1-2 Ne wengo mikiktemo kobo baabkenamabi ole kobo naka mak unang maki baabeneba i nakaia unangai alukum beteno daaye bianiba Gode baabaniba Kobo nakaia unanga isa komok sum isa eka komokwali mak isa alukum daayemale ge oha bianiba Gode gangobo galine! Nibo inamob mole ayam bianoba Gode kukubo wafu bioba naka mak unang maki nib kukubo yateniba funaniba I kukubo ayamobo ge funanomabiobe. 3 Ibo Gode nibo hengmino temo biobo dotlanebio nakae inangge ohamibo e seimbianea funanea Kukub olo ayamobo ge funamabebe. 4 E bobol temo fumbeo Nakaia unangai hengmino temo blibo ne alukum dotlaia i ne weng moton ota wente bianiba kla tekein keine ge fumbebe. 5 Niminbabe, Gode elekiem eleta binabebe. Nakaia unangai hengmino hengabib kesoa Gode makaa blib otane naka make elekiem eleta God esa nakaia unanga isa i isak daak manea baabenea Ibo teniba God esu tline ge baabenea dleb tetenanebiobe. Inanebio nakae niniino Yesus Klaist etabe. 6 Amo Gode omfakanea baanea Amo yo dim ota Yesuse dabalimo daak unamabebo genebuo tlo kesoa Yesuse daakenea atdimo kaanea nakaia unangai alukum hengmino walubenebiobe. Nibo Yesuse kukubo nanebuo kukub olo watenoba tekein kenomo! Gode bobol temo fumbeo Nakaia unangai hengmino deibueiba ne i hengmino omtlabeia i nemi aine ge fumbebe. 7 E inangge fumbe kesoa ne baatnenea Kobo moneba bib mak bib mak olo nakaia unangai Yudabai ne weng olo omkayemale ge baatnenebiobe. Ne weng olo dimbabe, bainobe. E ne nemanea monia naka mak unang maki Yudabai e moton wengo aleye bia i e weng ayam olo wenteniba bainobo genomabiobe.

8 Ne bobol temo fumbio bib mak bib mak seli nakai alukum i kweilono tebehaniba beten kebianiba Gode bobolo fumbianiba kining bianiba atliyemina dleb wenga o deiboniba klayam bianiba beten kemine gabibe.

9 Ne unang ibsa baabenamabi ole ibo youm ayamo waloniba kimibo bayota kibianibte! Ibo mo funanibta Ninita ye biob ese genibta gabamano eito mo kiwe bianiba eka gol osa bukubsan osa ayam ayamo mo kibianiba eka youm ayam ayamo moni sumo homono mo walo kibiam namibe! 10 Ina otane unangi Ni Gode wengo wafu biobobo gabib mole okoko ayam okok bianiba naka mak unang maki daabeine! Kukub ayam olo i makob youm ayamo kimomabiobe.

11-12 Ne unang ibo oye biania Ibo Gode wengo nakai mo aleye bianibta omkayemibe ge oyebibe. Ibo kimik gebianiba nakai Gode wengo ibo omkayebibo wente bianiba weng olo kla funine! 13 Niminbabe, Gode Adame sin klaneta Ifo mit klananebio kesotabe. 14 Eka Gululame Adame dim omin wengo mo baabaneta bainobo geim blimobe. E Adame alel ota dim omin wengo baabonea o bainobo genota Gode wengo welanobiobe. 15 Otane unang ile meme ita yomiobe. I ina bianiba Gode bainobo gabianiba naka mak unang maki gobe bianiba daaye bianiba i bobol temo kining aniba kukubo fiab nimibo Gode i daayemabebe.