1 Babulonia dekenai mai guia danu ai noho negana ena lagani namba 6, hua namba 6, bona dina namba 5 dekenai, Iuda tau badadia be egu ruma lalonai idia helai noho lau danu. Vadaeni nega tamona, Lohiabada Dirava ena siahu egu latanai ia diho mai. 2 Egu matana lau abia isi, bona gau ta lau itaia, iena toana be taunimanima bamona. Iena gabana gauna ena henunai be lahi bamona, bona iena gabana ena ataiai be ia diaridiari, auri laboralabora ena hururuhururu bamona. 3 Ia ese imana bamona gauna ia atoa maoromaoro, bona egu kwarana huina ia dogoatao. Vadaeni inai mata hanai lalonai Dirava ena Lauma ese lau ia abia isi, ataiai momokani lau lao, tanobada bona guba edia huanai, bona ia ese Ierusalema dekenai lau ia abia lao. Lauma ese lau ia hakaua lao, bona Dubu Helaga ena mirigini kahana iduara, lalonai gauna, ena raka vareai gabuna dekenai lau ia atoa. Unai gabu dekenai kaivakuku dika herea, Dirava ena badu mai siahuna ia havaraia gauna, ia gini.

4 Lau itaia danu, Israela ena Dirava ena hairaina be unuseni, Kebara Sinavai isena dekenai mata hanai lalonai lau itaia hegeregerena. 5 Dirava ese lau ia hamaoroa, ia gwau, “Tanobada tauna e, mirigini kahana do oi itaia.” Vadaeni egu matana lau negea, bona unuseni, iduara ena raka vareai gabunai, boubou patana kahirakahira, be Dirava ese ia badu henia kaivakuku dikana lau itaia.

6 Dirava ese lau ia hamaoroa, ia gwau, “Tanobada tauna e, Israela taudia idia karaia noho kara dika rohoroho oi itaia noho, a? Idia ese inai karadia dekena amo egu gabu helagana dekena amo lau idia lulua lao noho. To kara dika rohoroho bada herea haida, inai kara idia hanaia gaudia, be do oi itaia.”

7 Vadaeni ia ese ma lau ia hakaua, magu ena iduara ta ena badibadinai, bona magu lalonai ia noho matuna lau dekenai ia hedinaraia. 8 Ia gwau, “Tanobada tauna e, magu do oi geia iniseni.” Lau geia, matu lau karaia, bona iduara ta lau davaria. 9 Ia gwau, “Iduara do oi raka vareai, kara dika rohoroho bada herea gaudia unuseni idia karaia, be do oi itaia.”

10 Vadaeni lau raka vareai bona lau itaia. Bona unuseni be idia rau gaudia idauidau bona boroma dika rohorohodia, bona Israela taudia edia kaivakuku ibounai edia laulaudia be haba dekenai idia torea vadaeni. 11 Unai laulau edia vairana dekenai Israela tau badadia ibounai 70 idia gini noho, bona Iasanaia Sapana be idia edia huanai ia gini. Idia ta ta be mai edia gida huaia auri kapusi, edia imadia dekenai, bona mai bonana muramura ena kwalahu be kapusi dekena amo idia daekau lao noho.

12 Lohiabada ese lau ia nanadaia, ia gwau, “Tanobada tauna e, oi itaia, a? Israela tau badadia ese hunia dekenai idia karaia noho gauna oi itaia, a? Idia ese dirava koikoi edia laulaudia momo idia noho daiutu lalonai idia tomadiho noho. Idia gwau, ‘Lohiabada ese ai do ia itaia lasi, ia ese Israela ia rakatania vadaeni.’ ”

13 Lohiabada ese lau ma ia hamaoroa, ia gwau, “Kara dika rohorohodia haida, inai kara idia hanaia gaudia, idia ese idia karaia noho, be do oi itaia.”

14 Vadaeni ia ese Dubu Helaga ena mirigini kahana iduara ena raka vareai gabuna dekenai lau ia hakaua lao. Unuseni hahine haida lau itaia, idia helai diho, Tamusu dirava ia mase dainai idia taitai noho.

15 Lohiabada ese lau ia hamaoroa, ia gwau, “Tanobada tauna e, inai be oi itaia vadaeni, a? To kara dika rohoroho haida, inai kara idia hanaia gaudia, be do oi itaia.”

16 Vadaeni ia ese Dubu Helaga ena lalona dekenai ia noho maguna ena lalonai lau ia hakaua lao. Unuseni, Lohiabada ena Dubu Helaga ena vairanai, dehe bona boubou patana edia huanai, tau ibounai 25 bamona idia gini. Edia dorudia be Dubu Helaga idia henia, bona edia vairadia be dina ia daekau kahana dekenai idia henia. Idia ese dina idia tomadiho henia, dina ia daekau lao neganai.

17 Lohiabada ese lau ia hamaoroa, ia gwau, “Tanobada tauna e, inai kara oi itaia vadaeni, a? Iuda besena taudia ese unai kara dika rohorohodia iniseni idia karaia noho be gau maragina sibona, a? Unai dainai idia ese tano be dagedage dekenai idia hahonua noho, bona idia ese lau idia habadua momokani noho? Ma hari oi itaia, idia ese lau idia matauraia lasi momokani, idia ese lau idia negea momokani karana idia karaia noho. 18 Unai dainai lau ese badu mai siahu bada karadia do lau karaia. Lau ese edia hisihisi do lau laloa lasi, bona idia do lau bogahisihisi henia lasi. Idia ese lau dekenai do idia guriguri mai boiboi bada danu, to lau ese idia do lau kamonai henia lasi.”