1 Keriso Iesu ese taunimanima ibounai dohore ia kota henia, mauri noho taudia, bona idia mase vadaeni taudia danu. Unai dainai Dirava ena vairanai, bona Keriso Iesu ena vairanai danu, oi dekenai lau hereva goada henia, inai bamona: Keriso Iesu be do ia giroa mai, bona iena Basileia do ia gunalaia dainai, oi lau oda henia, 2 Sivarai Namona do oi harorolaia goadagoada, nega namodia neganai, bona nega dikadia neganai danu. Taunimanima do oi sisiba henia, bona oiemu hereva dekena amo edia kudouna do oi pidia, ela bona edia lalona idia giroa. Taunimanima edia lalona do oi hagoadaia, bona idia do oi hadibaia, mai oiemu haheauka danu. 3 Badina be negana do ia ginidae, taunimanima be hereva maoromaoro do idia ura lasi kamonai. Lasi momokani. To edia ura sibona do idia tahua. Idia ese idia ura henia hadibaia taudia momo do idia haboua. Vadaeni inai hadibaia taudia ese sivarai kavakava do idia gwauraia, unai taudia idia ura kamonai gaudia sibona. 4 Oibe, hereva momokani do idia negea, to gori kavakava do idia kamonai henia. 5 To oi ese nega ibounai do oi laloa maoromaoro. Hisihisi lalonai do oi haheauka. Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.

6 To lauegu nega be kahirakahira ia ore. Taunimanima ese uaina idia bubua, Dirava ena boubou gauna totona. Inai bamona danu, lauegu rarana be kahirakahira do ia bubua, Dirava ena boubou gauna totona. Lauegu mauri dokona be ia kahirakahira momokani. 7 Tuari namona lau tuarilaia vadaeni, lauegu heau helulu be ia ore vadaeni, bona lauegu abidadama lau karaia haorea vadaeni.

8 Harihari lauegu kwalimu ahuna, kara maoromaoro ena davana namona, be lau dekenai ia noho hegaegae. Unai Dina Badana neganai, Lohiabada, kota biaguna maoromaorona, ese unai davana namona lau dekenai do ia henia. Bona lau sibona dekenai do ia henia lasi, to mai lalokau danu iena mai dinana idia naria noho taudia ibounai dekenai danu, be ia ese unai davana namona do ia henidia.

9 Lau dekenai do oi mai haraga be namo. Oi mai totona dala do oi tahua goada. 10 Badina be Dema ese lau ia rakatania, inai tanobada ena mauri ia ura henia bada dainai. Ia be Tesalonika dekenai ia lao vadaeni. Kresike be Galatia dekenai ia lao, bona Tito be Dalamatia ia lao vadaeni. 11 Luka sibona lau dekenai ia noho. Mareko do oi abia, bona umui ruaosi lau dekenai do umui mai, badina be ia ese egu gaukara do ia durua diba. 12 Tukiko be lau siaia vadaeni Efeso dekenai.

13 Oi mai neganai, egu keru koua dabua latana do oi mailaia. Lau be Troa dekenai lau rakatania, Kapa dekenai. Lauegu buka danu do oi mailaidia. Buka haida danu unuseni be boromakau kopina dekena amo idia karaia, idia danu mani oi mailaia.

14 Alesana, kapa ia gaukaralaia tauna ese lau ia hadikaia bada. Lohiabada ese iena kara davana do ia henia. 15 Ia dekenai do oi naria namonamo, badina be iseda hadibaia hereva ia dagedage henia dikadika.

16 Lauegu kota ginigunana dekenai, tau ta ese lau ia durua lasi, ibounai ese lau idia rakatania. Idia madi, Dirava ese edia kerere davana ia henia lasi be namo! 17 To Lohiabada ese lau ia durua, bona lau ia hagoadaia, vadaeni Sivarai Namona ibounai lau gwauraia, bona Iuda lasi taudia idia kamonaia. Bona laiona edia uduna dekena amo Dirava ese lau ia hamauria vadaeni. 18 Lohiabada ese dika ibounai dekena amo lau do ia hamauria, bona iena Basileia guba dekenai lau do ia abia lao. Iena ladana do ita hanamoa hanaihanai be namo. Amen.

19 Prisikila bona Akwila, bona Onesiporo ena ruma taudia dekenai lauegu hanamoa do oi henia. 20 Erasito be Korinto dekenai ia noho, to Tropimo be Mileto dekenai lau rakatania, mai ena gorere. 21 To oi karaharaga, keru negana do ia ginidae lasi neganai do oi mai. Eubulo bona Pude bona Lino bona Klaudia bona inai gabu ena Keristani varavara taudia ibounai ese oi idia hanamoa inai.

22 Lohiabada ese oiemu lauma dekenai do ia noho. Dirava ena hariharibada umui ibounai dekenai do ia noho.