1 Iakobo be iena laolao ma ia raka lao, vadaeni Dirava ena aneru momo danu ia hedavari. 2 Iakobo ese ia itadia, vadaeni ia gwau, “Inai be Dirava ena tuari orea.” Unai dainai unai gabu ena ladana ia atoa, “Tuari orea rua.”

3 Iakobo ese iena hesiai taudia ia siaia guna, iena kakana Esau dekenai do idia lao, Seiri ena tano lalonai. Unai be Edoma ena tano. 4 Idia dekenai ia hadibaia, ia gwau, “Lauegu lohia Esau dekenai umui hamaoroa, umui gwau, ‘Lau, oiemu hesiai tauna Iakobo, lau gwau lau be Labana danu lau noho ia mai bona hari. 5 Lau be mai egu boromakau, bona doniki, bona mamoe bona nani, bona hesiai taudia bona hesiai hahine. Lohia e, hereva lau siaia oi dekenai, sedira oiemu laloa do ia namo lau dekenai totona.’ ”

6 Hereva abia lao taudia Iakobo dekenai idia giroa lou neganai idia gwau, “Ai be oiemu kakana Esau danu ai hedavari, ia be hari ia mai noho, oi danu ia hedavari totona, iena orea taudia 400 danu.”

7 Iakobo be ia gari dikadika, iena kudouna danu ia hekwarahi bada. Vadaeni iena orea taudia bona iena mamoe bona nani, iena boromakau, iena kamelo danu, be orea rua dekenai ia haria. 8 Ia laloa, “Bema Esau ese orea ta ia tuari henia, sedira ta be do ia heau mauri.”

9 Vadaeni Iakobo ia guriguri, ia gwau, “Lauegu tubuna Aberahamo ena Dirava e, lauegu tamana Isako ena Dirava e, mani oi kamonai! Guna oi hereva lau dekenai, oi gwau, ‘Oiemu tano bona oiemu varavara taudia dekenai do oi giroa lou, vadaeni do lau hanamoa oi.’ 10 Oiemu bogahisihisi bona oiemu gwauhamata hamomokania kara ibounai, lau oiemu hesiai tauna dekenai oi henia, be lauegu namo ia hegeregere lasi. Lau be Ioridane Sinavai lau hanaia lao neganai, lauegu imana dekenai be itotohi sibona mo. To hari be mai orea rua danu lau giroa mai vadaeni. 11 Oi dekenai lau noinoi inai, mani lauegu kakana Esau ena siahu dekena amo do oi hamauria lau. Badina be lau gari, ia be do ia mai, do ia tuari henia ai dekenai, lauegu natuna bona edia sinadia do ia aladia mase. 12 Oiemu gwauhamata mani oi laloa, oi gwau, ‘Momokani, lau ese do lau hanamoa oi, bona oiemu natuna bona tubuna momo herea oi dekenai do lau henia, kone miri bamona, duahia diba lasi.’ ”

13 Unai hanuaboi Iakobo be unuseni ia kamepa, vadaeni iena kohu dekena amo harihari gaudia ia abia, iena kakana Esau ena. 14 Gaudia be inai: Nani hahine 200 bona nani tatau 20, mamoe hahine 200 bona mamoe tatau 20, 15 kamelo 30 mai edia natuna danu, boromakau hahine 40, boromakau tatau 10, doniki hahine 20, bona doniki tatau 10. 16 Inai ibounai be iena hesiai taudia dekenai ia henia, ta ta edia orea, edia orea dekenai, bona ia gwau, “Umui raka guna, orea ta ta umui hakaua lao, mai pada ta ta.”

