ESODO.
36.
Benaini, Besalele bona Oholiab bona karakara taudia, Iehova ese lalo-parara bona aonega vada e henidia taudia, iboudiai ese ḡaukara bae matamaia, dubu do bae karaioa, Iehova ena hahedua heḡereḡeredia. 
Bena Mose ese Besalele bona Oholiab e boiridia, bona karakara taudia, Iehova ese lalodia vada e hapararadia bona lalodia e urava una ḡaukara bae durua taudia, iboudiai e boiridia. 
Bena idia ese Israel taudia edia herahia ḡaudia iboudiai, dubu ḡaukarana idurulaina ḡaudia, na Mose ena amo e abi. A herahia ḡaudia haida be daba iboudiai ma e laohai, e henia; 
ela bona karakara taudia iboudiai, dubu e ḡaukaralaiava taudia, ese edia ḡaukara e rakatani, 
Mose e hamaoroa, eto, Taunimanima edia herahia na Iehova ena hahedua ḡaukaradia vada e davana vaitani bona vada e hanaia danu. 
Taunabunai, Mose na e haheḡani, bona ena haheḡani vada e hapiua taruha idoinai; eto, Tau ta eiava hahine ta herahia ḡauna ta basine mailaia, dubu ena. Taunabunai, taunimanima ese herehia ihenina e hadokoa; 
badina be vada e heni ḡaudia vada davana, una ḡaukara ena, bona orena baine mia e tomava. 
Bena karakara taudia ese dubu dabuadia gwautaosi e kara, dabua aukadia bona namodia, vaiuridia bona mia-kakadia bona kakakakadia; ihaheralaidia be kerubi laulaudia e turi. 
Dabua ta ena lata be kiubit ruahui taurahani, lababana be kiubit hani, iboudiai edia lata vada e heḡereḡere bona edia lababa danu vada e heḡereḡere. 
Dabua ima e siriudia, ma ima e siriudia. 
Bena imaosi ta isena ai, kunipa varo vaiurina amo e kara; ma imaosi ta isena ai danu unu e kara toma. 
Dabua ta ia kunipa imahui e kara, ma dabua ta ai imahui: hari kunipa vada e hevaira heheni. 
Bena hakapu-tao ḡaudia imahui gold amo e kara, dabua isedia ruaosi na unu hakapu-tao ḡaudia amo e hakapudia tao hesiriu, dubu tamona ai e halaoa. 
Una murinai dabua haida nani huidia amo e kara, dubu daena kalagana ena: unu dabua iboudiai be gwauta-ta. 
Dabua ta ta edia lata na kiubit toi-ahui, lababadia na kiubit hani; iboudiai edia lata vada e heḡereḡere, bona edia lababa danu vada e heḡereḡere. 
Unu dabua ima e siriudia, ma tauratoi e siridia. 
Bena imaosi ta isena ai kunipa imahui e kara, ma tauratoiosi ta isena ai kunipa imahui e kara. 
Bena hakapu-tao ḡaudia imahui auri labora-labora amo e kara, dabua isedia ruaosi na unu hakapu-tao ḡaudia amo e hakapudia tao hesiriu, kalaga tamona ai e halaoa. 
Bena kalaga guhina danu e karaia, mamoe kopidia, e hakakakakadia ḡaudia, amo; ma guhi ta danu, nani kopidia amo e karaia, ia latanai ma e atoa kau. 
Dubu habana kahadia na kela audia amo e kara. 
Kaha ta ena lata be kiubit gwauta, bona ena lababa be kiubit ta mai kahana. 
Hari kaha ta ta be ikoko rua rua amo e kokodia heririu; dubu habana kahadia iboudiai unu e kokodia hesiriu toma. 
Hari dubu habana kahadia iboudiai na ini e haginidia toma: diho kahana ai kaha ruahui e haginidia. 
Hahelai-kau ḡaudia hari-ahui silver amo e kara; bena hahelai-kau ḡaudia rua rua kaha ta ta henudiai e atodia bona e kokodia tao. 
Ma dubu kahana ta, mirigini kahana ai, kaha ruahui ma e haginidia, 
mai silver hahelai-kau ḡaudia hari-ahui, kaha ta ta henudiai hahelai-kau ḡaudia rua rua. 
Dubu duduna, lahara kahana ai, kaha tauratoi e haginidia; 
bona daiguni ruaosi danu kaha ta ta, dubu duduna ena. 
Hari daiguni ḡaudia na henu ai e kokodia hesiriu, a atai ai idia na ring amo e hesiriu; unuhetomadia rua e kara, daiguni ḡaudia ruaosi ai e halaodia. 
Taunabunai, kaha na taurahani bona silver hahelai-ku ḡaudia na gwauta tauratoi, kaha ta ta henudiai hahelai-kau ḡaudia rua rua. 
Raroraro danu kela audia amo e kara, au-ima dubu habana kahana ena, 
ma au-ima dubu habana kahana ena, ma au-ima dubu duduna ena, lahara kahana ai. 
Bogaragi rarorarona na kaha iboudiai e hahesiriudia, duduna ela bona duduna. 
Hari kaha na gold amo e ḡovadia; raroraro idogo-taodia ring-dia na gold amo e kara, bona raroraro na gold amo e ḡovadia. 
Bena seseahu na dabua aukana bona namona amo e karaia, vaiurina bona mia-kakana bona kakakakana, bona kerubi laulaudia e turi, ia ihaheralaina. 
Ena ihua-ihua hani kela audia amo e kara, bona gold amo e ḡovadia. Gold igaudia danu e kara, bona silver hahelai-kau ḡaudia hani. 
Kalaga iduarana seseahuna danu dabua aukana bona namona amo e karaia, vaiurina bona mia-kakana bona kakakakana; bona ihaheralaina danu e turi. 
Seseahu ena ihua-ihua ima e kara, mai igaudia. Hari ihua-ihua kwaradia na gold amo e ḡovadia, bona ihua-ihua na gold amo e kapadia heḡeḡe. A edia hahelai-kau ḡaudia imaosi na auri labora-labora amo e kara.