1 Huin'it je ángel xyajni'ixɨɨyɨch tüg mɨjnɨɨ huätzpɨ, je nɨɨ huɨdibɨ yejcp jugy'ajt huɨdibɨ ca' ycɨxɨp ytɨgoyɨp. Janch huädz janch tɨɨcx je' anajty je nɨɨ nej tüg ijxɨn. E je nɨɨ jɨm anajty ymuxy ma Dios etz je Cordero y'ane'mdac. 2 Jada mɨj nɨɨ hue' je' anajty ñaxy cuidad mɨjtügujc, etz ma je mejtz'adu'm'amybɨ mɨjnɨɨba', jɨm anajty je quipy huɨdibɨ jugy'ajt mɨɨd, huɨdibɨ tɨɨm'ajt majmetz'oc tügpɨ jɨmɨjt, po' po' ytɨɨm'aty, e je quipy y'aay hue' anajty ytuñ jɨgɨx huaad naaxhuiñyjäy chooccɨxy. 3 Ca'p jɨm y'adɨpy ni ti ayo'n ni ti jotmay mɨɨd pocytunɨɨ ycɨxpɨ. Je Dios etz je' y'ung je' jɨm y'ane'mdac ycötujctac yajpaadɨpy. E je' ytumbɨdɨjc je' ajcxy jɨm yajmɨj'adɨɨb ojadadɨɨb. 4 Y'ijxɨpy ajcxy je Dios y'ung yhuiñyjɨjp etz ymɨnɨcxɨp ajcxy je' yxɨɨ ycojay ma ajcxy yhuimboc. 5 Ca'p jɨm ycootzɨ̈huɨty. E pɨnjaty jɨm tzɨnaayb ca'p ajcxy yajmayjadɨpy linterna jɨɨn, lamparajɨɨn, ni xɨɨdɨɨcxpɨ, com Dios ɨɨch ajt nHuindzɨn yɨ' yɨ' ajcxy codɨɨcxɨɨb. Je Huindzɨn Dios etz je' y'ung je' ajcxy jɨm ane'mɨp huinɨxɨɨ huinɨtiempo.

6 Huin'it je ángel xyñɨmaayɨch:

―Jadayaabɨ ayuc tɨy'ajt ma jada necy, ooy jada yjanchɨty, e jëbɨ miich myajmɨj'adɨpy. Je Huindzɨn, je Dios huɨdibɨ ayuc moy je profetas ajcxy jecy'ajty, quejxy y'ángel jɨgɨx yajni'ixɨ̈huɨpy je' ytumbɨdɨjc tijaty tzojc tunaanɨp jadaanɨp.

7 Jesucristo jadu'n ymɨnañ:

―¡Miimbɨch tzojc! Jotcujc pɨnjaty tumb cuendɨ etz cuydumb Dios y'ayuc ytɨy'ajt huɨdibɨ jaybetyɨp ma jada libro.

8 Ɨɨch Juan, nmɨdoohuɨch etz nhuin'ijxɨch jadayaabɨ huɨdibɨ jaybety ma jada necy. E co oy jadu'n nhuin'ixyɨch, chi nhuɨjoj'ɨhuɨɨyɨch ma je ángel ytecymɨjc huɨdibɨ anajty yam xyajni'ixɨɨybɨch. 9 Chi je' xyñɨmaayɨch:

―Ca' jadu'n m'ɨdɨ̈ch. Ɨɨch, Dios xytumbɨ'ajtp jadu'n nej miich etz jacjadyii mɨgügtɨjc huɨdibɨ Dios y'ayuc najtzcapxɨɨyɨp, e tüg'ócɨy pɨnjaty tumb cuendɨ huɨdibɨ jaybetyɨp ma jada necy. Huindzɨgɨ' etz ojadat Dios.

10 Chi je' xyñɨmaayɨch:

―Capxhuäcxɨ je Dios y'ayuc huɨdibɨ tɨ mjay ma jada necy, ca' myüdzɨp. Com tɨ yhuingoñ je tiempo mɨna Dios cuyduna'ñ yɨ y'ayuc huɨdibɨ yjayhuɨ'm ma jada necy. 11 Pɨnjaty ca' ytudägyɨty, huen jadu'n jacyajpaady mɨɨd ycatudägy'ajt. Pɨnjaty jɨbɨcjot jɨbɨc-huinma'ñ tumb, huen nïgɨ jɨbɨcjot jɨbɨc-huinma'ñ tuñ. E pɨnjaty tudägyɨ tumb, huen jactuñ tudägy'ajtɨn. Pɨnjaty huädz yjot huädz yhuinma'ñ mɨɨd, huen huädz yjot huädz yhuinma'ñ jacmɨ'ity ma Dios.

