1 Iesu Ioridane Sinavai dekena amo ia giroa lou neganai, Lauma Helaga ese ia hahonua, vadaeni Lauma Helaga ese taunimanima idia noho lasi tano dekenai ia hakaua lao, 2 Unuseni dina 40 lalonai Satani ese Iesu ia dibagania. Unai dina ibounai Iesu be ia aniani lasi, vadaeni ia hitolo.

3 Vadaeni Satani ese ia dekenai ia hereva, ia gwau, “Oi be Dirava ena Natuna sedira, inai nadi dekenai oi hereva henia, aniani gauna dekenai oi halaoa.”

4 To Iesu ia haere, ia gwau, “Buka Helaga lalonai ia torea vadaeni, ‘Aniani sibona dekena amo taunimanima do idia mauri lasi.’ ”

5 Vadaeni Satani ese Iesu ia hakaua daekau, bona nega sisina lalonai tanobada ena basileia ibounai Iesu dekenai ia hedinaraia. 6 Satani ia gwau, “Oi dekenai siahu do lau henia, inai gau ibounai do oi naria, vadaeni ladana bada do oi abia. Inai gau ibounai be lauegu, bona lau ura henia tauna dekenai do lau henia diba. 7 Unai dainai, bema oi tomadiho henia lau dekenai, inai gau ibounai be do oi abia oiemu.”

8 Iesu ia haere, ia gwau, “Buka Helaga ia torea vadaeni inai bamona, ‘Lohiabada oiemu Dirava dekenai do oi tomadiho henia, ia sibona ena ura do oi karaia.’ ”

9 Vadaeni Satani ese Ierusalema dekenai Iesu ia hakaua lao, Dubu Helaga ena atai dekenai ia haginia, ia gwau, “Oi be Dirava ena Natuna sedira, inai Dubu dekena amo do oi paudobi. 10 Badina be Buka Helaga ia torea vadaeni, ia gwau:

12 Iesu ia haere, ia gwau, “Danu Buka Helaga ia torea vadaeni, ia gwau: ‘Lohiabada oiemu Dirava dekenai oi dibagania lasi.’ ”

13 Satani ena dibagani ibounai ia haorea, vadaeni ia rakatania, ela bona ma nega ta.

14 Iesu be Lauma Helaga ena siahu dekenai ia giroa lou Galilea dekenai, vadaeni iena kara sivaraina be unai tano kahana ibounai dekenai idia gwauraia loaloa. 15 Idia edia dubu lalonai ia hadibaia karaia, bona idia ibounai ese Iesu idia hanamoa.

16 Vadaeni Iesu be Nasareta, ia tubu daekau gabuna, dekenai ia lao, bona hanaihanai iena kara, Sabati Dina dekenai dubu lalonai ia raka vareai. Vadaeni Buka Helaga duahia totona ia toreisi. 17 Idia ese Isaia, peroveta tauna, ena Buka idia henia. Vadaeni ia kehoa, inai bamona ia torea gabuna dekena amo ia duahia, ia gwau:

20 Vadaeni Iesu ese Buka ia koua, ia naria tauna dekenai ia henia lou, vadaeni ia helai diho. Taunimanima ibounai dubu lalonai Iesu dekenai idia itaia noho. 21 Ia ese ia haroro hamatamaia, ia gwau, “Inai umui kamonaia herevana, be hari dina ia momokani vadaeni.”

22 Vadaeni ibounai ese ia dekenai idia hanamoa, hereva namodia iena uduna dekena amo idia kamonai dainai, bona idia hoa, idia gwau, “Inai be Iosepa ena natuna lasi, a?”

