7
Huɨdibɨ anajty ajcxy tɨy'ajtmɨɨd ma je Israel jäy ajcxy
1 Chi co jadu'n yjajtɨ, chi nhuin'ijxyɨch madaax ángeles ajcxy ytɨnaaygɨxy ma madaax'itpɨ naaxhuiñybɨ ytatzcɨ̈y. Adujccɨxy anajty je mɨdaax'it poj ca'ydɨ ypojy ya naaxhuiñ, ni ma mejy, ni ma quipy. 2 Chi nhuin'ijxyɨch jadüg ángel ymiinɨ̈y anajty xɨɨbɨdzɨmy'amy, mɨɨdɨty ma ycɨ' je Dios juugypɨ ysellɨ. Jadayaabɨ ángel ooy mɨc mɨyaaxy je jamɨdaaxpɨ ángeles ajcxy huɨdibɨ anajty ajcxy tɨ ycɨ̈dɨgɨ́ɨyɨgɨxy je mɨc'ajt je cötujcɨn nej huaad yajhuindɨgooygɨxy tijaty ya naaxhuiñ etz ma nɨɨ mejy.
3 Chi je ángel ymɨna'ñ:
―Ca' ti ayo'n mdungɨxy naaxhuiñ, ni ma mejy, ni ma quipy chaa, ixtɨ coonɨ anajty Dios ytɨy'ajt y'ijxpejt nbɨdaacɨm ma je' ajcxy yhuimbocɨn, je tɨɨbɨ ajcxy huin'ixy huɨdibɨ tungɨxp ma Dios ytung.
4 Chi nmɨdooyɨch jadu'ñyɨ je' tɨɨbɨ anajty ajcxy Dios ytɨy'ajt y'ijxpejt tɨ ymóoyɨgɨxy. Mɨgo'px jahuixchiguïpx mɨdaax mil je' ñaybaatɨ huɨdibɨ anajty ajcxy tɨy'ajt mɨɨd ma yhuimboc ma nidüg'ócɨy Israel jäy ajcxy. 5-8 Majmetz mil anajty ajcxy tɨy'ajt y'ijxpejt mɨɨdɨty je Judá jäy, majmetz mil je Rubén jäy, majmetz mil je Gad jäy, majmetz mil je Aser jäy, majmetz mil je Neftalí jäy, majmetz mil je Manasés jäy, majmetz mil je Simeón jäy, majmetz mil je Leví jäy, majmetz mil je Isacar jäy, majmetz mil je Zabulón jäy, majmetz mil je José jäy, etz majmetz mil je Benjamín jäy.
Je mayjäy ajcxy huɨdibɨ yxoxɨp mɨɨd poob huit
9 Chi jada' nhuin'ijxyɨch janch mayjäy chooñ ma canaag nación, hue' ajcxy canaagnax raza'adyii, e capxy ajcxy canaagnax ayuc, etz chooñ ajcxy ma canaag cajp. Hue' je mayjäy ytɨnay'ahuɨyday ma je mɨj'ane'mdac huinduu, etz ma Dios y'ung, je Cordero yhuinduu. Janch mayjäy ñïmujcy ma je Dios y'ung yhuinduu, ni pɨn je' anajty huaad camɨchoudäy ajcxy. Ac poob huit anajty ajcxy mɨɨd yxoxyɨty, e ymɨɨd anajty ajcxy tɨɨxy'aay ma ycɨ'. 10 E janch mɨc anajty ajcxy mɨyaaxcɨxy Dios, chachmɨnaangɨxy:
Ɨɨch ajt nDios yɨ' je' tügpajc huɨdibɨ xyajpocyhuaatzɨm. Ɨɨch ajt nDios yɨ' je' huɨdibɨ ane'mdaayb tüg'ócɨy, e nañ jadu'n yɨ y'ung, je Cordero.
11 E nidüg'ócɨy je ángelestɨjc anajty ajcxy ytɨnaaygɨxy jühuɨdityɨ ma je Dios y'ane'mdac. E cham je mɨjjäy ajcxy etz je mɨdaaxpɨ ɨyujc huɨjoj'ɨhuɨɨy ajcxy ma je ane'mdac huinduu, huindzɨgɨɨygɨxy yajmɨj'ajtcɨxy je Dios. 12 Chachmɨnaangɨxy:
Jadu'n jada. Amén. Ɨɨch ajt nDios, je' mɨhuaad huinɨxɨɨ huinɨtiempo tüg'ócɨy je ɨɨhuɨn, je xondaacɨn, je oy'ajtɨn, je ixpɨjcɨn, je jäygɨdaacɨn, je cömayɨn, je ane'mɨn, je mɨj'ajtɨn. Amén. Jadu'n jada.
13 Huin'it nidügtɨ je mɨj jäy ycapxy, e xy'amɨdooyɨch:
―¿Pɨn jada ajcxy jada' huɨdibɨ poob huit mɨɨd yxoxyɨty, e ma yɨ' jada' tɨ choongɨxy?
14 Chi ɨɨch je' n'adzooy:
―Huindzɨnɨch, miich mnejhuɨɨyb.
Huin'it je' xy'adzooyɨch:
―Jada je' ajcxy tɨɨbɨ je mɨj ayo'n mɨnajxcɨxy yajnajxcɨxy, e tɨ ypocyhuaatzcɨxy mɨɨd je Dios y'ung, je Cordero ñɨ'py, tɨm jadu'n nej jɨhuɨ̈y yhuit tɨ yajhuaatzcɨxy janch poob ma Dios y'ung ñɨ'py. 15 Paady yɨ' ajcxy yajpaady ma Dios chɨnaydac yjugy'ajttac, e ytungɨxy xɨɨm tzuum ma Dios ytɨjc tzajpjoty. E yɨ Dios y'ung huɨdibɨ ɨñaayb ma je mɨj'ane'mdac, yɨ' yɨ' mɨ'ijttaayb cuend'aty ma yɨ' yhuinduu. 16 Ca'p ajcxy jacjɨhuɨ́ɨygɨxɨpy yuu tɨdzɨ̈bɨ, ni xɨɨ'an ycajacnögɨɨyb ajcxy, ni anbɨ ycajacyajtzibɨɨyb ajcxy. 17 Com je Dios y'ung, je Cordero, huɨdibɨ cujc'amy yajpatp ma je Dios y'ane'mdac, je' yɨ' cuend'ajtp ajcxy, jadu'n nej jɨhuɨ̈y cöbixy cuend'aty, e yajnɨcxɨp ma je nɨɨ huätzpɨ ymuxy huɨdibɨ yejcp jugy'ajtɨn. Dios yajquëgɨpy yɨ' ajcxy ytajɨn ymayɨn jɨgɨx ca' yjacjɨ́ɨygɨxɨpy yjacyáaxcɨxɨpy mɨɨd tajɨn mayɨn.