22
Anianina Ananina
(Luke 14:15-24)
1 Iesu kadu aitam vona tana‑minikuna wayahina tomotau ipupuei. 2 Ivona,
“Yaubada ya pai veimea taina deina. Aitam kiniV mamaei, ka natuna onotona anianina nau‑vevewanei ya tavine wayahina. 3 Ka kini‑nanaV tauna ya tau paisewa vi‑tune‑neiei, ine aviyaivia ya nuanua mataedai vi‑aniani wayahina. E ya tau paisewa itauya iomo tomotau‑naia wayahia, kate tomotaui, avaha kini‑nanaV ya tuyeha inononi, didikuna ivihahaiei.
4 Ka kini‑nanaV, avaha yai dewaia anamanei, tau paisewa tupwai kadu vi‑tunei, ine, e imataedai havine deina. ‘Yami kiniV anꞌ aniani avaha vo‑vi‑aiaia, potapotami, kadu ya bulumakauV anani ka bulumakauV binabinai avaha vunu‑neiei, ka vahitau habuhabuna deina. Ka tauna vonevonemi, “Unꞌ‑omo natu ya tavine anianina wayahina, kanꞌ‑am, e kadewa‑haiawa.” ’
5 Kate tomotaui kadu mataedana ivihahaiei, eha itꞌ‑omo. Ka tupwai imaꞌ‑kavokavovo, ka tupwai ine yai baguna wayahia, kadu tupwai mani paisewa idedewei, aviani taui yai nuanua. 6 Ka tomotaui tupwai kini‑nanaV ya tau paisewa ipoyꞌ‑avini, ivunu‑neiei, inau‑vi‑anigi.✡ Mat 21:35.
7 Ka tutana kini‑nanaV dewaia tanoi vaneana nononi, tauna nua‑goyo ani‑vainena, ka ya tau nau‑havia vi‑tune‑neiei ine, e taui tau nau‑vi‑aniga‑naia imutu‑neiei, ka yai meagai itunu‑anai akanai.
8 Ka kini‑nanaV ya tau paisewa honei iomo, e vonei, ivona, ‘Tavine anianina avaha vo‑vi‑aiaina mamaei, kate tomotau‑naia naona amataedai, taui eha nau‑wawani inꞌ‑omo. 9 Wayahina, uneine etawana wayahia, ka avi tomotau uvaniahai uvonei inꞌ‑omo tavine anianina wayahina, inꞌ‑ania.’
10 E tau paisewa‑naia ine tomotau habuhabui ivaniahai, ivahautei, tupwai goyogoyoi, ka tupwai ahiahi. Ka tavine a manua ivi‑nau‑vi‑anai.
11 Ka kini‑nanaV omo manuana, inui, e ya nuanua tau bwanibwani dudueyei. Ka tauna onoto aitam dueyei, ka onotona eha tavine kwamana ta‑weteni. 12 Wayahina kini‑nanaV vi‑tanaiei, ivona, ‘Au niau, tavine kwamana eha eta‑weteni, wayahina koiaka awaehem baina enu‑mei?’
Ka onoto‑nana matauta nui eha ana pata kini‑nanaV ya vi‑tanai na‑nau‑pate.
13 Wayahina, kini‑nanaV tauna ya tau paisewa vonei, ivona, ‘Onoto taina upoyꞌ‑avini, e nimana ka aena uyohoyohoni, e uhaponei na‑opu novanovana nihenina, e tanoi wayahina na‑tou, na‑nua‑vita inahe wayahina.’✡ Mat 8:12; 25:30; Luk 13:28.
14 Unononi. Tomotau habuhabui Yaubada ya mataeda inononi, kate ai vi‑am wayahia nau‑wawani tauna vi‑nua‑dadanei? Eha habuhabui.”
