12
Ieremia ese Lohiabada dekenai ia tai henia
1 Lohiabada e, bema lau be oi dekenai gau ta totona,
lau maumau gwauraia neganai,
lau diba oi be nega ibounai oiemu kara be maoromaoro.
To lau ese oiemu kota henia kara ta lau ura herevalaia, gauna inai:
Badina dahaka kara dika taudia edia dala be ia namo lao noho?
Bona dahaka dainai kara koikoi taudia edia noho ia namo lao noho?
2 Oi ese idia oi hadoa,
bona edia ramuna idia atoa.
Idia be idia tubu daekau,
bona edia huahua idia atoa.
Oiemu ladana namona be idia herevalaia noho,
to edia kudoudia be oi dekena amo,
daudau idia noho.
3 Lohiabada e, oi be lau oi diba.
Oi ese lau oi itaia noho,
bona egu laloa oi dekenai be oi ese oi tohoa noho.
Unai tau dikadia do oi veridia lao,
do idia alaia gwauraia mamoedia bamona.
Do oi atodia siri,
ela bona edia mase negana ia ginidae.
4 Tano be do ia kaukau noho,
ela bona edena negai?
Gabu ibounai dekenai rei be ia kaukau noho,
ela bona edena negai?
Tano dekenai noho taudia edia kara dika dainai,
tano ena boroma ibounai,
bona manu danu idia mase noho.
Badina be taunimanma ese,
inai bamona idia gwauraia noho, idia gwau,
“Ita karaia noho kara,
be Dirava ese ia itaia noho lasi.”
Dirava ese Ieremia dekenai ia haere
5 Lohiabada ia gwau,
“Ieremia e, bema taunimanima danu oi heau helulu noho,
bona oi be manoka neganai,
oi be hosi danu edena bamona do oi heau helulu diba?
Bona bema tano namona dekenai oi moru neganai,
oi be Ioridane Sinavai ena uda gabuna,
edena bamona do oi raka hanaia diba?
6 Badina be oiemu tadikakana bona oiemu tamana ena iduhu taudia,
ese danu oi dekenai idia kara koikoi noho,
bona idia ese oi idia hadikaia gwauraia noho,
mai boiboi danu.
Bema nega ta idia ese oi dekenai idia hereva namo neganai,
idia do oi abidadama henia lasi.”
Lohiabada be iena bese taudia dainai iena lalona ia hisihisi
7 Lohiabada ia gwau,
“Lau ese Israela lau rakatania vadaeni.
Egu abia hidi besena lau negea vadaeni.
Lau lalokau henia besena,
be idia hadikaia gwauraia taudia edia siahu henunai lau atodia vadaeni.
8 Egu abia hidi bese taudia ese,
lau dekenai idia dagedage vadaeni,
uda dekenai ia noho laiona bamona.
Mai dagedage danu lau dekenai idia boiboi.
Unai dainai lau badu henidia noho.
9 Egu bese taudia be bogibada manu bamona.
Vamu ania manudia ese inai bogibada idia roho hagegea,
idia alaia mase gwauraia.
Umui lao, uda ena dagedage gaudia do umui boiria mai,
idia ese bogibada manu do idia ania ore totona.
10 Idau bese taudia edia king momo ese,
egu vain uma idia hadikaia ore.
Egu aniani havaraia umadia idia moia diho vadaeni.
Egu tano namona be taunimanima noho lasi gabuna idia halaoa vadaeni.
11 Idia ese tano kaukau idia halaoa vadaeni.
Egu vairana dekenai ia be anina lasi tano,
bona tau ta ese ia laloa lasi.
12 Tano kaukau ena ororo gabudia ibounai dekena amo,
tuari taudia be tano hadikaia ore totona idia mai noho.
Badina lau Lohiabada ese tuari lau siaia vadaeni,
inai tano ena kahana ibounai do lau hadikaia ore totona.
Tau ta lasi ese maino do ia davaria.
13 Egu bese taudia ese uiti idia hadoa,
to au giniginidia sibona idia haboua.
Idia ese idia hekwarahi bada,
to edia hekwarahi be anina lasi.
Egu badu siahu bada dainai,
edia aniani haboua gaukara be hemarai gauna sibona.”
Lohiabada ese Israela edia badibadinai noho basileia ia sisiba henia noho
14 Lohiabada ia gwau, “Egu bese Israela ena badibadinai idia noho bese taudia, egu bese ena tano idia hadikaia vadaeni taudia dekenai, inai bamona lau hereva, lau gwau: Lau ese emui tano dekena amo umui do lau kokia, tano dekena amo ava idia kokia bamona, bona lau ese Iuda taudia umui emui huanai dekena amo do lau kokia. 15 Iuda taudia lau kokia murinai, lau ese idia dekenai ma do lau bogahisihisi henia lou. Bona lau ese unai basileia idauidau bona bese ta ta do lau mailaia lou, edia tano ta ta dekenai ma do idia noho. 16 Bema inai idau bese taudia ese mai edia kudoudia ibounai danu egu bese taudia edia tomadiho daladia idia tahua, bona bema egu ladana dekenai do idia gwauhamata, do idia gwau, ‘Lohiabada ia mauri noho momokani,’ idia ese guna Bala dirava dekenai idia gwauhamata bamona, unai neganai idia be egu bese taudia edia huanai lau ese do lau haginidia, egu bese kahana ta. 17 To bema basileia ta ese lau do ia kamonai henia lasi, lau ese unai basileia do lau kokia momokani, bona do lau hadikaia ore. Lau inai Lohiabada, lau hereva vadaeni.”