19
Iobu ia gwau taunimanima ibounai ese idia dagedage henia, to Dirava sibona ese ia durua
1 Vadaeni Iobu ese iena turana taudia dekenai ia haere, ia gwau,
2 “Emui hereva dekena amo,
badina dahaka lau umui hisihisi henia noho?
3 Nega momo lau umui gwau henia noho,
bona lau umui hadikaia noho, hemarai lasi.
4 Bema momokani kerere lau karaia neganai,
inai kerere ese umui ia hadikaia, a?
5 Umui laloa lau be dika,
to umui sibona be namo, a?
Umui gwau, lauegu hisihisi ese egu kerere idia hamomokania.
6 To lau ese kerere ta lau karaia lasi.
Dirava ese inai bamona lau dekenai ia karaia,
sibona ena ura dainai.
Ia ese tarapu ia atoa vadaeni,
lau do ia dogoatao totona.
7 Dirava ena dagedage dainai lau tai noho,
to tau ta ese lauegu noinoi idia kamonai lasi.
Kota maoromaorona totona lau tai,
to ta ese lau ia durua lasi.
8 Dirava ese egu dala ia koua,
vadaeni lau hanaia diba lasi,
bona egu dala be dibura dekenai ia hunia vadaeni.
9 Egu kohu momo be Dirava ese ia abia siri vadaeni,
bona egu ladana namona be ia ese ia hadikaia vadaeni.
10 Ia ese kahana ibounai dekena amo lau ia botaia noho.
Mauri namona totona lau naria ena laloa,
be ia ese ia kokia vadaeni,
bona ia ese lau ia rakatania,
do lau manoka bona do lau mase totona.
11 Dirava ese lau dekenai ia badu,
bona lau ia hadikaia noho.
Ia ese lau dekenai ia tuari henia noho,
lau be ia dekenai bema lau tuari henia bamona.
12 Iena tuari taudia be ia ese ia siaia,
lau do idia tuari henia totona.
Egu palai ruma idia hagegea vadaeni,
bona dadaira idia geia vadaeni.
13 “Dirava ese egu tadikaka taudia,
be lau dekena amo ia abia siri vadaeni,
bona egu turana taudia dekenai lau be idau tauna dainai,
idia ura lasi lau.
14 Egu varavara bona turana ese,
lau idia rakatania vadaeni.
15 Egu ruma dekenai guna idia vadivadi taudia ese,
lau idia laloaboio vadaeni,
bona egu hesiai kekeni ese,
idau tauna lau idia halaoa vadaeni,
idia edia vairana dekenai lau be idau bese tauna.
16 Egu hesiai tauna lau boiria, to ia haere lasi.
Lau noia neganai danu ia ese lau ia durua lasi.
17 Egu adavana ese egu hahodi ena bonana ia ura lasi momokani,
bona egu tadikaka taudia be lau dekenai idia mai lasi.
18 Memero maragidia ese lau dekenai idia kirikiri,
idia ese lau idia ura henia lasi momokani.
19 Egu turana korikori taudia ese lau idia ura lasi,
bona lau ese lau lalokau henia taudia,
be lau dekena amo idia siri vadaeni.
20 Lauegu tauanina be ia maragi lao noho,
bona egu turiana be idia hedinarai.
21 “Egu turana taudia e,
mani lau dekenai do umui bogahisihisi henia,
badina be Dirava ena imana ese lau ia botaia vadaeni.
22 Badina dahaka umui ese lau umui dagedage henia noho,
Dirava ese ia karaia noho bamona?
Badina dahaka egu hisihisi umui habadaia noho?
23 “Egu hereva be tau ta ese buka lalonai do ia torea be namo,
24 o nadi palakana dekenai egu hereva do ia ivaia,
revareva aukadia bamona.
Do ia torea, do idia noho hanaihanai totona.
25 Badina be lau diba,
ia ese lau ia hamauria Diravana be ia noho,
bona nega dokona dekenai, ia ese lau do ia durua.
26 Vadaeni egu kopina be gorere dekena amo ia dika ore,
to egu tauanina ia do noho neganai,
lau ese Dirava do lau itaia.
27 Lauegu matana korikori dekenai do lau itaia,
ia be idau lasi tauna bamona do lau itaia.
“To egu laloa goada ia manoka lao,
badina be umui hereva, umui gwau,
28 ‘Edena bamona do ita hahisia?’
Umui ese dala umui tahua,
lau do umui hadikaia totona.
29 To harihari tuari kaia dekenai do umui gari,
badina inai tuari kaia,
Dirava ena badu unai,
ese kara dika taudia edia latanai ia moru noho,
bona unai dekena amo,
do umui diba, Dirava tamona sibona ese,
kerere ena davana ia karaia noho.”