Yehoba I Ba Petupatupa Limena ge Bugulina Ga Nihi Ginol Ola
25
(Awalehina 25–31)
Yehoba I Ba Gamagalau wali Mulolu Nihi Pwatanim
1 Yehoba i baek Mosese elana i ba, 2 “Nu baek Isileli elal wali mulolu nihi pwatanim elau. Henala atena i talam, wana mulolu ni pwatanim ge nu ahe nau kaiweu.”
Yaka bugul bolo Isileli nihi pwatanim i baunanik, ololana gold, silba, kopa, hihiu kaliko waiwaisana kaiwena, ge bwasumu kunisina, i ola al ebwakil waiwaisana alana akesiya, enonu, mwawin bwaleliya waiwaisana ge pat waiwaisal. (puna 3-7)
Yaka Yehoba i ba:
8 “Nu ba limi bwabwalena nihi tal kaiweu ge na miminaa gamwaliyaa. 9 Limi bwabwalena ya ginebi ge bugubugulina gegewena nuku ginol ni olaolaek toto na pankitewa.”
Bateli ana Dedewaga
Aban Bwabwalena Hot gamwanaa Bateli ana Dedewaga hi teliya.
Yehoba i ba dedewaga nihi ginol ebwakil alana akesiya ge gold elana. (puna 10-16)
Yaka i ba:
17 Hib 9:5 “Gold enona hot nu ahe dedewaga ana heguna nu ginoliya, wami gegi ana abayakiyakil. Heguna o ana yapu 110 sentamita ge ana manamana 66 sentamita. 18 Gold nu ahe bwasumu labui opeliya gaganina nu bub ginolil, 19 etegana ni minaa buhuna etega, eluwana ni minaa buhuna etega. Ginebi heguna nu ginolil toyawe. 20 Opeliya nihi anal inoke heguna nihi pahabobu. Awoliya nihi pempewa ge maniniliya ni lau heguna elana. 21 Pat mamanana sasapona labui toto abwe na pewa nu teliya dedewaga gamwanaa, inoke ana heguna nu pom. 22 Ta petupatupa-agilaa to. Na minaa Bateli ana Dedewaga ana heguna pwatanaa bwasumu labui opeliya gaganina ali luwaluwala, inoke alou owa ta liwaliwan ge no logugui na pewa Isileli kaiweliya.”
Beleid Bwabwalena ana Teibol ge Odam ginebi Abaliya
Aban Bwabwalena gamwanaa etuwalali eton.* Etonina te bugul bwalena waiwaisana ana abatonton. Liwanina nu kite 30:1-8 elana.
Etegana beleid bwabwalena ana teibol. Yehoba i ba teibol nihi ginol ebwakil alana akesiya ge gold elana. (puna 23-29) Yaka i ba:
30 Lib 24:5-8 “Beleid bwabwalena nuku teliya teibol ya pwatanaa ge sauga gegewena ni miminaa maniniwa.”
Eluwana, odam ginebi abaliya. Yehoba i ba,
31 “Gold enona hot nu ahe odam abaliya nu ginoliya.”
Odam abaliya lalana ona i gan inoke odam hi teliya lalana ona eliyalil. (puna 32-40)