1 Ierusalema ena golo be ia diaridiari lasi,

bona Dubu Helaga ena nadi namodia,

be hanua ena ariara edia lalonai,

idia negedia kava vadaeni.

2 Siona ena uhau taudia namo hereadia,

guna edia davana be bada herea ita dekenai,

golo namona bona metau herea hegeregerena.

To hari idia be raro urodia sibona hegeregerena,

uro karaia tauna ena imana dekenai ia karaia gaudia bamona.

3 Uda sisia ena sinana ese iena natuna ia ubudia noho,

iena rata ia henidia noho.

To egu bese hahine taudia ese,

edia natudia idia dagedage henidia noho,

uda kokokoko edia kara bamona.

4 Edia maragidia be hitolo,

bona ranu mase dainai idia mase noho,

to sinadia idia laloa momo lasi.

Iseda maragidia ese aniani totona idia noinoi noho,

to tau ta ese sisina ia henidia lasi.

5 Guna aniani namodia momokani idia ania taudia,

be hari hanua ena ariara lalonai idia mase noho.

Guna lohia ena ruma badadia lalonai idia aniani taudia,

be hari momoru gabudia dekenai,

edia aniani idia tahua noho.

6 Egu bese taudia edia dika davana,

ese Sodoma bona Gomora edia dika davana ia hanaia vadaeni,

badina Sodoma taudia edia dika,

be Dirava ese ia haorea haraga.

7 Guna Ierusalema ena lohia taudia edia toadia be namo herea,

idia be goevagoeva, sinou bamona.

Edia tauanidia be kakakaka,

bona mai goadadia momokani,

mai edia hairai danu,

sapairo nadidia bamona.

8 To hari idia be hanua ariara dekenai idia hekure noho.

Edia vairadia be koremakorema,

idia mase vadaeni dainai.

Edia kopidia be idia makuku dika,

edia turiadia latanai,

bona idia kaukau vadaeni, au bamona.

9 Tuari dekenai idia mase taudia edia moale ese,

hitolo dekenai idia mase taudia edia moale ia hereaia.

Edia tauanidia be metairametaira idia ore lao, idia mase,

uma edia anina be lasi dainai.

10 Egu bese idia hadikaia ore dinadia dekenai,

hahine ese edia natudia maragidia dekenai idia bogahisihisi,

to unai maragidia idia mase neganai,

edia tauanidia idia nadua,

bona idia ania.

11 Lohiabada ese iena badu ia hasiahua,

bona lahi bada dekena amo,

Siona ia gabua haorea momokani.

12 Tanobada ena king ibounai,

bona tanobada taudia ibounai danu idia laloa,

tuari taudia o tuari orea ta,

be Ierusalema magu iduaradia do idia raka vareai diba lasi.

13 To inai kara be ia vara momokani,

Ierusalema ena peroveta taudia,

bona hahelagaia taudia edia kara dika dainai.

Idia ese kerere lasi taudia edia mase idia havaraia.

14 Unai Ierusalema ena lohia taudia,

be hari ariara dekenai idia loaloa kava,

matakepulu taudia bamona.

Idia be unai mase taudia edia rara dekena amo idia miro dainai,

tau ta ese edia dabua danu,

do idia dogoatao diba lasi.

15 Taunimanima ese idia dekenai idia boiboi, idia gwau,

“Umui siri. Umui be mai miro danu.

Umui siri.

Ai dekenai do umui kamokau lasi.”

Vadaeni idia heau,

bona loaloa kava taudia hegeregerena idia lao.

Bese idauidau dekenai idia lao,

to unai bese edia huanai taunimanima idia gwau,

“Ai dekenai do umui noho lou lasi.”

16 Lohiabada sibona ese ia luludia lao gabu idauidau dekenai.

Ia ese unai hahelagaia taudia bona lohia taudia ia matauraia lasi.

Taunimanima danu ese edia dagi idia laloa lasi.

17 Aiemai matadia ai negea,

durua do ai abia totona,

to ai naria kava.

Ai ese bese ta ena durua ai naria,

to unai bese ese ai ia durua diba lasi.

18 Ai idia tuari henia noho taudia ese ai idia tahua noho,

unai dainai ariara dekenai ai raka diba lasi.

Aiemai mauri dinadia be kahirakahira idia ore.

Aiemai dokona be ia ginidae vadaeni.

19 Ai idia lulua lao taudia edia heau ese,

guba ugava manu edia roho ia hereaia.

Ororo dekenai ai idia lulua,

bona tano kaukau gabudia dekenai,

ai hadikaia totona idia naria,

hunia dekenai.

20 Lohiabada ese ia abia hidi tauna,

aiemai king,

be ai hadikaia gwauraia taudia ese idia abia mauri.

To ai ese guna ia ai herevalaia vadaeni, ai gwau:

“Ia ese ai do ia naria,

bona bese ibounai edia tuari taudia dekena amo,

ia ese ai do ia gimaia momokani.”

21 Edoma taudia e,

Usu tano dekenai umui noho,

do umui kiri mai moale bada danu!

To Lohiabada ena badu be uaina kapusi bamona,

bona ia ese unai kapusi be umui dekenai do ia henia,

do umui kekero.

Unai neganai umui ese emui dabua do umui kokia,

bona hemarai bada do umui abia.

22 Siona ese iena dika davana ia karaia haorea vadaeni.

Lohiabada ese Siona taudia edia hesiai mai guia danu,

be do ia hadokoa.

To Edoma taudia e,

Lohiabada ese umui emui dika davana do ia henia,

emui kerere do ia hedinaraia.