12 Chi je Cristo ymɨnañ:

―Tɨmetiinɨ nhuimbidɨpyɨch jadüg'oc naaxhuiñ. Co anajty tɨ nmiiñɨch, huin'it nyajjotcugɨ̈huɨbɨch pɨnjaty oybɨ tɨ tuñ, e ndzaachytunɨpyɨch pɨnjaty jɨbɨcpɨ tɨ tuñ. 13 Ɨɨch je' tɨ njayɨjp'atyɨch ya naaxhuiñ, etz ɨɨch je' cogɨxɨ̈huamb, tɨm jadu'n nej je letra A chondägy ma je alfabeto etz je letra Z ycogɨxɨ̈y ma je alfabeto. Ɨɨch tɨ nyajtzondacyɨch je naaxhuiñ etz nyajcɨxɨpyɨch.

14 Jotcujc ajcxy pɨnjaty tɨ ypocyñïhuäch, jadu'n nipaady nej ajcxy yhuit tɨ pujcɨxy e mɨɨd ajcxy yhuit huätzpɨ. Com tɨ ajcxy ypocyñïhuaatzcɨxy, paady jëbɨ jɨ́ɨcxcɨxɨp je ujtz tza'm huɨdibɨ jugy'ajt yejcpy huɨdibɨ ca' ycɨxɨpy ytɨgoyɨpy ni mɨna, e jadu'n jëbɨ ytɨgɨ̈y ma je jemybɨ Jerusaléngajp. 15 Dios ca' yɨ' ajcxy cöbɨga'ñ ma je jemybɨ Jerusalén etz huɨ'mɨp ajcxy cajppa' tüg'ócɨy pɨnjaty huɨdibɨ jɨbɨc-huinma'ñ mɨɨd, pɨnjaty ca' mɨbɨcy Dios, pɨnjaty mɨjpɨdacp huijyjäy yhuinma'ñ brujo yhuinma'ñ, pɨnjaty ajcxy mɨgapxtɨgooyb mɨdundɨgooyb töxyjäydɨjc, pɨnjaty ajcxy jäy yaj'öcp, pɨnjaty ajcxy huindzɨgɨɨyb quipychech tzaachech, etz tüg'ócɨy pɨnjaty tzachnixondacp anɨɨ ayuc.

16 Ɨɨch Jesús huɨdibɨ capxp. Tɨ nguexyɨch n'ángel ma miich jɨgɨx jada tɨy'ajt capxtɨ̈cxɨpy majaty mɨbɨjcpɨdɨjc ma tüg tüg cajp. Ɨɨch je' ijx'ajtp cop'ajtp ma je rey David miiñ. Etz ɨɨch je' nmɨj'ap'ajtpyɨch nmɨjteedy'ajtpyɨch je rey David. Jadu'n ɨɨch nipaady nej je mɨjmadza' huɨdibɨ yajtijp jayxɨɨm.

17 Je Espíritu Santo etz je mɨbɨjcpɨdɨjc huɨdibɨ jadu'n nipatp nej Cristo ytöxyɨjc ymɨnaangɨxy:

―Min ma Jesucristo.

E pɨn amɨdoo'ijtp ɨɨch n'ayuc ymɨnáangɨxɨpy:

―Min ma Jesucristo.

E pɨn tzojcp jugy'ajtɨn huɨdibɨ ca' ycɨxɨpy ytɨgoyɨpy nimɨna, jadu'n nej jɨhuɨ̈y ytɨdzɨ̈yii e tzocy jada nɨɨ, huen miiñ, e nmöhuɨbyɨch jugy'ajtɨn, jadu'n nej jɨhuɨ̈y nyajnɨɨ'ügɨch je nɨɨ huɨdibɨ jugy'ajtɨn mɨɨd e ni ca' mɨmeeñydunɨpy ni jadu'ñyɨ.

18 Tüg'ócɨy pɨnjaty amɨdoo'ijtp Dios y'ayuc ytɨy'ajt huɨdibɨ jaybetyɨp ma jada libro, ɨɨch miich ajcxy nɨmaaybɨch co pɨnjaty jacyaj'anajxp jada ayuc ma jada necy, Dios jac'anaxy möhuɨɨb tzaachypɨ ayo'n, ca'ydɨ huɨdi jaybetyɨp ma jada libro. 19 E pɨn puuhuijtzp hueenɨ jada Dios y'ayuc huɨdibɨ jaybetyɨp ma jada Dios ylibro, Dios yɨ' jötzɨɨb yxɨɨ huɨdi cojaayɨp ma je jugy'ajt libro. Nañ jadu'n ypuhuidzɨɨyb huɨdi anajty japaatɨp ma je jemybɨ Jerusaléngajp, huɨdi jada libro ñimɨydacpy.

20 Yɨ Jesucristo huɨdibɨ jada ayuc capxp, yɨ' mɨnamb:

―Ca' ooy jecy njac-huäcxɨba'ñɨch co nhuimbidɨpyɨch naaxhuiñ jadüg'oc.

Jadu'n jada. Amén. ¡Min, Huindzɨn Jesús!

21 Huen je nHuindzɨn Jesucristo may'ajt oy'ajt tunɨpy mɨɨd miich ajcxy huɨdibɨ mɨbɨjcp. Jadu'n ngapxycɨ́xyɨch. Amén.