1 Unai neganai King Heroda ese ekalesia taudia haida ia dogoatao, hadikaia totona. 2 Iamesi, Ioane ena kakana be kaia dekenai Heroda ese ia alaia mase. 3 Ia itaia, Iuda taudia idia moale inai kara dekenai, vadaeni, unai dainai ia ese Petero danu ma ia dogoatao. Unai be Paraoa Hatubua Lasi aria idia karaia negana. 4 Ia dogoatao neganai, dibura ruma lalonai ia koua, bona ia henia tuari orea 4 dekenai (orea ta be tuari taudia 4), idia gimaia totona. Heroda ia laloa be Pasova murinai, Petero be hanua taudia edia kota vairanai do ia hakaua lao. 5 Unai dainai, Petero be dibura ruma lalonai idia gimaia, to ekalesia taudia ese Dirava dekenai idia noinoi goadagoada Petero dainai.

6 Heroda ia ura kerukeru be taunimanima edia kota vairanai Petero do ia hakaua lao, vadaeni unai hanuaboi Petero be tuari taudia rua edia huanai ia mahuta noho, auri gaudia rua dekenai ia kwatua. Gima taudia danu iduara ena vairanai dibura ruma idia gimaia noho. 7 Bona nega tamona Lohiabada ena aneru ta Petero badinai ia gini, diari danu dibura ruma ia hadiaria. Aneru ese Petero ena kopina ia botaia, ia hanogaia, ia gwau, “Oi toreisi haraga.” Vadaeni auri kwatua gaudia be Petero ena imana dekena amo idia moru. 8 Ma inai aneru ese ia hadibaia, ia gwau, “Oiemu rami oi kwatua, bona oiemu tamaka oi atoa.” Unai bamona ia karaia. Aneru ma ia hereva. “Oiemu kouti oi atoa, lauegu murinai oi raka.” 9 Petero ia raka murimuri dekenai, aneru ena murinai ia raka, to ia diba lasi inai aneru ena kara be momokani o lasi, to ia laloa be ia nihi. 10 Idia ruaosi ese gima taudia ginigunana bona iharuana idia raka hanaia, vadaeni iduara ta, auri gauna, dekenai idia ginidae. Unai iduara be hanua lao dalana ia kehoa. Inai iduara be sibona ia kehoa idia ruaosi edia vairana dekenai. Idia raka lao murimuri, bona dala ta dekenai idia raka lao. Vadaeni nega tamona aneru ese Petero ia rakatania.

11 Bona Petero ena lalona ia kehoa neganai, ia gwau, “Hari lau diba momokani, Lohiabada ese iena aneru ia siaia, Heroda ena imana dekena amo, bona Iuda taudia edia ura dika dekena amo lau ia hamauria vadaeni.”

12 Inai gau ia laloa ore, vadaeni ia lao Maria ena ruma dekenai. Inai Maria be Ioane Mareko ena sinana. Unuseni taunimanima momo idia hebou, idia guriguri noho. 13 Petero ia pidipidi iduara dekenai. Bona kekeni ta, ladana Roda, iduara kehoa totona ia mai. 14 Petero ena gadona ia kamonai bona ia diba, to ia moale bada herea dainai iduara ia kehoa lasi, to ia heau vareai, taunimanima dekenai ia hereva, ia gwau, “Petero be iduara dekenai ia gini noho!” 15 Ibounai ia dekenai idia hereva, “Oi be kava!” To ia hereva goada, ia gwau, “Lasi, ia momokani vadaeni.” Bona idia gwau, “Sedira inai be iena aneru.”

16 To Petero be ia pidipidi noho. Vadaeni, idia lao, iduara idia kehoa, idia itaia bona idia hoa bada. 17 Petero ese iena imana ia abia isi, edia hereva ia hadokoa. Bona Lohiabada ese dibura ruma dekena amo ia hakaua mai sivaraina idia dekenai ia gwauraia. Bona ia gwau, “Iamesi bona iseda varavara do umui hamaoroa.” Vadaeni, idia ia rakatania, idau gabu dekenai ia lao.

18 Daba rere neganai, daradara bona gari maragi lasi ia vara tuari taudia edia huanai, idia gwau, “Petero dekenai dahaka ia vara?” 19 Heroda ese Petero ia tahua, to ia davaria lasi. Bona ia ese gima taudia ia kota henia, inai murinai oda ia gwauraia, ibounai idia alaia mase.

Unai murinai Heroda ese Iudea ia rakatania, ia diho lao Kaisarea dekenai, unuseni ia noho.

20 Heroda ese Turo bona Sidono taudia dekenai ia badu dikadika. Vadaeni, idia ibounai edia lalona idia hatamonaia, bona ia dekenai idia lao. Idia ese king ena mahuta daiutu naria tauna, ladana Blasto, ena lalona idia ania guna, Heroda danu maino idia abia totona. Badina be edia tano taudia ese king Heroda ena tano dekena amo edia aniani idia abia noho.

21 Vadaeni, idia abia hidi dina dekenai, Heroda ese king ena dabua ia karaia, bona kota helai gauna badana dekenai ia helai, bona idia dekenai ia haroro. 22 Bona taunimanima idia boiboi noho, idia gwau, “Inai be dirava ta ena gadona, tau ena gadona lasi.” 23 Vadaeni nega tamona Lohiabada ena aneru ta ese ia botaia, badina be hairai ia henia lasi Dirava dekenai. Vadaeni gaigaigaigai ese iena tauanina idia ania, vadaeni ia mase momokani.

24 To Dirava ena hereva ia tubu, bona ia bada daekau, gabu momo dekenai.

25 Vadaeni Banaba bona Saulo ese edia gaukara idia haorea, bona Ierusalema idia rakatania, Antioka dekenai idia giroa lou, Ioane Mareko idia danu idia hakaua lao.