1 Lohiabada ese Mose ia hamaoroa, ia gwau, 2 “Midiana taudia ese Israela taudia idia alaia mase dainai, davana do umui henidia. Unai murinai oi be do oi mase, oiemu tamana bona oiemu tubuna dekenai do oi haboua.”

3 Unai dainai Mose ese Israela taudia ia hamaoroa, ia gwau, “Tuari totona do umui karaia hegaegae, umui ese Midiana taudia edia kara dika Lohiabada dekenai ena davana do umui henia. 4 Israela iduhu ta ta dekena amo tuari taudia 1000, ma 1000 do umui siaia.”

5 Vadaeni iduhu ta ta dekena amo tatau 1000 idia abia hidi, tatau ibounai be 12,000, tuari totona idia hegaegae taudia.

6 Mose ese tuari totona idia ia siaia, bona edia gunalaia tauna be Pineha, hahelagaia tauna Eleasara ena natuna. Pineha ese Palai Dubu ena helaga gaudia haida iena imana dekenai ia abia lao, bona kibi danu, Israela edia tuari durua totona.

7 Vadaeni idia ese Midiana taudia idia tuari henia, Lohiabada ese Mose ia oda henia hegeregerena, bona Israela taudia ese Midiana edia tatau ibounai idia alaia mase. 8 Midiana edia king taudia 5 danu be Israela ese idia alaia mase. King edia ladana be Evi, Rekema, Suru, Huru, bona Reba. Balama Beoro danu be Israela taudia ese tuari kaia dekena amo idia alaia mase.

9 Israela taudia ese Midiana hahine mai edia natudia idia abia mauri, edia boromakau ibounai, edia mamoe ibounai, bona edia kohu ibounai idia abia danu. 10 Edia hanua ibounai bona edia kamepa ibounai idia gabua ore. 11 Bona idia abia kohu idia abia lao, ubua gaudia bona taunimanima danu idia hakaua lao.

12 Vadaeni Israela taudia ese tuari dekenai idia abia kohu, bona taunimanima bona ubua gaudia be Mose bona Eleasara bona Israela taudia edia hebou dekenai idia mailaia. Edia kamepa be Ieriko kahirakahira, Moaba tano palaka ena latanai, Ioridane Sinavai unai kahana dekenai.

13 Mose, Eleasara, bona Israela ena orea gunalaia taudia be kamepa dekena amo idia toreisi, tuari taudia idia hedavari totona. 14 To Mose be tuari orea opesa, tau 1000 idia biagua, bona tau 100 idia biagua taudia dekenai ia badu.

15 Idia dekenai ia gwau henia, ia gwau, “Badina dahaka hahine taudia umui alaia lasi? 16 Do umui laloa, Midiana hahine ese Bala dirava ena hereva dekena amo Israela taudia idia koia, Peoro dekenai, bona gorere dikana ese Lohiabada ena orea taudia ia hamasea. 17 Unai dainai, memero ibounai do umui alaia mase, bona sihari idia diba hahine ibounai danu. 18 To kekeni bona ulato, sihari idia do diba lasi, do umui hamauria, do umui abia, emui.

19 “Bona umui ese taunimanima umui alaia mase, o mase taudia dekenai umui kamokau taudia ibounai be dina 7 lalonai kamepa ena murimurinai do umui noho. Dina namba 3, bona dina namba 7 dekenai umui sibona do umui hagoevaia, bona umui abia mauri kekeni bona ulato danu do umui hagoevaia. 20 Emui dabua ibounai danu, bona kopina dekenai karaia gaudia ibounai, bona nanigosi ena huina, bona au dekena amo karaia gaudia, ibounai do umui hagoevaia.”

21 Vadaeni hahelagaia tauna Eleasara ese tuari dekena amo idia giroa mai taudia dekenai ia hamaoroa, ia gwau, “Lohiabada ese Mose ia oda henia taravatu be inai: 22 Golo bona siliva bona auri laboralabora, bona auri bona tini bona ledi, 23 lahi ese ia gabua ore diba lasi gaudia, be lahi lalonai do umui atoa, lahi ese do ia hagoevaia totona. To idau gaudia ibounai be miro hagoevaia ranuna ese do ia hagoevaia.

