Esila
Baaba Houwan
Buki Esila liwanina i tubwiem buki bolo 2 Kin ge 2 Liwan elal. Heliya hi pamasal abalogugui Yuda nige Yehoba hi aawatauwan, inoke i talamwagil Babiloni nimaliyaa. Kin Nebukanesa i nem Yuda i pakokovel ge enuna i ahel i telel labi Babiloniya baliman 605 mulaa abwe Keliso i masal (M.K) elana. Baliman 586 M.K. Nebukanesa alonau wana tolohaveyan hi nem al panuwa Yelusalema ge ana Limi Bwabwalena hi pasamwalekaleka, ge Yudiya hi gewi al hi telel Babiloniya yaka hi mibwabwali. Babiloni wali kin enuna hi tologugui, yaka baliman 538 M.K. abwe labi Pesiya wali kin Sailusa abalogugui Babiloni i pakokovel. Inoke labi bolo valila Babiloni hi logugui-agil, abwe Pesiya hi logugui-agil, etegana te labi Yudiya.
Buki Esila i liwanan te Yudiya abwe hi sikal wali labiya. Houwan i pamasal Selababel alonau gamagalau hi gewi hi sikal ge Limi Bwabwalena hi tal pasikal (awalehina 1-6). Yaka i liwanan baliman hi gewi i mowasi abwe Esila alonau gamagalau hi gewi hi sikal ge pulowan etega i abubun (awalehina 7-10). Pulowan o heiya te Yudiya enuna boda getogal yowauiliyau hi alolonagil ge hi olak wali pagan bwaibwaikikinina ona elal.
Nuwatu bwabwatana buki ya elana te Yehoba wana ginol eliyana inoke tologugui wali logugui i gan. I ola al, Yehoba wana gamagalau i muloluagil yaka bosowailiya tuwalali nihi awaawaginol (1:1; 5:5; 7:6,8-10,27-28; 8:15-20,31).
Selababel ge Alonau Hi Sikal ge Limi Bwabwalena Hi Tal Pasikal
1
Awalehina 1–6
Kin Sailusa Yudiya I Talamwagil Nihi Sikal wali Panuwaa
1 Pesiya wali kin Sailusa wana logugui ana baliman houwan gamwanaa, Yehoba nuwatu etega i ginol inoke wana baaba i tabwa tunahot, toto palopita Yelemaiya i baunan.* Yelemaiya i ba te Yudiya nihi mibwabwali Babiloniya ge baliman sebenti (70) ni mowasi abwe nihi sikal. (Yelemaiya 29:10 ge 25:11-12) Sailusa atena i pawaiwai yaka i lut logugui etega i ginol. Logugui ya hi leli lowan, inoke i patuna i tagil hi vasili wana abalogugui gamwana gegewena elal, i ola hiwe:
2 Sailusa, Pesiya wala kin, i ba:
Yehoba, labulabum ana Yabowaine, abalogugui gegewena panayawiya i pem eliyau, ge i hileyau Limi Bwabwalena etega na tal iya kaiwena Yelusalema labi Yudiya elana. 3 Ebo wana gamagalau enuna hi minaa gamwamiwa, wali Yabowaine ni minaa elal ge ni muloluagil. Inoke nihi na Yelusalema labi Yudiya, ge Yehoba Isileli wali Yabowaine toto i minaa Yelusalema, wana Limi Bwabwalena nihi tal. 4 I ola al, ebo Yudiya bolo hi mina, enuna iyoho hi mibwabwali wami panuwa tomaha ona elal, inoke nuku label. Silba, gold, bugubugul ona ge bwasumu, ginebi wami mulolu enuna al, nuku pek elal Yabowaine wana Limi Bwabwalena Yelusalema ana taltal kaiwena.
5 Inoke un Yuda ge un Beniyamina ali tini ona wali tohouwa, topowon, ge un Libai, avaliyau ge Yudiya gegewel bolo Yabowaine ateliya i pawaiwai, hi lovivina nihi na Yehoba wana Limi Bwabwalena nihi tal pasikal Yelusalema. 6 Bolo hi minaa labeliyaa gegewel labe hi ginol, bugul ona hi ginolem silba ge gold elal, bugubugul ona ge bwasumu hi pek elal. Ge gogomwau hi gewi, ginebi wali mulolu enuna al hi pek.
7 I ola al, Sailusa Pesiya wali kin i ba Yehoba wana Limi Bwabwalena bugubugulina bolo valila kin Nebukanesa i aheliem Yelusalema ge i na i teleliya wana yabowaineyau wali limi bwabwalena elana, nihi bugul tagilagil. 8 I ba Mitledat, iya wana gogomwau ali tomatahikan, i bugul tagilagil yaka i vasilel ge i pwahinil Sesbasal manininaa, iya Yudiya wali tobwabwatana.
9 He bugubugul o heliya huwe:
mwaha hi ginolem gold elana ali gewi teti (30),
mwaha hi ginolem silba elana ali gewi tausan maisena (1,000),
bugul bwalena waiwaisana ana etonton dis hi ginolem silba elana ali gewi tuwenti naen (29),
10 bol dis hi ginolem gold elana ali gewi teti (30),
bol dis hi ginolem silba elana ali gewi po handeled ten (410),
ge bugubugul enuna al ali gewi tausan maisena (1,000).
11 He bugubugul bolo hi ginolem gold ge silba elal ali gewi bwalibwaligena paib tausan po handeled (5,400). Inoke sauga Sesbasal alonau ge Yudiya bolo hi mibwabwali hi egona Babiloni hi nok Yelusalema, bugubugul o hi kalivail hi nok.
*1:1: Yelemaiya i ba te Yudiya nihi mibwabwali Babiloniya ge baliman sebenti (70) ni mowasi abwe nihi sikal. (Yelemaiya 29:10 ge 25:11-12)