36
1 “He Yehoba siba ge aatena iyaka i pek Besaleli ge Oholiyab avaliyau totuwalali enuna al elal limi bwabwalena ana taltal gegewena hi atena. Inoke tuwalali o nihi ginol ni ola Yehoba wana baaba.”
Gamagal wali Mulolu I Bwata Hot
2 Yaka Besaleli ge Oholiyab avaliyau totuwalali bolo Yehoba aatena i pek elal ge hi yaliyaya tuwalali kaiwena, Mosese i yogaagil hi nok elana. 3 Inoke mulolu gegewena bolo Isileli hi pwatanim limi bwabwalena ana taltal kaiwena, Mosese i bugul pek elal. Yaa Isileli heliya iyoho ya mweluluga maisena ge maisena hi nemnem wali mulolu hi teliteli. 4 Yaka bolo limi bwabwalena hi taltal tuwalali hi paveyaho ga, 5 ge hi na hi baek Mosese elana hi ba, “Mulolu bolo gamagal hi pwatanim i bwata lake te tuwalali toto Yehoba i ba elala ta ginol.”
6 Inoke Mosese i ba, “Bolau ge yowau bahi bugul etega al nihi lolovivina-an ge nihi mumulolu-an limi bwabwalena kaiwena.” Yaka wana baaba hi palelu abaholaviya. Inoke gamagal nige al bugul etega hi pwapwatanim, 7 kaiwena toto iyaka hi pwatanim, tuwalali gegewena tage nihi ginol ana luvi i bwata lake.
Petupatupa Limena ana Ginol Hi Ginol
Hihiu ali kala bulu, pepol ge keketina ginebi hihiu kaliko waiwaisana kaiwena hi ahe, inoke kaliko ana awa waiwaisana toto nihi anala limi pwatanaa hi palul. (puna 8-13)
Hihiu toto goti pupunona hi ginoliya hi ahe, inoke kaliko labuina toto nihi anal kaliko houwan pwatanaa hi palul. (puna 14-18)
Sipi kunisina hi kale i ket ge bwasumu kunisiliya waiwaisana hi ahe, inoke epahabobu labui hi ginolil bolo nihi anal kaliko labui pwataliyaa. (puna 19)
Ebwakil alana akesiya hi ahe baba tomaha ona hi ginolil, maisena maisena ana miha 4.5 mita ge ana manamana 70 sentamita. Baba maisena maisena puna labui hi tagil buhuna etega. Puliya ali abamisiyo hi ginola silba elana i ola vaiyal ana ulubwal. Ge epagapagasisi hi ginolil bolo nihi telel pabalabala ge baba ona nihi kukuhikagil, yaka bosowaina baba ona nihi teli tubwitubwi-agil ni tabwa baba maisena. (puna 20-34)
Hihiu ali kala bulu, pepol ge keketina ginebi hihiu kaliko waiwaisana kaiwena hi ahe, inoke kaliko labui hi ginolil, etegana limi ana babatomwa ge eluwana ana abatuk. Ge kaliko bolo o ali kokola al hi ginolil. (puna 35-38)