2 Samuwela.
1.
Sol wana yaomal enaa liwanina i ola hiwe. He Deibid alonau ge ana hevalau iyaka boda Amaleki hi pakokovel ge hi sikal hi miminaa panuwa Siklag. Sol i aliga ge lan labui al i mowasi, 
yaka lan etonina elana abwe heval etega i noem labi toto Sol ge wana tolohaveyan hi lohaveyana ni na Deibid elana. Nuwanak kaiwena ana kaliko i kukuleli ge papakova i yoho heheyan kokowanaa. Sauga i na Deibid elana, yaka heval o awatauwan kaiwena i talpo bilibiliya. 
Yaka Deibid i neli i ba, “Owa ga u neem?” Anana i lahe i ba, “Ya louem labi toto Isileli wali tolohaveyan hi lohaveyana.” 
Inoke Deibid i baek elana i ba, “No wasa u pem haveyan wasana ga i ola?” Anana i lahe i ba, “Isileli wali tolohaveyan hi louem haveyana, ge hi gewi Pilistiya hi lopaaligal. I ola al, Sol ge natuna Diyontan iyaka hi aliga.” 
Yaka Deibid i baek heval elana i ba, “Ga u atena ola tage Sol ge natuna Diyontan iyaka hi aliga?” 
Yaka heval i liwan Deibid elana i ba, “Nau iyoho ya oya Gilbowa te Sol ya nopwawa wana gau puna i antawan bilibiliya ge i gena palalek elana. Yaka Pilistiya wali waga momomol ginebi ge ana tolohaveyan hi tapalelu nok kelaubwa nihi vin elana. 
Inoke i tagena pil ge i kiteyau, yaka i yogaagau ge ya ba, ‘Tonowak, ga i ola?’ 
“Inoke i nelau i ba, ‘Henala owa?’ “Anana ya lahe ya ba, ‘Nau boda Amaleki gamagalina.’ 
“Inoke i awanun eliyau i ba, ‘U nem hiwe gegeliwa e yaka u gopaaligau, kaiwena bwagana yawaliu momolona, yaa i pulowan hot eliyau.’ 
“Inoke ya nok gegelinaa ge ya gopaaliga, kaiwena ya atena te iyaka hi howa bubun ge nige ni momolu. Kokowana ana hanahana ge nimana ana tovaha ya ahel, heliya hiwe ya pwatanim owa no babala eliyam.” 
Yaka nuwanak kaiwena Deibid ana kaliko i kukulelelian, ge ana hevalau hi ginol ola al to. 
Inoke hi lonuwanak, hi kahikahin ge ali galebu hi palahikan, ana siga sabwelu i lobek, kaiwena Sol, natuna Diyontan, Yehoba wana tolohaveyan ge boda Isileli iyaka hi aliga haveyan kilepana elana. 
Yaka Deibid heval i neli i ba, “Hapanuwa gamagalina owa?” Anana i lahe i ba, “Nau boda Amaleki gamagalina ge ya mibwabwali labi Isileli.” 
Inoke Deibid i ba, “Ga i ola ge nige u lolovakun? Yaka binimala Yehoba wana hilihili gamagalina bahi nu aapanak.” 
Yaka Deibid i ba vevehe al i ba, “Wam gegi lahena nu aliga, kaiwena totom u wasaagiwa te u ba, ‘Yehoba wana hilihili gamagalina iyaka ya gopaaliga.’” Inoke wana hevalau avaliya etega i yogaan ge i baek elana i ba, “U nok u na u gopaaliga.” Yaka wana haveyan kilepana elana heval o i gopaaliga. 
Kahin wonana ya Deibid i wonaan Sol alona ge natuna Diyontan kaiweliya. 
Inoke i ba nihi panpankiti-an un Yuda gamagaliliyau eliyalil. He alana Egipoyo Wonana ge iyoho Yasa i leli lowan wana buki gamwanaa. 
O Isileli, wala toematana bwaliwawagal iyoho wala oya pwataliyaa.   I bwe ge wala toasiyala hi pasogol! 
Bahi nuku baubaunan panuwa Gat gamwanaa,   o ebo nuku wawasaan Askelon ana kamwasa elal, eba Pilistiya yowauiliyau nuwaliya ni waisi,   ge bolo nige Yehoba hi aatena wali yowau nihi yaliyaya. 
O labi Gilbowa oyana, bahi kehe ge bekubeku hunhunina ni lalau eliyam,   ge bahi bibilem enona ni gagan. Kaiwena toasiyala hi aligaa tei, ge wali ligovan i mibwagabwaga bilibiliya;   Sol wana ligovan iyahe tei nige al nihi papaenonu. 
Diyontan wana egipoyo gauina hi lilimwaun   yaka tolohaveyan gasigasisel tuwaliya hi howa. Sol wana haveyan kilepana nige i sisikal abanaa enoenovana,   yaa ana topihigelgel saliyaliya i lau hi aliga. 
Gamagalau Sol ge Diyontan yawaliliya miminana elana hi nunuwana-agil bubun,   ge yaomal elana hi aliga toyawa. Bwasumu magisubu hi mweyaha lakel   ge laiyoni hi gasisi luwagil. 
Isileli yowauiliyau,   Sol baena nuku kahin, kaiwena kaliko waiwaisana matana keketina elana i pagaloimiu,   ge tuwan ana isela gold hi ginoliya elana i paiselamiu. 
I bwe ge wala toasiyala hi pasogol haveyana!   Diyontan bwaliwawagana iyoho wala oya pwataliyaa. 
Taliu Diyontan, nuwau i nak nabi kaiwem,   kaiwena ya nunuwanagiwa ge wam nunuwana nau kaiweu i getoga hot,   i lake te yova wana nunuwana lagona elana. 
I bwe ge wala toasiyala hi pasogol!   Wali elohaveyan hi eguluwagil nige al ali waisi.