Takesi Wayahina
(Marika 12:13-17; Luke 20:20-26)
15 Ka Parisi ine, e yai vi‑nua‑hauhau ivo‑vi‑aiaia medeina Iesu ipoyꞌ‑avini, ka ivona, “Kavi‑tanatanaiei, ka ya nau‑pata nihenina ya goyona kavaniahei.”✡ Mar 3:6. 16 Ka taui wayahia ai tau vi‑muni‑waiwai tupwai ivi‑nua‑dadanei, kadue Erodi yaiana nui ivi‑tunei iomo Iesu wayahina, e ivona, “Tau Viwavenena, avaha anamanem wamke ahiahim, kadu wamke Yaubada ya nuanua eviwavenei tunutunuhina tomotau wayahia. Kadue wamke eha tomotau yai nuanua wayahina eta‑matamatauta, iuna taui ai wava anani eha aitam aviani wayahima. 17 Wayahina, yama vi‑tanai taina enau‑pata wayahiai. Nau‑wawanika SisaV wayahina takesiV kaboui o eha?”
18 Ka Iesu avaha yai nua‑goyo anamanei, wayahina ivona, “Itomi tau vitupu. Aviani wayahina udewa‑dadana unau‑daeu? 19 Akanai, aitam kina takesinaV wayahina uomanei wayahiua adueyei.”
Ka kinana aitamoata iepe, ivenei dueyei. 20 Kadu Iesu vonei, ivona, “Kina taina hetana, koiaka mayamayauna iginumi mamaei, ka koiaka ana wava iginumi mamaei?”
21 Ka ivona, “SisaV.”
Ka Iesu nau‑patei, ivona, “Deina. Wayahina, aituhu aviani SisaV ya gugua, akanai SisaV uvenevenei, ka aituhu aviani Yaubada ya gugua, akanai Yaubada uvenevenei.”✡ Rom 13:7.
22 Ka Iesu yana vona na nua‑uyana inononi, wayahina nuai venau‑tamatamana, ka ini‑tawanei.
Yawai‑vavaha Wayahina
(Marika 12:18-27; Luke 20:27-40)
23 Ka auyewana wayahina, tupwai Sadusi iomo Iesu wayahina. Taui eha mini‑havine ita‑vitumahane, kate mini‑havine wayahina ivi‑tanaiei,✡ Dew 23:8. 24 ivona,
“Tau Viwavenena, Mosese ivona aituhu onoto awana ka eha natunatui, ka aituhu onoto‑nana aniga, munia wadaena nau‑wawani namoiana tavine, e aituhu vavinena vi‑natuna, tevanina vivane onoto aninigana natuna.✡ V.V 25:5. 25 Ka aitam onoto vavaneina ai yau 6 nui imamae, ka unu‑tauna tavine, e aniga, ka eha aitam natuna. Ka taina nepena vaneina wadaena tavinei. 26 Ka vꞌ‑inuana kadue deina, ka vꞌ‑itonuna deina ineine, e pai nau‑yehata vi‑7‑na. 27 Ka pai nau‑yehata wayahina, vavinena kadue aniga. 28 Ka mini‑havine anꞌ auyewa wayahina, yawai vovouna wayahina, ononotoi ai yau 7 wayahia, koiaka tauna awana? Iuna habuhabui itavinei.”
29 Ka Iesu ivona,
“Itomi unuanua bwagona. Iuna eha Iginuma utꞌ‑anamane, kadue eha Yaubada ya bagibagi utꞌ‑anamane. 30 Mini‑havine munia, tomotau eha itavine. Ka taui imini‑havine, yai dewa anelose wahuma aitamoata deina. 31 Ika, tau anianiga yai mini‑havine wayahina mwagemwagemi. Iuna eha Iginuma uta‑iaiava ahiahina. Unononi, Yaubada yana vona wayahimia, ivona,
32 ‘Yauke Abaraham ya Yaubada
kadu Isaki ya Yaubada
kadue Iakobo ya Yaubada.’
Ka Yaubada eha tau anianiga yai Yaubada. Tauna taui yawayawai yai Yaubada.”✡ NiT 3:6; Mat 8:11.
33 Ka tomotaui yoko nihenia ya vonana inononi, ka nuai vi‑tupatupa ya viwavenena wayahina.
Avi Veimea Ananina?
