1 Madi, egu lalona ia hisihisi noho. Lau be hitolo tauna bamona, au dekenai au huahua lau tahua noho, to ta lau davaria diba lasi, bona vain dekenai ena huahua ta lau davaria lasi. Fig ena au huahua danu be ibounai idia kokia ore vadaeni. 2 Kara maoromaoro tauna ta be lasi egu tano dekenai, tau ta ese Dirava ia badinaia lasi. Lasi momokani. Tatau ibounai ese taunimanima alaia totona idia naria noho. Bona idia ta ta ibounai ese edia varavara taudia idia hadikaia gwauraia.

3 Dika idia karaia dalana be idia diba momo. Lohia taudia bona kota biaguna taudia ese taunimanima dekena amo moni idia noia noho, idia ese kota hereva do idia hagagevaia totona. Ladana bada taudia ese kota biaguna dekenai idia hereva henia, edia ura gaudia idia hamaoroa. Bona unai kota biaguna ese unai ura gaudia ia henidia noho. 4 Unai dainai idia edia kara namo be mogea vadaeni gauna, ava dikadia bamona. Bona edia kara maoromaoro be ia gageva, au ginigini ia gageva bamona.

To dina be ia ginidae vadaeni, Dirava ese iena bese taudia edia kerere davana do ia henia, peroveta taudia dekena amo ia sisiba henidia do ia karaia bamona. Unai dainai taunimanima be harihari idia daradara noho.

5 Oiemu badibadinai ia noho tauna do oi abidadama henia lasi. Oiemu turana ena hereva do oi hamomokania lasi. Oiemu adavana dekenai oi hereva gauna danu be do oi naria namonamo. 6 Badina inai nega lalonai mero ese iena tamana ia hereva dika henia noho. Kekeni ese iena sinana ia heai henia, bona hahine eregabe ese iena ravana hahine ia dagedage henia noho. Tau ta ena famili taudia ese ia idia heai henia noho.

7 To lau ese Lohiabada do lau naria noho. Ia ese lauegu guriguri do ia kamonai, bona lau abidadama henia, ia ese lau do ia hamauria.

8 Ita dekenai idia tuari henia taudia ese ita dekenai do idia hereva dika henia lasi. Momokani ita moru vadaeni, to ita be ma do ita gini lou. Ita be harihari dibura lalonai ita noho, to Lohiabada ese iena diari ita dekenai do ia henia. 9 Ita ese Lohiabada ena vairana dekenai ita kara dika dainai, iena badu ena mamina do ita abia nega sisina. To gabeai ia ese ita do ia durua, bona idau bese taudia ese ita dekenai idia karaia vadaeni dika edia davana, be Dirava ese do ia henia. Ia ese dibura dekena amo ita do ia mailaia, ma diari lalonai ita do ia atoa. Lohiabada ese ita dekenai kara maoromaoro momokani ia karaia, be do ita itaia namonamo.

10 Guna ita idia tuari henia taudia ese ita dekenai idia hereva dika, idia gwau, “Lohiabada, emui Dirava be edeseni ia noho?” To gabeai idia itaia Lohiabada ese ita ia hamauria neganai, do idia hemarai momokani. Bona unai neganai do ita itaia, Lohiabada ese ita dekenai idia tuari henia taudia do ia moia diho, taunimanima ese dala ena kopukopu idia moia diho bamona.

11 Ierusalema taudia e, emui hanua magudia do umui haginia lou negana be do ia ginidae. Bona unai neganai, emui tano hetoa maka do idia abia lao, bona emui tano do idia habadaia. 12 Bona unai neganai, taunimanima be umui dekenai do idia mai, gabu ibounai dekena amo, Asuria bona Aigupito ena hanua ta ta, bona Euperate Sinavai ena kahana ibounai. Ma gabu idauidau, daudau herea gabudia, davara hanaia gabudia, bona ororo hanaia gabudia dekena amo danu do idia mai umui dekenai.

13 To tanobada be tano kaukau, nadi kavakava gabuna do ia lao, badina be tanobada dekenai noho taudia ese kara dika momo idia karaia dainai.

14 Lohiabada e, mani emu kara, oiemu bese, oi abia hidi vadaeni taudia do oi naria, mamoe naria tauna ese iena mamoe ia naria noho bamona. Idia be tano namo lasi ororo gabuna dekenai idia noho, to tano namona be idia ia hagegea noho. Edia dala do oi kehoa, vadaeni Basana bona Gileada rei namona gabudia dekenai aniani do idia ania, gunaguna idia karaia bamona.

15 Lohiabada e, lau ura oi ese hoa kara haida ai durua totona do oi karaia lou, guna Aigupito dekena amo ai oi hakaua mai neganai bamona. 16 Bese idauidau taudia ese inai hoa kara do idia itaia, vadaeni do idia hemarai bada. Momokani idia be mai edia goada, to mai gari danu edia uduna do idia koua, bona edia taiana danu do idia koua. 17 Idia be gaigai bamona, tano ena kahu dekenai do idia rau. Idia ese edia kohoro dekena amo do idia raka, mai gari bona mai edia heudeheude danu. Bona idia ese gari dainai oi Lohiabada, aiemai Dirava dekenai do idia mai.

18 Lohiabada e, Dirava ta oi hegeregerena be ia noho lasi. Oi ese oiemu bese taudia, idia do mauri noho taudia, edia kara dika oi gwauatao noho. Oiemu badu ia noho hanaihanai lasi, to oi ura bada oiemu noho hanaihanai lalokauna ai dekenai do oi henia.

19 Oi ese ai dekenai ma do oi bogahisihisi henia lou. Oi ese aiemai kara dika do oi moia diho ore, davara ena dobu herea gabuna dekenai do oi atodia siri. 20 Oi ese oiemu kara maoromaoro bona oiemu noho hanaihanai lalokauna oiemu bese taudia dekenai do oi hedinarai henia. Badina gunaguna unai bamona oi gwauhamata, oiemu bese edia sene taudia, Aberahamo bona Iakobo dekenai.