17 Do ia raka guna tauna dekenai ia hamaoroa, ia gwau, “Lauegu kakana Esau danu do umui hedavari neganai, do ia nanadaia oi dekenai, do ia gwau, ‘Oiemu biaguna be daika? Edeseni do umui lao? Inai ubua gaudia umui emui vairanai be daika ena?’ 18 Vadaeni, do oi haere henia, oi gwau, ‘Inai be oiemu hesiai tauna Iakobo ena. Iena harihari gaudia ia siaia, lauegu biaguna Esau ena. Iakobo danu aiemai murina dekenai ia mai noho.’ ”

19 Orea namba 2 hakaua tauna dekenai danu inai bamona do ia hereva, orea namba 3 hakaua tauna danu, bona idia edia murina dekenai orea ta ta hakaua taudia ibounai dekenai inai hereva tamona ia henia, ia gwau, “Esau danu umui hedavari neganai, inai bamona do umui hereva henia. 20 Do umui gwau, ‘Oiemu hesiai tauna Iakobo be aiemai murina dekenai ia mai noho.’ ” Iakobo be inai bamona ia laloa, “Lauegu harihari gaudia dekena amo, Esau ena badu do lau koua, bona gabeai lau hedinaraia iena vairana dekenai neganai, sedira do ia abia dae lau.” 21 Unai dainai, harihari gaudia be hesiai taudia ese idia abia lao guna, to Iakobo be unai hanuaboi kamepa dekenai ia noho.

22 Hanuaboi momokani neganai Iakobo ia toreisi, iena adavana ruaosi bona iena hesiai hahine ruaosi, bona iena natuna tatau 11 ia abidia, sinavai maragina ena ladana Iaboka idia hanaia gwauraia. 23 Ia ese ibounai ia abidia lao, sinavai unai kahana dekenai idia hanaia lao. Vadaeni ia sibona ia giroa lou, iena hesiai taudia ia siaidia lao, iena kohu ibounai idia abia hanaia. 24 To Iakobo be sibona ia noho, vadaeni Tau ta ia danu idia rosia helulu, daika do ia kwalimu totona, ia lao bona daba kahirakahira. 25 Inai Tau ia diba ia be do ia kwalimu diba lasi, vadaeni ia ese Iakobo ena mamuna varovaro dekenai ia dogoatao, unai dainai Iakobo ena mamuna ataiai dagira turia komukomu gabuna ia kokia, idia rosia helulu lalonai. 26 Vadaeni inai Tau ia gwau, “Lau oi dogoatao noho lasi, badina be daba rere ia kahirakahira vadaeni.”

To Iakobo ia gwau, “Lau be oi do lau dogoatao noho, ela bona oi ese do oi hanamoa lau dekenai.”

27 Vadaeni inai Tau ia gwau, “Oiemu ladana be daika?” Ia haere, ia gwau, “Lauegu ladana be Iakobo.”

28 Inai Tau ma ia gwau, “Harihari ia lao bona hanaihanai oiemu ladana be Iakobo lasi, oiemu ladana be Israela, badina be Dirava danu bona taunimanima danu oi rosia helulu, daika do ia kwalimu totona, bona oi ese oi kwalimu vadaeni.”

29 Vadaeni Iakobo ese inai Tau dekenai ia nanadaia, ia gwau, “Mani emu kara oiemu ladana oi hadibaia lau dekenai.” Inai Tau ia gwau, “Badina be dahaka lauegu ladana oi nanadaia?” Vadaeni ia ese Iakobo ia hanamoa.

30 Vadaeni Iakobo ese unai gabu ena ladana ia atoa Peniela, ena anina be “Dirava ena vairana”. Ia gwau, “Badina be Dirava danu ai ruaosi ai ta ta emai vairana ta ta dekenai ai henia, to lau do mauri noho vadaeni.”

31 Vadaeni daba ia rere neganai, Iakobo ese Peniela ia rakatania, to ia raka namonamo lasi, badina iena mamuna be ia dika. 32 Unai dainai Israela ena bese taudia be mamuna ena ataiai dagira turia ena varovaro idia ania lasi ia mai bona harihari, badina inai varovaro be Iakobo dekenai, Dirava ese ia dogoatao vadaeni.