(Marika 12:28-34; Luke 10:25-28)
34 Ka Parisi yoko, avaha inononi vivane Iesu Sadusi yoko yai vi‑tanai nau‑patei ahiahina ka vane‑tawanei tomotau mataia deina, taui inau‑hohona‑havine, ka iomo Iesu wayahina. 35 Ka taui wayahia veimea a tau nua‑uya aitam omo Iesu wayahina, nuanuana aitam vi‑tanai wayahina na‑nau‑dadani. 36 Ivona, “Tau Viwavenena, veimea habuhabui wayahia, avi veimea ananina?”
37 Ka Iesu ivona, “Veimea ananina taina,
‘Yam Kauvea Yaubada evi‑ateteyei
nuam habuhabuna wayahina,
kadu ininim habuhabuna wayahina,
kadue yam nuanua habuhabuna wayahina.’✡ V.V 6:5.
38 Vonana vona ananina, kadu veimea naona. 39 Ka kadu vꞌ‑inuana taina deina, vivane,
‘Tomotau habuhabui edewa‑vidovidohei
taum nuanuam deina.’✡ Lev 19:18; Mat 7:12.
40 Veimea habuhabui ai pai mini, kadu tau apa‑taputapu yai iginuma habuhabui ai pai mini ivinꞌ‑omo veimeaia wayahina.”✡ Rom 13:10; Gal 5:14.
Davida Natuna Wayahina
(Marika 12:35-37; Luke 20:41-44)
41 Ka Parisi‑naia imimini, ka Iesu vi‑tanaiei, ivona, 42 “Medeina unuanua Tau Ito‑yavuha‑nana wayahina? Avi dede yana dede?”
Ka taui ivona, “Davida yana dede wayahina na‑omo.”✡ Ioni 7:42.
43 Ka Iesu vi‑tanaiei, ivona, “Aituhu deina, aviani wayahina Davida apa‑taputapuei Nuana Ahihinata ya bagibagi wayahina, kadue apa‑Kauveyei deina? Ivona,
44 ‘Yaubada ivona yau Kauvea wayahina, ivona,
“Ateiua emanuena a itoava am havia
aem iwaunina abouni, eveimeyei wayahina.” ’✡ Sam 110:1; Mat 26:64.
45 Aituhu Tau Ito‑yavuha vivane Davida ya Kauvea, medeina Tau Ito‑yavuha ana pata Davida yana dede wayahina
na‑omo?”a Iesu ya vi‑tanai taina vitana iuna aituhu koiaka ya tupua naona, tauna ana wava ananina. Aituhu Davida mai‑tupua, tauna ananina, o aituhu Tau Ito‑yavuha mai‑tupua, tauna ananina. Iesu ya pai mini ananina vivane Tau Ito‑yavuha maꞌ‑vavaha. Wayahina, tauna avaha mamaei tutana Davida tupua. Wayahina, Tau Ito‑yavuha ana wava ananina, ka Davida awaehei deina, e apa‑Kauveyei. Munia Tau Ito‑yavuha vi‑tomotau, vivane Iesu. 46 Ka eha aitam koiaka ana pata Iesu ya vi‑tanai taina na‑nau‑pate. Ka auyewana wayahina a itoava Iesu yanꞌ aniga wayahina, tomotau imatamatautei. Wayahina, eha aitam koiaka kadue Iesu ta‑vi‑tanatanai‑havine.
✡22:13: Mat 8:12; 25:30; Luk 13:28.
✡22:24: V.V 25:5.
✡22:37: V.V 6:5.
a22:45: Iesu ya vi‑tanai taina vitana iuna aituhu koiaka ya tupua naona, tauna ana wava ananina. Aituhu Davida mai‑tupua, tauna ananina, o aituhu Tau Ito‑yavuha mai‑tupua, tauna ananina. Iesu ya pai mini ananina vivane Tau Ito‑yavuha maꞌ‑vavaha. Wayahina, tauna avaha mamaei tutana Davida tupua. Wayahina, Tau Ito‑yavuha ana wava ananina, ka Davida awaehei deina, e apa‑Kauveyei. Munia Tau Ito‑yavuha vi‑tomotau, vivane Iesu.