1 Unai neganai Iesu be Sabati Dina dekenai uiti uma dekenai ia raka hanaia. Ena diba tahua taudia be idia hitolo, vadaeni uiti ena anina idia kokia, idia ania. 2 Farisea taudia idia itaia, vadaeni idia ese Iesu idia hamaoroa, idia gwau, “Itaia, oiemu diba tahua taudia be karaia lasi gaukara Sabati Dina dekenai idia karaia.”

3 Ia haere idia dekenai, ia gwau, “Nega ta umui duahia lasi, a, Davida ena kara ta, ia hitolo neganai, ia mai iena orea taudia danu? 4 Dirava ena Ruma dekenai idia daekau, pata helaga ena aniani idia ania. To unai aniani be ia helaga momokani, Davida dekenai, bona iena turadia dekenai. Hahelagaia taudia sibona do idia ania diba. 5 O taravatu dekenai umui duahia lasi, a, Sabati Dina dekenai hahelagaia taudia ese Sabati Dina ena taravatu idia makohia, to idia be kerere lasi? 6 Umui lau hamaoroa, iniseni be tau ta ese Dubu Helaga ia hereaia. 7 Inai hereva umui laloa, ‘Lau be bogahisihisi henia kara lau ura, boubou gauna be lau laloa lasi.’ Bema inai hereva ena anina umui diba, umui be kerere lasi taudia do umui gwauraia kerere diba lasi. 8 Badina be Taunimanima ena Natuna be Sabati ena biaguna.”

9 Iesu ese unai gabu ia rakatania, vadaeni edia dubu ta dekenai ia raka vareai. 10 Tau ta unuseni be iena imana ia dika. Vadaeni Iesu dekenai idia henanadaia, idia gwau, “Sabati Dina dekenai gorere hanamoa be ia maoro?” Idia ura be kerere do idia doria Iesu dekenai.

11 Vadaeni Iesu ia haere idia dekenai, ia gwau, “Umui daika ena mamoe bema tamona sibona, vadaeni bema Sabati Dina dekenai guri lalonai ia moru diho, do umui veria daekau lasi, a? 12 Be, taunimanima ese mamoe idia hereaia lasi, a? Unai dainai, Sabati Dina dekenai kara namo karaia be ia maoro.” 13 Vadaeni Iesu ese unai tau ia hereva henia, ia gwau, “Oiemu imana oi atoa maoromaoro.”

Iena imana ia atoa maoromaoro, be ia namo vadaeni, iena imana kahana hegeregerena. 14 Vadaeni Farisea taudia idia raka murimuri dekenai, idia hereva hebou, Iesu do idia alaia dalana idia tahua.

15 Iesu be edia laloa ia diba dainai, idau gabu dekenai ia lao. Taunimanima momo be iena murina dekenai idia raka, vadaeni ia ese ibounai ia hanamoa. 16 To idia dekenai ia hamaoroa, iena sivarai do idia herevalaia lasi. 17 Unai dekena amo, Isaia peroveta tauna ena hereva ia momokani vadaeni, ia gwau:

22 Unai neganai tau ta be mai lauma dika danu, Iesu dekenai idia abia lao. Unai tau be matakepulu, bona ia hereva diba lasi danu. Iesu ese ia hanamoa, vadaeni ia hereva diba, bona gau ia itaia diba. 23 Vadaeni taunimanima momo idia hoa, idia gwau, “Sedira, inai Iesu be Davida ena natuna, a?”

24 Inai hereva Farisea taudia idia kamonai neganai idia gwau, “Lauma dika edia lohia tauna, Belesebulo, ese siahu ia henia dainai, inai tau ese lauma dika ia lulua diba.”

25 Iesu be idia edia laloa ia diba, vadaeni ia gwau, “Basileia ta sibona bema ia hapararaia, orea ta ese orea ta idia heatu henia dainai, unai basileia do ia dika. Unai bamona danu hanua ta o iduhu ta sibona bema ia hapararaia, ia be do ia gini diba lasi. 26 Bona bema Satani ese Satani ia lulua murimuri dekenai, unai be ia parara, ma sibona ia heatu henia, vadaeni iena basileia be edena bamona do ia gini diba? 27 Umui gwau lau be Belesebulo ena siahu dekenai lauma dika lau lulua. To umui emui orea taudia be daika ena siahu dekenai lauma dika idia lulua? Unai dainai, umui emui orea taudia sibodia ese idia hedinaraia umui be kerere momokani. 28 To, bema lau be Dirava ena Lauma dainai lauma dika lau luludia, Dirava ena Basileia be umui dekenai ia ginidae vadaeni.