24 “Dina namba 7 dekenai emui dabua do umui huria. Unai murinai umui be goeva vadaeni, bona kamepa dekenai do umui raka vareai diba.”

25 Lohiabada ese Mose ia hamaoroa, ia gwau, 26 “Oi bona Eleasara bona Israela lohia taudia ese tuari dekenai idia abia gaudia, bona taunimanima bona ubua gaudia ibounai do umui duahia. 27 Vadaeni do umui haria, kahana rua. Kahana ta be tuari dekenai idia lao taudia edia, to kahana ta be hanua dekenai idia noho taudia edia.

28 “Vadaeni tuari taudia edia kahana dekena amo, kahana 500, bona 500 dekena amo kahana ta ta do umui abia siri, Lohiabada ena, taunimanima, bona boromakau, doniki bona mamoe. 29 Inai be Lohiabada ena ahuna, bona hahelagaia tauna Eleasara dekenai do umui henia.

30 “To hanua dekenai noho taudia edia kahana dekena amo, kahana 50, bona 50 dekena amo kahana ta ta do umui abia siri, Lohiabada ena, taunimanima, bona boromakau, doniki, bona mamoe. Vadaeni Levi taudia, Lohiabada ena Palai Dubu idia naria taudia dekenai do umui henia.”

31 Vadaeni Eleasara bona Mose be unai bamona idia karaia, Lohiabada ese Mose ia hadibaia hegeregerena.

32 Tuari taudia ese idia abia mauri gaudia be inai: Mamoe 675,000, 33 boromakau 72,000, 34 doniki 61,000, 35 bona sihari idia do diba lasi kekeni ibounai 32,000.

36 Unai kohu dekena amo tuari taudia ese idia abia kahana be inai: Mamoe 337,500. 37 Unai dekena amo, Lohiabada ena be 675. 38 Boromakau 36,000. Unai dekena amo, Lohiabada ena be 72. 39  Doniki 30,500. Unai dekena amo, Lohiabada ena be 61. 40 Bona sihari idia do diba lasi kekeni ibounai 16.000. Unai dekena amo, Lohiabada ena be 32.

41 Mose ese Lohiabada ena ahuna ibounai ia abia, hahelagaia tauna Eleasara dekenai ia henia, Lohiabada ese Mose ia oda henia hegeregerena.

42 Hanua dekenai noho taudia ese tuari dekenai idia abia kohu, Mose ese ia henidia ahuna 43 be inai: Mamoe 337,500, 44 boromakau 36,000, 45 doniki 30,500, 46 bona taunimanima 16,000. 47 Bona inai edia kahana ta ta dekena amo Mose ese 50, bona 50 dekena amo kahana ta ta ia abia siri, taunimanima bona ubua gaudia, bona Levi taudia, Lohiabada ena Palai Dubu idia naria taudia dekenai ia henidia, Lohiabada ese Mose ia hadibaia hegeregerena.

48 Unai neganai tuari taudia edia opesa, tatau 1000 idia biagua, bona tatau 100 idia gunalaia taudia be Mose dekenai idia lao. 49 Idia gwau, “Lohia e, ai ese ai biagua noho tuari taudia ai duahia vadaeni, bona idia ta ia boio lasi. 50 Unai dainai, harihari gaudia ai mailaia vadaeni Lohiabada ena, golo gaudia, tuari dekenai ai abia, ima herahera gaudia, aena herahera gaudia, ima kwakikwaki rini, taiana herahera gaudia bona ageva danu. Inai kara ai karaia be Lohiabada ena vairanai aiemai kara dika ena davana do ai karaia gwauraia.”

51 Vadaeni Mose bona hahelagaia tauna Eleasara ese inai golo gaudia, herahera idauidau gaudia idia abia dae. 52 Inai golo gaudia, tuari taudia edia opesa taudia ese idia mailaia golo, Lohiabada dekenai idia henia totona, ena metau be 200 kilogaram kahirakahira.

53 Opesa lasi tuari taudia ta ta ese sibodia idia abia golo gaudia idia dogoatao, edia. 54 Vadaeni Mose bona Eleasara ese unai tuari opesa idia henia golo gaudia idia abia, Palai Dubu lalonai idia atoa, Lohiabada ena vairanai idia noho, ia ese Israela do ia laloa totona.