5
1 Amoli wali kin bolo Yolidani labena leu pai ge Kenani wali kin bolo Hoga Mediteleiniya bebenaa, gegewel wasa hi hago Yehoba Yolidani wewelina i pakekepa ana siga boda Isileli gegewel hi kalapanet haba. Inoke hi lovakun nabi ge nige wali gasisi i gagan tage avaliyau Isileli nihi lohaveyan.
Bolau Gotomwa Yoho Paganina Hi Ahe
2 Sauga o elana Yehoba i baek Yosuwa elana i ba, “Nibuka enuna nuku bub ge Isileli melubolau tuwaliya buhuna kunisina nuku gotomwa yoho.”* Ginol ya etotohi etega Isileli elal age heliya Yehoba wana gamagalau. (Abatelipuna 17:10-14; Tuwalali 7:8) 3 Yaka Yosuwa nibuka i bub ge i ba Isileli melubolau gegewel tuwaliya buhuna kunisina hi gotomwa yoho. Inoke panuwa o alana hi tun Gibeyat Halalot.* Pana Hibilu elana alan “Gibeyat Halalot” ana sapu te “Kunis ana Abagogotomwa.”
4-6 AlGe 14:28-35 Yosuwa i ginol ola o, puna i ola hiwe. He Isileli melubolau gegewel bolo hi tagilem Itipita, tuwaliya buhuna kunisina iyaka hi gotomwa yoho. Yaa sauga hi nawanawa ula kekevana elana, wawayau bolo hi abil nige etega tuwana buhuna kunisina hi gogotomwa. Isileli hi nononawanawa ula kekevana elana baliman poti, inoke gamwanaa bolau bolo sauga hi tagilem Itipita wali baliman bosowailiya lohaveyan, gegewel iyaka hi aliga haba, kaiwena Yehoba wana logugui nige hi hehenapuan. Yaka ali lahi hi pwawa i ola Yehoba wana baaba elal, heliya panuwa malumalulina toto Yehoba i bateli tubuliyau elal nige hi kikite. 7 Ha vavalul tamaliyau hi milahel, inoke heliya te Yosuwa i ba ge tuwaliya buhuna kunisina hi gotomwa yoho, kaiwena nige hi giginol uleya.
8 Sauga bolau gegewel gotomwa yoho paganina hi ahe haba, yaka hi minaa ga wali abaholaviya ana siga ali kakaini i mwau.
9 Inoke Yehoba i baek Yosuwa elana i ba, “Lan ebe wami miloloyowan Itipita elana puluwawena iyaka ya ahek yoho.” Yaka panuwa o alana hi tun Gilgal.* Pana Hibilu elana, alan ‘Gilgal’ ana hago i ola ‘ahek yoho.’ Alan o i mihot ana siga lan ebe.
Nopalegi Hagalena Hi Ginol
10 Tota 12:1-13 Sauga Isileli heliya iyoho wali abaholaviya Gilgal, Yeliko abwabwina elana, inoke Nopalegi ana nuwahikan hagalena hi ginol waikena ana lan potin-ina kokoyavena elana. 11 Nopalegi Hagalena i mowasi, hi kenu lan i gan, yaka lan o elana hi telipuna Kenani enowana hi anan. Bali enona enuna hi ekeke, enuna hi wowol yaka beleid toto nige alona yis hi vivikuhiya hi umun. Inoke lan o ge i nok Kenani enowana hi mimi anani. 12 Tota 16:35 Lan toto Isileli hi telipuna Kenani enowana hi anan, yaka aanan toto manna i lomowasi ge nige etega al hi pwapwawa. Kaiwena baliman o ge i nok, Kenani enowana hi mimi anani.
Labi Kenani Hi Pakokovel ge Hi Ahe
(5:13–12:24)
Yehoba I Masal Yosuwa elana ge I Ba Yeliko Ga Nihi Ahe Ola
13 Lan etega Yosuwa iyoho Yeliko gegelinaa, inoke matana i lihin tau etega* Awalehina 6 puna 2 ana leleli tau ya i awa Yehoba-an. Yehoba wana anelose nu kite Baaba Ona ali Sapu ana Abaloya elana, lamwa xxx. i kite i taltalmilil awonaa, wana elohaveyan kilepana iyaka i momol tagilan abanaa ge i pihikan. Yaka Yosuwa i na elana ge i neli i ba, “Owa ama tolabe etega o ebo ama topihigelgel?”
14 Tau o i ba, “Nigeya, ya nem te kaiwena nau Yehoba wana tolohaveyan wali tohouwa.”
Inoke Yosuwa alona wana awatauwan i talpo maninina i pahanalowanek bilibiliya ge i ba, “Tonowak, hauna nuwam nu baunan nau wam totuwalali elau?”
15 Yaka Yehoba wana tolohaveyan wali tohouwa i baek Yosuwa elana i ba, “Aem ana os u leke, kaiwena bilibili toto u talmilila i bwabwalena.” Inoke Yosuwa i ginol ola to.
*5:2: Ginol ya etotohi etega Isileli elal age heliya Yehoba wana gamagalau. (Abatelipuna 17:10-14; Tuwalali 7:8)
*5:3: Pana Hibilu elana alan “Gibeyat Halalot” ana sapu te “Kunis ana Abagogotomwa.”
5:4-6: AlGe 14:28-35
*5:9: Pana Hibilu elana, alan ‘Gilgal’ ana hago i ola ‘ahek yoho.’
*5:13: Awalehina 6 puna 2 ana leleli tau ya i awa Yehoba-an. Yehoba wana anelose nu kite Baaba Ona ali Sapu ana Abaloya elana, lamwa xxx.