2 “Bema egu lalohisihisi ena metau,

be sikele dekenai idia tohoa,

bema egu laloa metau be sikele dekenai idia atoa neganai,

3 do idia davaria edia metau ese,

kone ena miri ena metau do idia hanaia.

Unai dainai egu hereva be mai badu kava bamona.

4 Siahu Ibounai Dirava ese,

iena diba dekena amo lau ia gwadaia.

Unai diba edia poisini,

be egu lauma ese ia inua noho.

Dirava ena gari gaudia ese,

lau idia hisihisi henia noho.

5 “Uda doniki be rei ia ania neganai ia tai noho, a?

O boromakau tau be mai ena aniani neganai,

ia boiboi noho, a?

6 Mamina lasi aniani,

be mai damena lasi danu taunimanima ese idia ania, a?

O gatoi ena kurokuro kahana be mai ena mamina, a?

7 Unai bamona aniani lau ura lasi, lau negea noho.

Lau ania neganai gorere ena mamina lau abia.

8 “Badina dahaka Dirava ese egu noinoi gauna ia henia lasi?

Egu guriguri dekenai badina dahaka ia kamonai lasi?

9 Egu noinoi gauna be inai:

Dirava ese lau do ia alaia mase.

Iena imana dekena amo egu mauri do ia hadokoa.

10 Bema unai bamona ia karaia neganai,

mase ena hisihisi bada lalonai, moale bada do lau davaria.

Badina be lau ese Helaga ena Dirava ena hereva,

be nega ta lau negea lasi.

11 “Egu goada be hegeregere lasi dainai,

lau mauri noho diba lasi.

Unai dainai anina be dahaka do lau haheauka noho?

12 Egu goada be nadi edia goada hegeregerena, a?

Egu tauanina be auri laboralabora hegeregerena, a?

13 Momokani lau be durua ta lasi.

Durua daladia ibounai,

be lau dekena amo ia abia siri vadaeni.

14 “Bema tau ta ese iena turana ia bogahisihisi henia diba,

to ia bogahisihisi henia lasi,

unai tau ese Siahu Ibounai Dirava dekenai gari henia kara,

be ia rakatania vadaeni.

15 Egu turana taudia e,

umui ese lau umui koia noho,

ororo dekena amo idia diho sinavai maragidia bamona.

Medu ia diho lasi neganai idia kaukau lao.

16 Unai sinavai maragidia be,

aisi bona sinou ese edia ranu heau dalana idia koua,

17 to siahu neganai unai sinavai maragidia idia veve ore.

Dina ena siahu dainai idia kaukau lao.

18 Kohu idia huaia kamelo,

be edia dala dekena amo idia raka siri,

ranu idia tahua noho,

bona tano kaukau dekenai ranu idia tahua kava,

idia mase.

19 Kohu idia huaia kamelo,

Sieba bona Tema dekena amo,

bona edia hoihoi loaloa taudia ese,

ranu idia tahua noho.

20 Idia ese sinavai edia ranu davaria totona idia abidadama noho,

to idia ginidae neganai, ranu be lasi,

edia abidadama ena anina idia davaria lasi.

21 Umui be unai sinavai bamona, lau dekenai.

Umui ese lau ia hadikaia gauna umui itaia noho,

bona umui gari noho dainai,

durua ta lau dekenai umui henia lasi.

22 Be, lau ese inai bamona lau gwau, a?

‘Lau dekenai harihari gauna ta umui henia,’

O nega ta lau gwau,

‘Lau do umui hamauria totona, emui moni do umui henia?’

23 O nega ta lau gwau,

‘Lau ia badu henia tauna dekena amo lau do umui hamauria,’ a?

O lau gwau,

‘Lau idia dagedage henia taudia dekenai moni do umui henia,’ a?

24 “Lau dekenai do umui hadibaia,

vadaeni regerege ta lasi do lau noho.

Egu kerere be lau dekenai do umui hedinaraia.

25 Hereva maoromaoro bona momokani ese,

taunimanima edia lalodia idia pidia momokani.

To emui hereva be anina lasi.

26 Egu lalona ia ore dainai,

lau be kavakava tauna bamona lau boiboi noho.

Unai dainai umui ese lau umui gwau henia, a?

27 “Inai, emui kara be inai bamona:

Umui ese laki gadara dekena amo,

tamana bona sinana lasi natudia umui hoihoilaia.

O, emui turana momokani umui hoia lao dekena amo,

moni bada herea umui abia.

28 Harihari egu vairana do umui itaia noho,

badina lau ese umui dekenai lau koikoi lasi.

29 Umui dekenai lau noinoi inai,

emui laloa lau dekenai do umui haidaua,

bona lau do umui samania kerere lasi.

Lau do umui gwauraia kerere lasi,

badina lau be lau maoromaoro noho.

30 Umui laloa lau be hereva koikoi lau gwauraia, a?

Lau be kerere bona maoromaoro edia idau,

be lau diba lasi, a?