1 Lau Iamesi inai. Lau be Dirava bona Lohiabada Iesu Keriso edia hesiai tauna.

Lau ese inai revareva Iuda Keristani taudia ibounai tanobada gabu ibounai dekenai lau torea inai. Umui ese emui gabu korikori umui rakatania, tanobada idauidau dekenai umui noho. Umui lau hanamoa henia inai.

2 Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona. 3 Badina be umui diba, dibagani o hisihisi ese emui abidadama idia tohoa neganai, goada bona haheauka idia havaraia noho. 4 Vadaeni nega ibounai metau bona hisihisi lalonai do umui haheauka noho, ela bona inai haheauka emui lalona dekenai ia goada momokani. Unai neganai emui kara be namo, bona Dirava ena dala hegeregerena do umui raka, kerere ta lasi.

5 Bema umui ta be aonega lasi, namona be Dirava do ia noia, vadaeni Dirava ese aonega ia dekenai do ia henia. Badina be Dirava ese taunimanima ibounai dekenai gau namodia ia henia noho. Bona tau ta bema ia be gau ta lasi, vadaeni Dirava do ia noia neganai, Dirava ese do ia badu henia lasi. 6 To unai tau ia noinoi neganai, namona be ia abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao, doria mai, ia be gini gabuna lasi. 7 Bema daradara tauna ia laloa, gau ta Lohiabada dekena amo do ia abia diba, iena laloa be anina lasi. 8 Badina be laloa rua tauna be iena kara ibounai lalonai, ia ese dala tamona sibona ia badinaia diba lasi.

9 Keristani tauna ogogamina, bema Dirava ese ia abia isi neganai, do ia moale be namo. 10 To kohu momo tauna, bema Dirava ese ogogami tauna ia halaoa neganai, ia danu do ia moale be namo. Badina be kohu momo tauna do ia mase, be rei ena huahua ia mase noho bamona. 11 Umui diba, dina ia daekau neganai, iena siahu ese ava ia hakaukaua, vadaeni iena huahua ia moru diho, iena hairai be ia ore. Inai bamona danu, kohu momo tauna ese iena gaukara ia karaia noho neganai, do ia mase.

12 Hisihisi bona dibagani ia abia neganai ia gini noho, mai haheauka danu tauna be namo. Badina be unai dika dekena amo ia kwalimu neganai, ia ese Dirava ia gwauhamata gauna, mauri hanaihanai, iena kwalimu ahuna, do ia davaria. Dirava ia hereva vadaeni, ia idia lalokau henia taudia ibounai ese unai mauri hanaihanai do idia davaria. 13 Bema tau ta ese dibagani ia davaria, o dika ta ese ia veria noho neganai, inai bamona do ia hereva lasi, “Dirava ese lau ia dibagania noho.” Badina be kara dika ese Dirava ia dibagania diba lasi momokani. Bona Dirava ese tau ta do ia dibagania lasi. 14 To dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho. 15 Vadaeni iena ura dikadia be idia rogorogo bamona, unai murinai kara dika ia havaraia. Bona kara dika ia tubu bona ia bada neganai, mase ia havaraia.

16 Lauegu varavara e, lauegu lalokau, do umui laloa kerere lasi. 17 Gau namodia ibounai, bona harihari gaudia namodia momokani ibounai, be Dirava dekena amo idia diho mai. Dirava ese diari ibounai ia karaia, bona nega haida idia ese edia toana idia senisia, nega haida mai edia dibura nega. To Dirava ese iena kara ia senisia lasi, ia diari hanaihanai, bona ia be mai ena dibura sisina lasi. 18 Ia sibona ena ura dainai, Dirava ese iena hereva momokani dekena amo, ita dekenai mauri matamata ia henia, vadaeni iena vara guna natuna taudia ita lao. Momokani, Dirava ia karaia taudia ibounai edia huanai, ita be iena vara guna natuna taudia.

19 Lauegu varavara e, egu lalokau, inai sisiba umui laloaboio lasi. Umui ta ta ibounai ese hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi. 20 Badina be taunimanima edia badu ese Dirava ena kara maoromaoro ia havaraia diba lasi. 21 Unai dainai miro karadia ibounai, laloa dikadia, bona kara dikadia ibounai do umui rakatania. Dirava henunai do umui noho, bona iena hereva, emui lalona dekenai ia hadoa gauna, do umui abia dae, mai emui manau danu. Inai hereva ese umui ia hamauria diba.

22 To Dirava ena hereva do umui kamonai kava lasi, to umui badinaia danu. Bema umui kamonai kava, umui sibona umui koia noho. 23 Bema tau ta be hereva ia kamonai sibona, to ia badinaia lasi, ia be sibona ena vairana ena toana hevarivari lalonai ia itaia bamona. 24 Iena vairana ena toana korikori ia itaia, vadaeni ia raka siri, bona maoromaoro iena vairana ena toana ia laloaboio momokani. 25 To taravatu namona bona goevagoeva momokani ia noho, ia ese kara dika ena siahu dekena amo ita ia ruhaia vadaeni. Tau ta bema inai taravatu ia itaia namonamo noho, bona ia badinaia noho, bona ia kamonai kava lasi, to ia karaia momokani neganai, unai tau be namo. Dirava ese unai tau, iena kara ibounai lalonai, do ia hanamoa.

26 Tau ta bema ia laloa ia be Keristani tauna namona, to iena malana ia naria diba lasi neganai, ia ese sibona ena lalona ia koia noho. Unai tau ena Keristani kara be anina lasi. 27 To Keristani tauna ena kara goevagoeva bona momokani, Tamana Dirava ena vairanai be inai: Bema tamana bona sinana lasi maragidia bona vabu be mai edia hisihisi, ia ese do ia naridia. Bona tanobada ena kara mirodia dekena amo do ia raka siri.