23 Vadaeni Iesu ese idia ia hamaoroa, ia gwau, “Inai hereva be momokani lau dekenai do umui gwauraia, do umui gwau, ‘Dogeta tauna e, oi sibona do oi hamauria, Kaperanauma dekenai oi karaia edia sivaraina ai kamonai, be iniseni, oiemu hanua korikori dekenai danu do oi karaia.’ ” 24 Ma Iesu ia gwau, “Momokani lau hamaoroa umui dekenai, peroveta tauna be iena hanua korikori taudia ese do idia abia dae lasi. 25 Danu lau hamaoroa umui dekenai, Elia ena nega dekenai, vabu momo herea Israela dekenai idia noho, unai neganai lagani toi bona hua 6 medu ia diho lasi, tanobada ibounai hitolo ena nega be ia bada. 26 To Dirava ese Elia ia siaia lao lasi Israela ena vabu ta dekenai. Idau tano hanua, ladana Sarepata, Sidono ena kahana hanua, ena vabu ta dekenai ia siaia lao. 27 Bona Elisaia, peroveta tauna, ena neganai, lepera taudia momo Israela dekenai idia noho, to ta ia hanamoa lasi, Namana, Suria tauna sibona.”

28 Dubu dekenai idia haboua taudia ibounai ese inai hereva idia kamonai, idia badu dikadika. 29 Idia toreisi, hanua dekena amo Iesu idia doria murimuri dekenai, edia hanua idia haginia ororo dekenai idia veria lao, ororo dekena amo do idia negea diho gwauraia. 30 To ia be edia huana dekena amo ia raka siri.

31 Iesu be Kaperanauma, Galilea ena hanua ta, dekenai ia ginidae, vadaeni Sabati Dina neganai ia hadibaia karaia. 32 Idia be iena hadibaia hereva dekenai idia hoa, badina be ia hereva mai siahu danu. 33 Dubu lalonai lauma dika ese ia abia tauna ta ia noho. Ia be ia boiboi bada herea, ia gwau, 34 “Iesu Nasareta tauna e, ai dekenai dahaka oi karaia? Ai do oi alaia totona oi mai, a? Lau diba oi be Dirava ena Helaga Tauna.”

35 Vadaeni Iesu ese ia gwau henia, ia gwau, “Oi hereva lasi, ia dekena amo oi lao murimuri dekenai.” Vadaeni lauma dika ese unai tau tano dekenai ia negea diho idia edia vairanai, vadaeni ia dekena amo ia rakatania lao. Unai tau be bero ta ia davaria lasi.

36 Vadaeni ibounai idia hoa, idia ta ta dekenai idia hereva, idia gwau, “Inai be dahaka hereva? Ia be mai siahu, bona mai goada danu lauma dikadia ia hereva henia, bona idia rakatania lao.” 37 Unai tano ena kahana ibounai dekenai Iesu ena sivarai idia gwauraia loaloa.

38 Dubu dekena amo idia diho, vadaeni Simona ena ruma dekenai idia daekau. Simona ena adavana ena sinana ia gorere, iena tauanina ia siahu, vadaeni idia ese Iesu idia hamaoroa. 39 Ia be ia lao, hahine ena badibadinai ia gini, gorere dekenai ia gwau henia, vadaeni gorere ia doko, hahine be maoromaoro ia toreisi, idia edia hesiai gaukara ia karaia.

40 Dina be kahirakahira ia diho neganai, idia ese gorere idauidau taudia ibounai Iesu dekenai idia abia lao. Vadaeni iena imana idia ta ta edia latanai ia atoa, ibounai ia hamauridia. 41 Lauma dikadia danu taunimanima momo dekena amo ia lulua murimuri dekenai, vadaeni lauma dikadia idia boiboi, idia gwau, “Oi be Dirava ena Natuna.”

To Iesu ia gwau henia idia dekenai, bona ia hamaorodia, do idia hereva lasi, badina be idia diba ia be Keriso.

42 Daba ia rere neganai, Iesu ia toreisi, taunimanima idia noho lasi gabuna dekenai ia lao, to taunimanima ese idia tahua, idia davaria, vadaeni idia ura dogoatao, idia do ia rakatania lasi idia gwau. 43 To ia hereva henia idia dekenai, ia gwau, “Lau be Dirava ena Basileia ena Sivarai Namona hanua idauidau dekenai do lau harorolaia, Dirava ese lau ia siaia ena badina be unai.” 44 Vadaeni Iudea dubu edia lalonai ia haroro.