1 Abidadama ena anina be inai bamona: Ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.

2 Edia abidadama dainai, Dirava ese sene taudia ia hanamoa.

3 Ita abidadama henia, vadaeni ita diba Dirava ena hereva ese tanobada bona guba ia karaia. Unai dainai itaia lasi gaudia dekena amo, Dirava ese itaia gaudia ia karaia.

4 Abela ese Dirava ia abidadama henia, bona boubou gauna Dirava dekenai ia henia. Dirava ese Abela ena boubou gauna ia ura henia, to Kaino ena boubou gauna ia ura henia lasi. Abela ese Dirava dekenai ia abidadama henia, unai dainai Dirava ese kara maoromaoro tauna ia gwauraia. Inai be momokani, badina Dirava ese Abela ena boubou gauna ia abia dae. Vadaeni Abela ia mase, to iena abidadama dekena amo, ia do hereva noho.

5 Enoka ese Dirava ia abidadama henia, unai dainai Dirava ese guba dekenai ia abia daekau. Ia mase lasi. Taunimanima ibounai ese Enoka idia tahua mase, to idia davaria lasi, badina Dirava ese ia abia vadaeni. Buka Helaga ia gwau, Enoka be ia do abia daekau lasi neganai, ia ese Dirava ena ura ia badinaia momokani. 6 Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.

7 Noa ese Dirava ia abidadama henia, vadaeni Dirava ese dohore idia vara gaudia Noa dekenai ia hadibaia guna. Vadaeni Noa ese Dirava ia kamonai henia, bona lagatoi badana ia karaia. Noa, mai ena hahine, bona mai edia natudia danu ese lagatoi dekenai idia mauri noho, dika idia davaria lasi. Noa ena abidadama ese tanobada taudia ibounai ia kota henia bamona. Bona Noa ena abidadama dainai, Dirava ese kara maoromaoro tauna ia gwauraia. Ma Dirava idia abidadama henia taudia ibounai, be Dirava ese maoromaoro do ia gwauraidia.

8 Aberahamo ese Dirava ia abidadama henia. Unai dainai Dirava ese Aberahamo ia boiria, vadaeni Aberahamo ese Dirava ena hereva ia kamonai henia. Iena hanua ia rakatania, Dirava ese ia ura do ia henia tanona dekenai do ia lao totona. Aberahamo be ia lao gwauraia gabuna ia diba lasi. To ia abidadama henia, vadaeni ia lao. 9 Aberahamo ese Dirava ia abidadama henia dainai, Dirava ese ia gwauhamata do ia henia tano dekenai, idau bese tauna bamona ia noho. Ia be palai ruma lalonai ia noho, Isako bona Iakobo danu. Idia ruaosi danu ese unai gwauhamata be Dirava dekena amo idia abia.

10 Nega ibounai Aberahamo ese hanua badana ta totona ia naria noho, mai abidadama danu. Unai hanua be mai ena nadi badina aukana, bona mai goadana. Unai hanua be Dirava sibona ese iena palani hegeregerena ia karaia, bona ia haginia danu.

11 Iena abidadama dainai, Sara ese goada ia abia, vadaeni ia rogorogo. Ia buruka herea dainai, natuna ta do ia havaraia dala be lasi momokani, to Sara ese Dirava ia abidadama henia. Ia diba Dirava ese iena gwauhamata do ia badinaia. 12 Aberahamo be buruka momokani, iena mase be kahirakahira. To unai tau tamona dekena amo, bese bada herea ia vara. Edia momo be guba ena hisiu idia momo herea hegeregerena, bona kone ena miri bamona.

13 Edia abidadama lalonai, inai tau gunadia ibounai idia mase. Dirava ena gwauhamata ena anina idia do davaria lasi. To daudau herea dekena amo, unai gwauhamata gaudia idia itaia, bona idia moale bada, idia gwau, “Ai be gabu idau taudia bamona inai tano dekenai ai noho. Ai be inai tanobada dekenai do ai noho daudau lasi.”

14 Unai bamona idia hereva taudia edia hereva anina be ia hedinarai vadaeni. Idia ese edia tano korikori idia tahua. 15 Idia rakatania tanona idia laloa lou lasi. Edia giroa lou dalana ia noho, to idia ura lasi. 16 To idia ura korikori tanona sibona idia laloa, inai be guba. Unai dainai, idia ese Dirava idia gwauraia edia Dirava, bona Dirava be idia dainai ia hemarai lasi. Ia ese idia totona hanua badana ia karaia hegaegae vadaeni.

17 Abidadama dainai Aberahamo ese iena natuna Isako ia abia, boubou gauna bamona Dirava dekenai ia henia. Unai be, Dirava ese Aberahamo ena abidadama ia tohoa neganai. Oibe, Aberahamo ia diba Dirava ese iena gwauhamata ia henia, to iena natuna tamona be boubou gauna bamona do ia alaia gwauraia. 18 Dirava ese guna ia hereva henia, ia gwau, “Isako dekena amo oiemu bese do ia vara.” 19 To Aberahamo ia daradara lasi, ia laloa, “Bema Isako ia mase, Dirava be mai ena siahu do ia hatorea isi lou.” To inai bamona ita herevalaia diba, ani? “Aberahamo ese Isako ia abia lou mase dekena amo.”

