nesur kak, pako gimgim, pako emeri abele audubare meta, a keriba nole mari memege le?

45 E uiabim etkalu, kega, Ageakar kaka uabi daratagerare, Abelelam uaba nole ikerare nerute le kebi kale uiaba ike, epe kakanali uaba nole ikerare.

46 Ege uiaba bakeuare peike abele asias niai karem: epe barkak tonar le giz ko bakeuare abele eded niai karem.