1 Iehoiakimi, Iuda ena king Iosaia ena natuna, ena lohia lagani namba 4 lalonai, lau Ieremia dekenai Lohiabada ena hereva ia ginidae, Iuda taudia ibounai totona. Inai lagani lalonai Nebukanesa, Babulonia ena king ese iena king dagi ia hamatamaia. 2 Vadaeni lau ese Iuda taudia ibounai bona Ierusalema dekenai noho taudia ibounai lau hamaoroa, lau gwau, 3 “Lagani 23 lalonai, Iosaia Amona, Iuda ena king, ena lohia lagani namba 13 ia mai bona hari, Lohiabada ese lau dekenai ia hereva vadaeni, bona lau ese unai hereva hegeregerena umui lau sisiba henia vadaeni, to umui be umui kamonai lasi.

4 “Momokani Lohiabada ese iena peroveta taudia, iena hesiai taudia be umui dekenai ia siaidia lou, siaidia lou. 5 Idia ese umui idia hamaoroa, emui lalodia do umui giroa, umui ta ta ibounai emui kara dika bona kerere do umui rakatania, unai neganai umui be inai tano dekenai do umui noho diba. Inai tano be Lohiabada ese umui bona emui sene taudia dekenai ia henia vadaeni, ia lalonai do umui noho hanaihanai totona. 6 Dirava idaudia do umui tomadiho henia lasi, bona edia hesiai gaukara do umui karaia lasi. Bona umui karaia kaivakuku dekena amo Lohiabada do umui habadua lasi. Unai neganai Lohiabada ese umui do ia hadikaia lasi.

7 “To Lohiabada ese ia hereva noho, ia gwau, ‘Umui ese lau dekenai umui kamonai lasi, bona emui kaivakuku, emui imadia ese idia karaia gaudia dekena amo lau umui habadua vadaeni. Unai dainai, umui dekenai dika ia vara gauna, be umui sibona ese umui mailaia vadaeni.’ ”

8 Vadaeni Siahu Ibounai Lohiabada be inai bamona ia hereva, ia gwau, “Egu hereva umui kamonai henia lasi dainai, 9 lau ese mirigini kahana bese taudia ibounai, bona egu hesiai tauna Nebukanesa, Babulonia ena king danu do lau boiria, inai tano, bona ena taudia, bona inai tano idia hagegea basileia ibounai hadikaia totona do lau mailaidia. Lau Lohiabada ese inai Iuda bese, bona iena badibadinai noho basileia ibounai do lau hadikaia ore momokani, hoa mai gari bada hanaihanai gabudia do lau halaodia.

10 “Inai danu, kiri bona moale edia regena be unai gabudia dekena amo do lau hadokoa, bona headava matamata tauna bona hahine edia gadodia danu. Uiti idia moia maragimaragi nadi badadia edia regena do lau haorea, bona lamepa ibounai edia diari danu do lau habodoa unai gabudia dekenai. 11 Inai tano ena kahana ibounai be do idia hadikaia ore, hoa bona gari gabuna do ia lao, bona inai tano ena basileia ibounai taudia ese lagani 70 lalonai Babulonia ena king ena hesiai gaukara do idia karaia.

12 “To unai lagani 70 idia ore murinai, lau Lohiabada ese Babulonia ena king bona iena bese do lau panisia edia kara dika dainai. Bona lau ese Babulonia ena tano do lau hadikaia ore, do ia dika, ia lao bona hanaihanai. 13 Lau ese Babulonia ena latanai inai buka lalonai lau gwauraia guna dika davana ibounai do lau havaraia, Ieremia ese basileia ibounai edia latanai ia perovetalaia dikadia ibounai. 14 Badina be basileia momo bona king badadia ese Babulonia taudia do idia guia, edia hesiai taudia mai guia danu do idia halaodia. Lau Lohiabada ese edia davana do lau henidia, edia kara dikadia bona edia kerere hegeregerena.”

15 Lohiabada, Israela ena Dirava, ese lau dekenai ma ia hereva, ia gwau, “Inai uaina kapusi be egu badu dekenai ia honu noho. Egu imana dekena amo do oi abia, bona idia dekenai oi do lau siaia lao basileia ibounai dekenai do oi abia lao, do oi henidia, do idia inua totona. 16 Do idia inua neganai do idia mumuta, bona do idia kavakava, badina lau ese idia edia huanai tuari do lau siaia.”

17 Vadaeni lau ese Lohiabada ena imana dekena amo kapusi lau abia, bona ia ese idia dekenai lau ia siaia basileia ibounai dekenai unai kapusi lau henia, lau fosidia, do idia inua totona. 18 Ierusalema bona Iuda hanuadia, bona edia king taudia bona lohia taudia ese inai uaina idia inua, vadaeni ia ese gabu dikana, anina lasi tano, hoa mai gari bada gabuna idia ia halaoa, taunimanima ese do idia kirikirilaia, bona hereva dika henia totona, hari inai dina dekenai idia karaia noho hegeregerena.

19 Basileia ma haida edia taudia ese inai kapusi idia inua, edia ladadia be inai:

27 Unai neganai Lohiabada ese lau ia hamaoroa, ia gwau, “Taunimanima do oi hamaoroa, lau, Siahu Ibounai Lohiabada, Israela ena Dirava ese inai bamona lau oda henidia inai: ‘Inai kapusi do umui inua, do umui kekero, bona do umui mumuta, do umui moru diho, bona do umui toreisi lou lasi, tuari be umui dekenai do lau siaia dainai.’

28 “Bema idia ura lasi oiemu imana dekena amo kapusi do idia abia neganai, do oi hamaorodia, do oi gwau, Siahu Ibounai Lohiabada ese ia oda henia inai, ia gwau, ‘Vadaeni, do umui inua! 29 Kamonai! Lau ese egu ladana ia noho hanua lalonai dika bada lau havaraia hamatamaia noho, vadaeni umui laloa egu panisi dekena amo do umui heau diba, a? Lasi, davana abia dekena amo do umui heau mauri diba lasi, badina be lau ese tanobada ena kahana ibounai dekenai tuari do lau siaia lao. Lau inai, Siahu Ibounai Lohiabada lau hereva noho inai.’

30 “Ieremia e, oi ese egu hereva ibounai do oi gwauraia. Inai taudia dekenai do oi hereva inai bamona:

33 Unai neganai Lohiabada ese ia alaia ore vadaeni taudia edia tauanidia be tanobada ena dokona gabuna ela bona tanobada ena dokona gabuna dekenai do idia hekure noho. Tau ta ese idia dainai do ia taitai lasi, bona tau ta ese idia do ia haboua lasi, bona tau ta ese idia do ia guria lasi. Idia be tano ena kopina dekenai do idia noho, boromakau ena kukuri hegeregerena.