1 Israela taudia ma Lohiabada dekenai idia kara dika lou. Vadaeni Lohiabada ese Pilistia taudia edia siahu henunai ia atodia, lagani 40 lalonai.

2 Tau ta be Sora hanua dekenai ia noho, iena ladana be Manoa. Ia be Dano iduhu tauna. Iena adavana be gabani, natuna ia havaraia diba lasi. 3 Vadaeni Lohiabada ena aneru ese Manoa ena adavana dekenai ia hedinarai, ia hereva henia, ia gwau, “Momokani oi be gabani, natuna oi havaraia diba lasi, to oi be do oi rogorogo, bona mero ta do oi abia. 4 Unai dainai do oi naria namonamo, uaina o kekero muramura do oi inua lasi, bona gau mirona ta do oi ania lasi. 5 Badina be do oi rogorogo, mero ta do oi abia. Iena kwarana huina do oi utua lasi, badina be unai mero be iena vara dinana dekena amo do ia helaga, Dirava ena, ia be Nasiri orea tauna. Ia ese Israela do ia hamauria hamatamaia Pilistia taudia edia siahu dekena amo.”

6 Vadaeni hahine be ia lao, iena adavana ia hamaoroa, ia gwau, “Dirava ena tau ta lau dekenai ia mai, iena vairana be Dirava ena aneru ena vairana bamona. Vadaeni lau gari, bona ia mai gabuna lau nanadaia lasi. Ia sibona iena ladana ia gwauraia lasi. 7 To, ia ese lau ia hamaoroa, ia gwau, ‘Oi be do oi rogorogo, mero ta do oi abia. Unai dainai uaina o kekero muramura do oi inua lasi, bona gau mirona ta do oi ania lasi, badina unai mero be do ia helaga, Dirava ena, Nasiri orea tauna. Ia be unai bamona, iena vara dinana dekena amo ela bona iena mase dinana.’ ”

8 Vadaeni Manoa ese Lohiabada dekenai ia guriguri, ia gwau, “Lohiabada e, oi dekenai lau noinoi, mani emu kara, hari oi siaia tauna, ma do oi siaia mai lou, ia ese ai ma do ia hadibaia. Badina ai ura diba, inai mero ia vara neganai, ia dekenai dahaka do ai karaia.”

9 Dirava ese Manoa ena noinoi ia kamonai, Dirava ena aneru ese unai hahine dekenai ma ia hedinarai lou, ia be uma dekenai ia noho neganai. To unai neganai, iena tau Manoa be ia danu ia noho lasi. 10 Vadaeni hahine be ia heau haraga, iena tau ia hamaoroa, ia gwau, “Vanegai lau dekenai ia mai tauna be ia giroa mai vadaeni.”

11 Manoa be ia toreisi, iena adavana ena murinai ia raka, bona unai tau dekenai ia ginidae, vadaeni ia hereva, ia gwau, “Inai hahine dekenai ia hereva henia tauna be oi, ani?”

Ia gwau, “Io, lau inai.”

12 Manoa ma ia gwau, “Vadaeni lauegu hahine oi hereva henia gaudia do idia vara momokani neganai, inai mero be edena bamona do ia noho, bona dahaka do ia karaia?”

13 Lohiabada ena aneru ia haere, ia gwau, “Oiemu adavana ese lau hamaoroa karadia ibounai do ia karaia momokani. 14 Vain ena anina ta do ia ania lasi, uaina o kekero muramurana ta do ia inua lasi, bona aniani mirona ta do ia ania lasi. Lau hamaoroa gaudia ibounai do ia badinaia.”

15 Manoa ese Lohiabada ena aneru dekenai ia hereva, ia gwau, “Mani emu kara, ai ura ai dekenai do oi noho sisina, ela bona nanigosi natuna ta do ai nadua hegaegae, do oi ania.”

16 To Lohiabada ena aneru ese Manoa dekenai ia haere, ia gwau, “Bema umui dekenai lau noho nega sisina, emui aniani do lau ania lasi. To bema aniani umui ura nadua hegaegae neganai, boubou gauna bamona Lohiabada dekenai do umui henia.” Manoa ia diba lasi unai be Lohiabada ena aneru.

17 Vadaeni Manoa ese Lohiabada ena aneru ia nanadaia, ia gwau, “Oiemu ladana be daika? Ai ura do ai diba, vadaeni oiemu hereva edia anina idia vara momokani neganai, oi be do ai hanamoa.”

18 Lohiabada ena aneru ia gwau, “Badina dahaka lauegu ladana umui ura diba? Ia be hoa gauna ta.”

19 Unai dainai Manoa ese nani ena natuna bona paraoa boubou ia abia, nadi boubou patana dekenai ia gabua, Lohiabada dekenai ia henia. Bona Manoa mai ena adavana idia itaia noho neganai, Lohiabada ese hoa kara ia karaia. 20 Lahi hururu be boubou patana dekena amo ia daekau lao nega lalonai, Manoa bona iena adavana ese Lohiabada ena aneru idia itaia, lahi dekena amo ia daekau lao guba ataiai dekenai. Idia ruaosi idia tui diho, edia vairana be tano dekenai idia atoa.

21 Bona unai aneru be Manoa bona adavana dekenai ia hedinarai lou lasi. Vadaeni Manoa be iena lalona dekenai ia diba unai be Lohiabada ena aneru.

22 Manoa ese iena adavana ia hamaoroa, ia gwau, “Momokani, ita be do ita mase, badina be Dirava ita itaia dainai.”

23 To iena adavana ia haere, ia gwau, “Bema Lohiabada ia ura ita do ia alaia neganai, ia ese iseda boubou be do ia abia dae lasi. Bona ia ese inai hoa kara ita dekenai do ia hedinaraia lasi. Bona ia ese do idia vara gaudia ita dekenai do ia hadibaia lasi.”

24 Vadaeni unai hahine ese mero ta ia abia, iena ladana ia atoa Samson. Mero be ia tubu daekau namonamo, bona Lohiabada ese ia hanamoa. 25 Bona Lohiabada ena Lauma ese Samson ia hagoadaia hamatamaia, Sora bona Esetaoli edia huanai, Dano iduhu edia kamepa dekenai ia noho neganai.