20 Abidadama dainai, Isako ese Iakobo bona Esau ia hanamoa, bona gabeai do idia vara gaudia ia gwauraia.

21 Abidadama dainai, Iakobo kahirakahira ia mase neganai, Iosepa ena natuna ruaosi ia hanamoa. Iena itotohi ena kwarana latanai ia tabekau, vadaeni ia ese Dirava dekenai ia tomadiho henia.

22 Iosepa ese Dirava ia abidadama henia dainai, ia ese kahirakahira ia mase neganai, Israela besena Aigupito do idia rakatania sivaraina ia gwauraia guna. Iena turiana do idia guria dalana danu ia gwauraia.

23 Mose ena tamana bona sinana ese Dirava idia abidadama henia dainai, Mose ia vara neganai hua toi idia hunia. Idia itaia, ia be mero namona momokani, vadaeni mai gari lasi danu, king ena oda idia kamonai henia lasi.

24 Mose ese Dirava ia abidadama henia dainai, ia bada neganai, ia ura lasi ia idia gwauraia Farao natuna hahine ena natuna. 25 Ia laloa Dirava ena bese taudia danu do ia hisihisi hebou be namo. Kara dika ena moale, nega daudau lasi idia noho gaudia, be ia ura lasi. 26 Mose ia laloa, Keriso dainai hemarai bona hisihisi do ia abia be namo. To Aigupito ena kohu momo do ia abia be dika. Badina be Dirava do ia henia davana namona ia laloa.

27 Mose ese Dirava ia abidadama henia. Unai dainai ia toreisi, Aigupito ia rakatania, king ena badu dekenai ia gari lasi. Mose ena lalona ia goada noho, ita itaia diba lasi Diravana, be Mose ese matana dekenai ia itaia bamona. 28 Mose ese Dirava ia abidadama henia dainai, Pasova ia badinaia, bona iduara edia latanai rara ia atoa. Vadaeni alaia aneruna ese Israela edia vara guna memero ia alaia lasi.

29 Israela taudia ese Dirava idia abidadama henia dainai, Davara Kakakaka idia raka hanaia, tano kaukau dekenai idia raka bamona. To Aigupito taudia ese unai bamona idia raka toho neganai, idia maloa, idia mase.

30 Israela taudia ese Dirava idia abidadama henia dainai, Ieriko hanua ena magu ia moru diho, dina 7 unai hanua idia raka hagegea murinai. 31 Ariara hahine Rahaba ese Dirava ia abidadama henia dainai, ia ese Israela hasinadoa taudia ruaosi edia itaia hunia gaukara ia durua. Vadaeni abidadama lasi taudia danu, be Rahaba ia mase lasi.

32 Ma dahaka do lau gwauraia? Gideona bona Baraki bona Samson bona Iepeta bona Davida bona Samuela bona peroveta taudia herevalaia totona, lauegu nega be hegeregere lasi. 33 Unai taudia ese Dirava idia abidadama henia dainai, idia ese tanobada basileia momo idia tuari henia, bona idia kwalimu. Kara maoromaoro idia karaia, bona Dirava ena gwauhamata gauna idia davaria. Idia ese laiona edia uduna idia koua. 34 Lahi siahu badadia momokani idia habodoa. Tuari kaia dekena amo idia heau mauri. Edia manokamanoka idia negea, goada idia abia. Tuari lalonai idia be mai siahu. Idau bese edia tuari taudia idia halusia. 35 Hahine danu ese edia mase taudia idia davaria lou, idia toreisi lou dainai. Haida be dibura ruma lalonai, vadaeni dibura ruma naria taudia ese idia dadabadia ela bona idia mase. Oibe, haida be mai edia mauri dalana bema dala maorona idia negea, to Dirava idia badinaia noho dainai, mase idia davaria. To mase idia laloa lasi, badina be idia diba, Dirava ena toreisi lou ena mauri namo herea do idia davaria.

36 Ma haida be idia dagedage henidia taudia ese idia kirikirilaidia, idia kwadidia, auri dekenai idia guidia, bona dibura ruma lalonai idia koudia. 37 Nadi dekenai idia hodoa, idia mase, iri dekenai idia utua kahana rua, idia mase, tuari kaia dekena amo idia aladia mase. Idia haida madi, mamoe kopina bona nanigosi kopina, dabua bamona idia karaia, idia loaloa. Idia be ogogami, hisihisi idia abia, bona taunimanima ese idia hadikadia. 38 Unai dainai taunimanima idia noho lasi gabudia bona ororo dekenai idia loaloa. Kohua bona guri lalonai idia noho. Badina idia be taunimanima namodia, bona tanobada noho taudia edia kara be hegeregere lasi unai abidadama taudia be edia huanai do idia noho.

39 Oibe, inai taunimanima namodia ese Dirava idia abidadama henia, bona ladana namo herea idia abia. To Dirava ena gwauhamata gaudia be idia do davaria lasi, dohore. 40 Badina be Dirava ese inai dala namona ia laloa: Ia ura lasi idia sibona ese unai gwauhamata anina do idia davaria. To ia ura ita be idia danu nega tamona unai davana namona, mauri hanaihanai, do ita abia hebou. Vadaeni idia be ita danu idia noho dainai, idia ese unai davana namona, mai goeva momokani danu, do idia davaria.