29 “Tau ta ese edena bamona goada tauna ena ruma dekenai do ia raka vareai, vadaeni ena kohu do ia henaoa? Ia ese goada tauna do ia kwatua guna, vadaeni ena ruma kohu do ia henaoa diba.

30 “Lau dekenai ia laloa momo lasi tauna be lau dekenai ia heatu noho, bona mamoe haboua totona lau ia durua lasi tauna, be ia ese mamoe ia negedia kava, idia boio.

31 “Unai dainai, umui lau hamaoroa, taunimanima edia kara dika bona edia hereva dika ibounai be do ia gwauatao. To Lauma Helaga dekenai ia hereva dika tauna be iena dika do ia gwauatao lasi. 32 Taunimanima ena Natuna dekenai do ia hereva dika tauna be iena dika do ia gwauatao. To Lauma Helaga dekenai ia hereva dika tauna be iena dika do ia gwauatao lasi, hari inai mauri lalonai, bona mauri gabeai danu.

33 “Bema au be ia namo, ena huahua danu be do ia namo. Bema au be ia dika, ena huahua danu be do ia dika. Badina be ena huahua dekena amo au do umui diba. 34 Gaigai edia natudia e! Umui be mai emui dika dainai, edena bamona hereva namodia do umui gwauraia diba? Tau ena lalona ia honu momokani gaudia dekena amo iena uduna ia hereva. 35 Tau namona be mai ena laloa namodia momo ena lalona dekenai. Unai dainai kara namodia do ia karaia. Tau dikana be mai ena laloa dikadia momo ena lalona dekenai. Unai dainai kara dikadia do ia karaia.

36 “Umui lau hamaoroa, hereva kava ibounai taunimanima ese do idia gwauraia, be Dirava ena Kota Badana dina dekenai, edia davana do idia abia. 37 Badina be emu hereva ese oi do idia hanamoa, bona emu hereva ese oi do idia hadikaia.”

38 Vadaeni taravatu hadibaia taudia bona Farisea taudia haida ese Iesu idia hereva henia, idia gwau, “Hadibaia tauna e, ai ura be oi dekena amo toa ta do ai itaia.”

39 Iesu ia haere idia dekenai, ia gwau, “Inai nega noho Dirava laloa lasi taudia be dika momokani! Umui ese toa ta umui tahua, a? Lasi, toa ta do lau hedinaraia lasi umui dekenai. Toa be tamona sibona, Iona, peroveta tauna ena toa. 40 Badina be Iona bamona, dina toi hanuaboi toi gwarume badana ena bogana lalonai ia noho, unai bamona Taunimanima ena Natuna danu dina toi hanuaboi toi tano lalonai do ia noho. 41 Dirava ena Kota Badana dinana neganai, Nineva taudia ese do idia samani henia umui, badina be idia ese Iona ena haroro dainai edia lalona idia giroa, to iniseni, emui huana dekenai, be tau ta ese Iona ia hereaia. 42 Dirava ena Kota Badana neganai danu, diho kahana dekena amo kwini ese umui do ia samania, badina ia be tanobada ena dokona dekena amo Solomona ena aonega kamonaia totona ia mai. To iniseni be tau ta ese Solomona ia hereaia.

43 “Lauma dikana ta ese tau ta ia rakatania, vadaeni gabu kaukaudia ia raka hanaia, ia laga-ani totona, to laga-ani gabuna ta ia davaria lasi. 44 Vadaeni ia gwau, ‘Lau rakatania rumana dekenai do lau giroa lou.’ Ia giroa lao neganai ruma ia davaria be ia noho kava, tau ta ia noho lasi, ia goevagoeva. 45 Vadaeni ia ese lauma idia dika momokani 7 ma ia hakaua lao, ibounai idia raka vareai, ruma lalonai idia noho. Unai dainai, unai tau be hamatamaia neganai ena dika be sisina ia maragi, to dokona dekenai iena dika be ia bada herea.”

46 Iesu be taunimanima dekenai ia hereva noho neganai, iena sinana bona iena tadina be murimuri dekenai idia gini, Iesu dekenai idia hereva gwauraia. 47 Vadaeni tau ta ese ia hamaoroa, ia gwau, “Oiemu sinana bona oiemu tadina be unai, murimuri dekenai idia gini noho, oi dekenai idia hereva gwauraia.”

48 To Iesu ia haere, ia gwau, “Lauegu sinana bona lauegu tadina be daika?” 49 Vadaeni iena diba tahua taudia dekenai imana ia duduia, ia gwau, “Lauegu sinana bona lauegu tadina be inai. 50 Badina be lauegu Tamana, guba dekenai ia noho, ena ura idia karaia taudia, idia sibona be lauegu tadina, bona lauegu taihuna, bona lauegu sinana.”