“Dagedage gauna ladana Leviatano,

be kimai dekena amo oi veria diba, a?

O iena malana be varo dekenai oi guia diba, a?

2 Iena udubaubauna be varo dekenai oi dogoatao diba?

O kimai dekenai iena aukina oi veria diba?

3 Ia ese oi dekenai do ia noinoi,

o hereva manada dekenai,

oiemu bogahisihisi do ia tahua, a?

4 Ia ese oi dekenai do ia gwauhamata, do ia gwau,

‘Lau ese oiemu hesiai gaukara,

be do lau karaia hanaihanai, a?’

5 Oi ese do oi gadaralaia diba, manu bamona?

O do oi guia, bona hamanadaia,

oiemu kekeni edia gadara gauna, a?

6 Haoda taudia be Leviatano hoia totona,

iena davana do idia hepapahuahu, a?

O do idia haria,

hoihoi taudia do idia hoia totona, a?

7 Diba momo dekena amo,

iena kopina dekenai oi pidia diba, a?

O iena kwarana be karaudi dekena amo,

oi gwadaia diba, a?

8 Bema oiemu imana dekenai oi dogoatao neganai,

ia be oi dekenai do ia heatu henia,

mai dagedage bada.

Vadaeni oi ese do oi karaia lou lasi momokani.

9 Tau ta, bema Leviatano ia itaia neganai,

iena goada be ia ore,

bona gari dainai tano dekenai do ia moru.

10 Tau ta ese Leviatano do ia hanogaia lasi,

do ia dagedage bada garina,

bona tau ta,

be Leviatano ena vairanai do ia gini diba lasi.

11 Daika ese do ia heatu henia?

Tanobada tauna ta ese ia karaia diba lasi.

12 “Lau ura Leviatano ena aena do lau herevalaia,

iena tauanina ena goada lau ura gwauraia namonamo.

13 Daika ese iena kopina ia darea parara diba?

Daika ese iena kopina ia gwadaia diba?

Ia be auri bamona, ani?

14 Daika ese iena uduna ia kehoa diba,

badina iena isena be mai gari bada herea, ani?

15 Iena doruna be kesi momo bamona.

Idia be hakapua hebou, hakapua hebou,

bona auka, nadi bamona.

16 Inai kesi ta ta ibounai be hekahi momokani,

bona hodahoda be,

ta ta edia huanai ia vareai diba lasi.

17 Idia noho hebou, idia kamokamo hebou,

bona idia parara diba lasi.

18 Leviatano ia asimana neganai,

diari ia hedinaraia kimore bamona,

bona iena matana idia hururu,

dina ia daekau neganai bamona.

19 Iena uduna dekena amo lahi ia mai,

kimore danu idia roho daekau.

20 Iena udubaubauna dekena amo,

kwalahu ia daekau noho,

uro ena henunai siriho idia gabua kwalahu bamona.

21 Leviatano ia hahodi neganai,

au rakuraku ia gabua ore,

bona lahi hururu,

be iena uduna dekena amo idia hedinarai noho.

22 Iena aiona be mai ena goada.

Gari bada be iena vairana dekenai.

23 Iena kopina ena latanai be manoka gabuna ta lasi,

ia be auka momokani, auri bamona.

24 Iena kudouna be ia auka, nadi bamona,

uiti idia moia nadi ia auka bamona.

25  Ia toreisi neganai goada taudia idia gari.

Iena regena idia kamonai neganai,

gari dainai idia manoka.

26 Tuari kaia dekenai Leviatano idia gwadaia,

be anina lasi.

Io bona diba bona karaudi danu be anina lasi.

27 Auri be rei kaukau ia dekenai,

bona auri laboralabora be au,

ia bodaga dainai ia manoka bamona.

28 Diba ese Leviatano idia hagaria lasi,

unai dainai ia heau lasi.

Nadi do idia negea varo dekenai,

to unai nadi be,

Leviatano ese uiti ena momoru ia halaoa noho.

29 Kareva be uiti momoru bamona ia dekenai,

bona ia dekenai io idia negea neganai ia kiri bada.

30 Iena bogana ena kopina,

be uro ia makohia isedia bamona.

Idia ese kopukopu idia kwadia,

uiti kwadia auna bamona.

31 Davara be Leviatano ese ia hamarerea noho,

ranu ia boila bamona,

bona davara be,

uro lalonai oela ia lohilohi ena toana bamona.

32 Davara lalonai ia heau neganai,

hurehure be iena murinai dala ena toana idia karaia,

davara be gwaragwara bamona ia lao.

33 Tanobada dekenai be ia hegeregerena ta lasi,

ia be gari diba lasi gauna.

34 Mai edia hekokoruku dagedage gaudia ibounai,

be ia ese ia hereadia,

ia be hekokoroku gaudia ibounai edia king.”