1 Oi ese taunimanima haida oi gwauraia kerere, a? Oi dekenai lau hereva, oiemu kerere oi hunia diba lasi, oi be hereva maorona ta lasi. Badina haida oi gwauraia kerere neganai, oi danu be edia kerere oi karaia noho. Unai dekena amo oi sibona oi hadikaia noho. 2 Ita diba Dirava ese inai bamona idia karaia taudia edia kerere davana ia henia, bona ita diba Dirava ena kota be ia maoromaoro momokani. 3 To oi ese taunimanima haida oi gwauraia kerere, ma oi ese danu idia edia kerere oi karaia noho! Oi laloa Dirava ena Kota dekena amo do oi heau mauri diba, a? 4 Bona inai danu, Dirava ena kara be namo herea oi dekenai, ia badu haraga lasi, bona oiemu kara dika davana be oi dekenai ia henia haraga lasi. Inai Dirava ena kara namodia, oi laloa idia be anina lasi, a? Sedira oi diba lasi, Dirava ena bogahisihisi kara ena badina korikori be inai: Oiemu lalona do oi giroa totona? 5 Oiemu kudouna ia auka, bona oiemu lalona oi giroa lasi dainai, oiemu kerere davana oi habadaia noho. Vadaeni Dirava ena badu ia hedinaraia Kota Dinana neganai, be inai kerere davana badana do oi abia. 6 Dirava ese taunimanima ta ta ibounai dekenai, edia kara hegeregerena edia davana do ia henia. 7 Taunimanima haida ese kara namo idia karaia noho nega ibounai. Idia ese Dirava ena hairai, iena hanamoa, bona iena doko diba lasi maurina idia tahua noho nega ibounai. Inai bamona taudia dekenai be Dirava ese mauri hanaihanai do ia henia. 8 To haida be idia sibona edia namo idia tahua, bona hereva momokani idia negea, kara kerere do idia karaia totona. Inai bamona taudia ese Dirava ena badu bona iena panisi do idia davaria. 9 Kara dika taudia ese kerere davana metau bona hisihisi bada do idia davaria, Iuda taudia be guna, bona Iuda lasi taudia danu. 10 To Dirava ese iena hairai, iena hanamoa, bona iena maino do ia henia kara namo taudia ibounai dekenai, Iuda taudia guna, bona Iuda lasi taudia danu. 11 Badina be Dirava ia laloa lasi daika be ladana bada, to maka tamona dekenai taunimanima ibounai ia kota henidia. Edia kara hegeregere, davana ia henia.

12 Mose ena Taravatu idia diba lasi taudia be edia kara dika dainai do idia mase, to Taravatu ena siahu henunai lasi. To Taravatu idia diba vadaeni taudia edia kara dika davana do idia abia, Taravatu ena siahu henunai. 13 Badina be Dirava ena vairana dekenai do idia maoromaoro taudia be Taravatu idia kamonai sibona taudia lasi, to Taravatu idia badinaia taudia sibona. 14 Iuda lasi taudia be Mose ena Taravatu idia diba lasi, to idia haida ese sibodia edia laloa diari dekena amo taravatu idia badinaia. Inai taudia ese madi Taravatu idia davaria lasi,to edia laloa maoro dekena amo sibodia edia taravatu idia haginia. 15 Idia edia kara ese ia hedinaraia, Dirava ena Taravatu be edia kudouna dekenai ia noho vadaeni. Idia edia kudouna ena laloa ese ia hamomokania Dirava ena Taravatu be edia kudouna lalonai ia noho. Unai dainai nega haida edia lalona dekenai idia gwau, “Egu kara ia kerere,” bona nega haida edia lalona dekenai idia gwau, “Egu kara be ia maoro.” 16 Dina ta do ia ginidae Dirava ese Kota do ia karaia, vadaeni Iesu Keriso ese taunimanima edia hunia laloa do ia tahua. Inai be Sivarai Namona, lau ese lau harorolaia gauna ena hereva hegeregerena.

17 To umui Iuda taudia be edena bamona umui laloa? Umui gwau umui be Iuda taudia bona Taravatu dekenai umui abidadama henia, ia ese umui do ia durua Kota Dinana dekenai. Mai hekokoroku danu, umui laloa umui sibona be Dirava ena bese. 18 Umui be Dirava ena ura umui diba. Bona iena Taravatu ese umui ia hadibaia vadaeni, inai dainai kara maoromaoro karaia dalana umui diba. 19 Umui gwau umui be matakepulu taudia edia hakaua taudia, bona dibura noho taudia edia diari. 20 Umui gwau kavakava taudia umui sisiba henia diba, bona memero maragidia umui hadibaia. Taravatu umui diba dainai, umui gwau aonega ibounai bona hereva momokani ibounai umui diba vadaeni. 21 Oibe, taunimanima haida umui hadibaia, to dahaka dainai umui sibona umui hadibaia lasi? Umui haroro, umui gwau, “Henaoa lasi,” to umui be umui henaoa, a? 22 Umui gwau, “Heudahanai lasi,” to umui be umui heudahanai, a? Kaivakuku be umui kirikirilaia, to umui ese Dirava diba lasi taudia edia dubu gaudia umui henaoa, a? 23 Mai hekokoroku danu umui gwau Dirava ena Taravatu umui diba, to iena Taravatu umui makohia dainai Dirava umui hadikaia inai. 24 Buka Helaga be inai bamona ia gwau, “Umui be Iuda taudia dainai, Iuda lasi taudia ese Dirava ena ladana idia hadikaia.”

25 Bema Taravatu umui badinaia neganai emui kopina utua kara be mai anina. To bema Taravatu umui badinaia lasi, emui kopina utua kara be anina lasi. 26 Iuda lasi taudia be kopina utua kara idia abia lasi. To bema idia ese Taravatu idia badinaia neganai, Dirava ena vairanai idia be kopina utua kara taudia hegeregerena, ani? 27 Momokani Taravatu umui diba vadaeni, bona kopina utua kara umui abia vadaeni. To umui ese Taravatu umui utua noho. Unai dainai inai Iuda lasi, edia kopina idia utua lasi, to Taravatu idia badinaia noho taudia ese umui Iuda taudia idia kota henia noho, ani? 28 Bema tau ta ia gwau ia be Iuda tauna, kopina utua kara ia karaia sibona dainai, ia be Iuda momokani lasi, bona iena kopina utua be tauanina gauna sibona. 29 To tau ta be Iuda tauna korikori bema iena lalona dekenai ia be Iuda tauna. Iena kopina utua kara korikori danu be iena kudouna lalonai ia vara gauna, kopina gauna sibona lasi. Inai be taunimanima idia torea taravatuna badinaia gauna lasi. Lasi, inai be Dirava ena Lauma ese ia havaraia gauna. Oibe, inai bamona tauna, iena kudouna be Dirava ena, bona Dirava ese ia do ia hanamoa, to taunimanima ese sedira ia do idia hanamoa lasi.